EFETIKILO 4 - Embimbiliya - Bíblia Sagrada em Umbundu

¹ Adama yu wa kulĩha ukãi waye Heva; kuenje we mina, wa cita Kaini, yu wa linga hati, Yehova wa ñuatisa, nda cita ulume.

² Yu wa cita vali manjaco Havele. Havele ungombo wolomeme, puãi Kaini ongunja.

³ Ceya okui eteke limue Kaini wa nena ovaima ovapia oku lumbila Yehova ocilumba.

⁴ Havele wa nenavo otunuñulu tumue tuocunda caye lulela watuo. Yehova wa sanjukila Havele locilumba caye;

⁵ puãi ka sanjukilile Kaini locilumba caye. Oco onyeño ya Kaini ya wenguka ca lua, locipala caye ca fela.

⁶ Yehova yu wa pula Kaini hati, Nye wa temẽla? Locipala cove ca nyumalẽla hẽ nye?

⁷ Nda o linga ciwa ku taviwa? Puãi nda ku lingi ciwa, ekandu lieli puvelo; kuenje li ku livela muẽle; ci kasi kokuove puãi oku li yula.

⁸ Kaini wa popia la manjaye Havele hati, Tuende kepia. Eci va kala vepia oco Kaini wondumuhĩla manjaye Havele; wo ponda.

⁹ Yehova yu wa pula Kaini hati, Manjove Havele hẽ o kasi pi? Eye wa kumbulula hati, Siko; ame nga ñasi locikele ca manjange?

¹⁰ Suku wa popia hati, Wa linga hẽ ndati? Ondaka yosonde ya manjove yi kasi posi ya mbilikiya.

¹¹ Cilo ove wa siñalĩwa, osi ka yu ku kuatisa vali ndeci ya lingaile, omo ya asama oku nyua peka liove osonde ya manjove;

¹² eci o lima, osi ka yu ku iha vali ongusu yayo; o linga ocingonguanda locingendeleyi kilu lieve.

¹³ Kaini wa popia la Yehova hati, Eyambulo liange lia lua muẽle; oku li ambata si ci tẽla.

¹⁴ Etali wa nundisa posi yilo. Nda tundisua kokuove; ndinga muẽle ocingonguanda locingendeleyi vofeka, kuenje wosi o sanga o njipaya.

¹⁵ Yehova wa popia laye hati, Oco hacoko. Nda umue o ponda Kaini o fetuluinyiwa olonjanja epanduvali. Oco Yehova wa kapa ondimbukiso ku Kaini okuti lomue o ñualẽhẽla laye u ponda.

¹⁶ Kaini yu wa tunda ku Yehova; wa tunga vofeka ya Nodo, konano ye Edene.

¹⁷ Kuenje Kaini wa kulĩha ukãi waye kuenje we mina, wa cita Enoke; yu wa tunga imbo, kuenje wa luka imbo liaco onduko yomõlãye Enoke.

¹⁸ Enoke wa cita Irate; Irate wa cita Mehuyale; Mehuyale wa cita Metusale; metusale wa cita Lameke.

¹⁹ Lameke wa kuẽla akãi vavali; onduko yu watete Ada, onduko yu wavali Sila.

²⁰ Ada yu wa cita Yavele; eye kukululu yomanu va tumãla volombalaka, va fuka ovinyama.

²¹ Onduko ya manjaco Yuvale; eye kukululu ya vosi va sika sika ovisanji lolombendo.

²² Sila yu wa cita Tuvale-Kaini; eye ukuakutẽla ovikuata viosi viosipi lutale; mukãi wa Tuvale-Kaini eye Nayama.

²³ Lameke wa popia lakãi vaye hati, A Ada, love a Sila, yeveleli kondaka yange! Ene akãi va Lameke, yeveleli eci mopia! Ndepaya ulume wa ngasa, kuenda ukuenje wa nota ombole.

²⁴ Nda Kaini o fetuluinyiwa olonjanja epanduvali, Lameke o fetuluinyiwa akui epanduvali kapanduvali kolonjanja.

²⁵ Adama wa kulĩha vali ukãi waye, kuenje wa cita omõla ulume, yu wo luka onduko yaye hati, Seti, momo hati, Pomangu ya Havele Suku wa miñanyailapo mõla okuavo; momo Havele Kaini wo wipa.

²⁶ Leyevo Seti wa cita omõla ulume; wo luka onduko yaye Enosi. Otembo yaco oyo otembo omanu va fetika oku vilikiya onduko ya Yehova.