EFETIKILO 39 - Embimbiliya - Bíblia Sagrada em Umbundu

¹ Yosefe vo wambata, va enda laye ke Egito. Potifara, ukulu wa Fareo, kesongo liakuenje velombe, u Egito, wo landa peka lia va Isameli ava veya laye.

² Yehova wa kala la Yosefe kuenje wa linga ukuesumũluho. Wa kala vonjo ya cime caye u Egito.

³ Cime caye wa limbuka okuti Yehova wa kala laye, kuenje cosi a linga, Yehova wa ci sumũluisila peka liaye.

⁴ Oco Yosefe wa sanga ohenda kokuaye kuenje wo vumba; yu wo kapa ukalei vonjo yaye, wo kundika ovina viaye viosi.

⁵ Oco tunda keteke liaco eci o kapa ukalei konjo yaye kovina viaye viosi, Yehova wa sumũluisa onjo yu Egito omo Yosefe wa kalamo; esumũluho lia Yehova lia kala kovina viaye viosi viovonjo lokovapia.

⁶ Kuenje wa sia cosi caye peka lia Yosefe; ka kulĩhile vali cimue caye, te lika okulia a lia. Eye Yosefe osõsi haiye onumbu.

⁷ Kovaso yoloneke vimue ukãi wa cime caye wa vanja Yosefe, yu wo peya hati, Pekela lame.

⁸ Yosefe puãi wo likala, wa popia lukãi wa cime caye hati, Tala, tunda a ñapa kupange cime cange ka kulĩhile vali eci ci kasi vonjo. Cosi caye wa ci kundika peka liange.

⁹ Ndaño eye, ka mbelelepo vonjo yilo, eye ka nemẽlele cimue te ove, momo ove wukãi waye. Oco ame ndinga ndati evĩho eli, hã si kuata ekandu ku Suku?

¹⁰ Oco ndaño ukãi wa yonja yonja Yosefe eteke keteke, haimo ka tavele oku u yeva loku pekela laye, ndaño oku kala ocipepi laye.

¹¹ Puãi eteke limue, eci Yosefe a iñila vonjo oku linga upange waye, kuenje vonjo ka mua kaile omunu ukuavo,

¹² oco ukãi wo kuata kocikutu caye, wa popia hati, Pekela lame. Yosefe wa sia ocikutu caye peka liukãi kuenje wa tila, wa tundila posamua.

¹³ Oco eci ukãi a mõla okuti wa sia ocikutu peka liaye, kuenje wa tila,

¹⁴ oco wa kovonga alume vokonjo yaye, wa popia lavo hati, Tali, wa tu nenela u Heveru ha tu lavisa; weya kokuange oku pekela lame kuenje nda vilikiya londaka ya lua.

¹⁵ Eci a yeva ndomo nda kaluka oku vilikiya, oco wa sia ocikutu caye kokuange, wa tila kuenje wa tundila posamua.

¹⁶ Ukãi wa kapa ocikutu caco ocipepi laye toke cime caye weya vonjo.

¹⁷ Eci eya olondaka viaco haivio vimosi o sapuila hati, Ukuenje u Heveru una wa tu nenela, weya kokuange oku ndavisa;

¹⁸ puãi tuli nda kaluka loku vilikiya, eye wa sia ocikutu caye peka liange kuenje wa tila.

¹⁹ Eci cime caye a yeva olondaka viukãi waye ndomo o sapuila hati, Oco ca ndinga ukuenje wove, oco onyeño yaye ya wenguka.

²⁰ Cime ca Yosefe yu wo kuata, wo yika vokayike omu mua yikiwa olomandekua viosoma. Wa kala muẽle vokayike.

²¹ Puãi Yehova wa kala la Yosefe, wo kuatisa locisola caye ka ci pongoloka, kuenje kalei kokayike wo sola.

²² Oco kalei kokayike wa kundika peka lia Yosefe olomandekua viosi viovokayike; kuenje cosi va lingainga eye wa ci lingisa.

²³ Kalei kokayike ka vanjele vali cimue ca kala peka lia Yosefe, omo Yehova wa kala laye kuenje cosi a linga, Yehova wa ci sumũluisa.