EFETIKILO 35 - Embimbiliya - Bíblia Sagrada em Umbundu

¹ Oco Suku wa popia la Yakoba hati, Katuka, lamanẽla ko Betele haiko o kala, haiko o tunga utala wa Suku, u wa ku tukulukilile eci wa tila Esau huvove.

² Yakoba yu wa pañinya onjo yaye lomanu vosi va kala laye hati, Imbipo olosuku viakombe vina vi kasi pokati kene, liyelisi ho pongolola uwalo wene.

³ Tu katuki, tu lamanẽli ko Betele, tu ka tungeko utala wa Suku una wa ñumbuluile keteke liohali yange kuenje wa sindaikaila kuosi nda endaenda.

⁴ Oco va eca ku Yakoba oviteka viosi viakombe va vi kuete, lovingelengele viokovatui avo, kuenje Yakoba wa vi kenda pemehi liuti wa kala konele ya Sekeme.

⁵ Osimbu va enda ungende wavo ocinjoko ca Suku ca kuata ovaimbo a lisungue lavo, okuti ka va landuile vali omãla va Yakoba.

⁶ Oco Yakoba weya ko Lusi, ca lomboloka ko Betele vofeka ya Kanana, eye lomanu vosi va kala laye.

⁷ Haiko a tunga utala, yu wa luka usenge waco onduko hati, Suku ya Betele, momo oko Suku a lisituluila kokuaye cina a tila huvaye.

⁸ Devora, uleli wa Rebeka, wa fa kuenje vo kenda kombuelo ya Betele vemehi liuti; oco uti waco vo luka vati, Uti Wasuẽlela.

⁹ Suku wa tukuluka vali ku Yakoba eci a tunda ketapi lia Arama kuenje wo sumũluisa.

¹⁰ Haeye Suku wa popia laye hati, Onduko yove ya Yakoba ka yi tukuiwa vali Yakoba, te Isareli, oyo onduko yove, kuenje wo luka Isareli.

¹¹ Oco Suku wa popia laye hati, Ame Suku Ukuonenewosi, kuata ombuto ka lue, kokuove ku tunda ofeka lohongele yolofeka, koviongo viove ku tunda olosoma.

¹² Ofeka yilo nda ecele ku Avirahama kuenda ku Isake ndi yeca kokuove, ndi yecavo kombuto yove yu ku kuãi.

¹³ Suku yu wa liamũha laye vusenge una a vanguila laye, kuenje wa londa kilu.

¹⁴ Yakoba yu wa katula ongunji yewe kuna a vanguila laye; wa pesilako ocilumba cokunyua kuenje wa itilakovo ulela.

¹⁵ Oco Yakoba wa luka onduko yusenge okondeti Suku a vanguila laye hati, Betele.

¹⁶ Kuenje va tunda ko Betele, va enda ungende wavo. Eci pa kamba ño naito oku pitila ke Efarata, oco Rahele wa kala kewe, kuenje olongembia via luluviya.

¹⁷ Eci olongembia via ka luluviya, ucitisi wa popia laye hati, Ku ka yokoke, momo o cita vali omõla ulume.

¹⁸ Oco, eci pa kamba naito oku tula omuenyo waye, momo wa fa, wa tukula onduko yaye hati, Eye Benoni, puãi isiaye wo luka Benjamini.

¹⁹ Oco Rahele wa fa, kuenje vo kenda konjila yoku enda ko Efarata, haiko ko Beteleme.

²⁰ Yakoba wa katula ongunji keyambo liaye; ongunji yaco haiko yi li keyambo lia Rahele toke etali lilo.

²¹ Isareli wa amako lungende waye, wa tamũlula ombalaka yaye, konẽle yikuavo yombonge ye Edere.

²² Osimbu Isareli a kala vofeka yaco, Ruvene wa enda, wa pekela la Biliha, ukama wa isiaye; kuenje Isareli wa ci yeva. Omãla va Yakoba va kala ekui la vavali.

²³ Omãla va Lea vava: Ruvene eye nuñulu ya Yakoba, la Simeone la Lewi la Yuda la Yisakare kuenda Sevulono.

²⁴ Omãla va Rahele, Yosefe la Bejamini.

²⁵ Omãla va Biliha, ufeko wa Rahele, Dani la Nafitali.

²⁶ Omãla va Siliha, ufeko wa Lea, Gadi la Asiere. Ovo omãla va Yakoba valume a citila ketapi lia Arama.

²⁷ Yakoba weya ku isiaye Isake ko Mamire, kimbo lia Araba, haiko ko Hevirone, kuna kua kala Avirahama la Isake.

²⁸ Oloneke via Isake via tẽla handi ocita lakui ecelãla kanyamo.

²⁹ Isake wa tula omuenyo, wa fa, kuenje wa likongela lepata liavo. Wa kaile ekongo, ukualoneke via lua. Omãla vaye Esau la Yakoba vo kenda.