EFETIKILO 38 - Embimbiliya - Bíblia Sagrada em Umbundu

¹ Poloneke viaco ca pita okuti Yuda wa tunda pokati ka vakuvaye kuenje weñila vonjo yulume umue u Adulama, onduko yaye Hira.

² Omo Yuda a muĩla omõla ufeko wu Kanana umue, onduko yaye Siuwa, wo kuẽla kuenje wa litokeka laye.

³ Yu we mina, wa cita omõla ulume, wo luka Ere.

⁴ Yu we mina vali, wa cita omõla ulume, wo luka Onane.

⁵ Yu wamako vali, wa cita omõla ulume, wo luka Sela. Wa kala ko Kesivi eci o cita.

⁶ Yuda yu wa kuẽlela nuñulu yaye Ere ukãi, onduko yaye Tamare.

⁷ Puãi Ere, nuñulu ya Yuda, ondingaivi ku Yehova, oco Yehova wo lia.

⁸ Yuda yu wa popia la Onane hati, Kuende, ka kuẽle ukãi wa huvove uminganjo, ka litokeka laye hã hu amisako ombuto yahuvove.

⁹ Onane puãi wa ci kũliha okuti ombuto yaco ka yi lingi yaye, oco eteke a litokeka lukãi wa huvaye wa talamẽla posi okuti ka eci ombuto ku huvaye.

¹⁰ Kuenje Yehova wa suvuka eci a linga, yu wo liavo.

¹¹ Oco Yuda wa popia la ndatembo yaye Tamare hati, Kala umbumba vonjo ya so toke omõlange Sela o kola, momo wa soka hati, Sanga eye o favo ndeci vahuvaye. Oco Tamare wa enda, wa kala vonjo ya isiaye.

¹² Eci pa pita oloneke oco ukãi wa Yuda, omõla a Siuwa, wa fa. Eci Yuda a lembelekua oco wa lamanẽla kolomemũli viocunda caye ko Timinate, eye lukuavo Hira u Adulama.

¹³ Eci va sapuila Tamare vati, Ndatembo yove yo, o lamanẽla ko Timinate ha pemũla ocunda caye,

¹⁴ oco Tamare wa lula uwalo waye wumbumba, wa lisikilĩla lonanga, wa tumãla kombundi ya Enama konjila yoko Timinate. Momo wa limbuka okuti Sela wa kula ale, kuenje lopo eye ka eciwile kokuaye ha lingi ukãi waye.

¹⁵ Eci Yuda o mõla wa soka hati, Omopisi, omo wa lisikilĩla kopolo yaye.

¹⁶ Wo pambukila konele yonjila, wo peya hati, Linga, ndi litokeke love, momo ko limbukile okuti eye ndatembo yaye. Eye hati, O nyiha nye nda o litokeka lame?

¹⁷ Eye wa linga hati, Hu tumisa okamõla kohombo kovocunda. Eye hati, O nyiha onjeke toke o ka tumisa?

¹⁸ Eye hati, Onjeke ye hu iha? Eye hati, Onẽla yove lukolo wove kuenda ombueti o kasi layo peka. Yu wo vi avela, kuenje wa enda, wo minisa.

¹⁹ Oco Tamare wa katuka, wa enda, kuenje wa lula onanga yaye, wa wala uwalo wumbumba.

²⁰ Eci Yuda a tuma okamõla kohombo peka liumue u Adulama, oku ka tambula onjeke yaco peka liukãi, u wa tumiwa ko sangele.

²¹ Oco wa pula ovalume vofeka yaco hati, Omopisi ya kaile ke Enama konele yonjila yi kasi pi? Ovo vati, Kulo ka kuli omopisi.

²² Yu wa tiukila ku Yuda, wo sapuila hati, Sio sangele, kuenje ovalume vofeka va popiavo vati, Kulo ka kuli omopisi.

²³ Yuda wa kumbulula hati, Kala lako ño, sanga va tu yola epembe. Cinene nda tumile okahombo kohuminyo, ove puãi kuo sangele.

²⁴ Eci pa pita olosãi vitatu oco va sapuila Yuda vati, Tamare, ndatembo yove, wa linga ukahonga, kuenje kukahonga waco we mina. Yuda hati, U tundisi, a yokiwe.

²⁵ Eci vo tundisa eye ufeko wa tuma ondaka ku ndatembo yaye hati, Imo ñasi lalio liulume ukuavina evi. Wa popiavo hati, Va limbuke ño ovina evi, onẽla, lukolo, lombueti, vielie?

²⁶ Yuda wa vi limbuka, wa linga hati, Eye ukuesunga, ame hameko, momo sio wihile omõlange Sela. Kuenje ko kulĩhile vali.

²⁷ Eci eteke liaye lioku cita lieya, vimo liaye mua kala olonjamba.

²⁸ Oco eci ca keya poku cita kua tunda eka. Ucitisi yu wa kuata eka liaco wa kutako ukolo u kusuka, hati, Ulo eye wa tunda tete.

²⁹ Oco eci a ka tiula eka, mua tunda manjaco. Ucitisi hati, Wa tepako ndati? Kuenje onduko yaye ya lukiwa Perese.

³⁰ Noke mua tunda manjaco lukolo u kusuka peka liaye, kuenje wa lukiwa Sera.