EFETIKILO 34 - Embimbiliya - Bíblia Sagrada em Umbundu

¹ Dina, omõla ukãi Lea a cita la Yakoba, wa tunda oku ka vanja omãla vakãi vofeka.

² Eci Sekeme, omõla ulume wa Hamore u Hivi, ombiali yofeka, wo mõla. Oco wo kuata, wa pekela laye, kuenje wo nyõla.

³ Utima waye wa leñelẽla Dina omõla a Yakoba; wa sola ufeko waco kuenje wo lembeleka.

⁴ Oco Sekeme wa popia la isiaye Hamore hati, Ñuelele ufeko u, a linge ukãi wange.

⁵ Yakoba wa yeva okuti wa nyõla omõlaye ukãi Dina; puãi omãla vaye valume va kala vusenge lolongombe viaye; oco Yakoba wõha ño toke veya.

⁶ Hamore, isia ya Sekeme, weya ku Yakoba, wa vangula laye.

⁷ Eci omãla valume va Yakoba va ci yeva va tunda vusenge, veya. Oco vamume va ci suvuka, va tema ca lua, vati, Wa linga uveke ku Isareli oku pekela lomõla a Yakoba; oco ka ci lingaiwa.

⁸ Puãi Hamore wa popia lavo hati, Omõlange Sekeme utima waye wa livela omõlove ukãi; vo wihe, a linge ukãi waye.

⁹ Tu likuẽleli, tu ihi omãla vene vakãi; tambulivo omãla vetu vakãi.

¹⁰ Oco vu tunge pokati ketu, ofeka yi kalavo yene; tungi ño, fũlĩlimo, fukilimo.

¹¹ Sekeme wa popiavo la isia yufeko kuenda vamume vaye, hati, Va ndinge ohenda, cosi vu nukuila ngeca.

¹² Nukuili ño ovilombo, lociveleko, ame ngeca cosi vu nukuila. Cinene vu nyiha ufeko ha lingi ukãi wange.

¹³ Omãla va Yakoba va tambulula Sekeme la isiaye Hamore lelimbi, omo wa nyõla manjavo Dina.

¹⁴ Va popia lavo vati, Ka tu tẽla oku linga ocina eci okuti tu eca manjetu kulume ka seviwile evamba, momo nda ca tu kutisa osõi.

¹⁵ Tu tava lika kokuene nda vu lisoka letu, okuti alume vene vosi va seviwa evamba.

¹⁶ Oco tu eca omãla vetu vakãi kokuene kuenje tu tambulavo omãla vene vakãi. Tu tunga pokati kene ha tu lingi ofeka yimosi.

¹⁷ Puãi nda ko tava kokuetu okuti vu seviwa evamba, etu tu tambula omõletu kuenje tuenda.

¹⁸ Olondaka viavo via sanjuisa Hamore la Sekeme omõla a Hamore.

¹⁹ Ukuenje ka livalele oku ci linga, momo wa sola omõla a Yakoba. Eye wa kemãla ca velapo pokati kepata liavo.

²⁰ Oco Hamore lomõlaye Sekeme veyilila kombundi yimbo liavo, va vangula lalume vakuimbo liavo vati,

²¹ Ovalume va kasi letu vakuambembua, va tunge ño vofeka, va fũlilemo, momo ofeka yinene, yi va tẽla ciwa. Tu tambuli omãla vavo vakãi, va linge akãi vetu, kuenje tu va ĩha omãla vetu vakãi.

²² Puãi osimbu ka va tavele oku tunga letu loku kala letu ndepata limosi, cimosi lika va tu kisika, ceci: oku lisevisa evamba, okuti alume vetu vosi va sevisua evamba ndalume vavo.

²³ Oviunda viavo, lukuasi wavo, lovinyama viavo viosi ka vi lingi vietu hẽ? Tu tavi kokuavo oco va tunge letu.

²⁴ Kuenje vosi va tundila kombundi yimbo liaye va tava ku Hamore lomõlaye Sekeme. Alume vosi va tundila kombundi yimbo liaye va lisevisa evamba.

²⁵ Keteke liatatu, osimbu va kala loku vela apute aco, oco omãla vavali va Yakoba, Simeone la Lewi, vamume va Dina, va kuata, u osipata yaye, u osipata yaye, veya vimbo lutõi, va ponda ovalume vosi.

²⁶ Va ponda Hamore lomõlaye Sekeme; vopa Dina vonjo ya Sekeme, kuenje va tunda.

²⁷ Omãla va Yakoba volumuhĩla ovivimbi viaco, va punda imbo liavo momo va nyõla manjavo.

²⁸ Va punda olomeme viavo lolongombe lovimbulu viavo; cosi ca kala vimbo, la cosi ca kala kovapia, cosi va cambata.

²⁹ Va kuata ukuasi wavo wosi, lotumãla tuavo, lakãi vavo va va pandeka, va punda cosi ca kala volonjo.

³⁰ Yakoba yu wa popia Simeone la Lewi hati, Wa ndingi lãvi, omo wa suvukisi la vakuafeka okuti va Kanana la va Perisi. Olohoka viange vitito. Nda va liñongiliyila oku yaka lame, ame lonjo yange yosi tu nyoleha.

³¹ Ovo puãi va popia vati, Ca sunguluka nga ndomo a sokisa manjetu ndocipuepue?