EFETIKILO 33 - Embimbiliya - Bíblia Sagrada em Umbundu

¹ Yakoba wa petula ovaso aye, wa vanja kuenje wa mõla Esau yu iyo kumue lovita vikuãla vialume. Oco wa tepisila omãla ku Lea la Rahele lafeko vaye vavali.

² Wa kapa afeko vaco lomãla vavo kovaso; Lea lomãla vaye va kuamako, kuenda Rahele la Yosefe va siala konyima.

³ Eye muẽle wa pita kovaso, wa petamẽla posi olonjanja epanduvali toke wa pitila ku huvaye.

⁴ Puãi Esau wa yolokako ha tokeka laye, yu wo kuata kuenje wa nyoñamẽla kosingo yaye, wo sipula. Kavali kavo va lila.

⁵ Eci Esau a petula ovaso aye kuenje wa mõla ovakãi lomãla, oco wa pula hati, Ava velie va kasi love? Eye hati, Ovo omãla Suku a eca kukuenje wove.

⁶ Afeko va kokela lomãla vavo ha va fendela.

⁷ Lea leyevo wa kokela lomãla vaye ha va fendela. Oku sulako Yosefe la Rahele va kokela, lavovo va fendela.

⁸ Esau wa popia hati, Endo eli nda ñualehẽla lalio lia lomboloka ndati? Yakoba wa kumbulula hati, Nda soka oku livondela lalio ku Ñala yange.

⁹ Puãi Esau wa kumbulula hati, Eci ñuete ale nda tẽla laco a manjange; eci o kuete ci kale ño cove.

¹⁰ Yakoba hati, Kotoko, nda ocili nda sanga ohenda kokuove, va tambule ombanjaile ya tunda peka liange, momo ocili kokuange oku vanja ocipala cove ca soka ndoku vanja ocipala ca Suku, eci ndimbuka ndomo wa sanjukila.

¹¹ Va tambule ombanjaile nda ku nenela, momo Suku wa ndinga ohenda kuenje ñuete ovina via lua. Yu wo siliha kuenje wa tava.

¹² Esau wa popia hati, Tu ende ño ungende wetu. Ame mita kovaso.

¹³ Puãi Yakoba wa popia laye hati, A Ñala yange, o ci okuti omãla va teñela, lolomeme lolongombe ñasi lavio, vina vi kasi loku nyamisa, vi kasi loku sakalaisa. Nda va vi senga ca lua eteke limosi, oviunda viosi vi fa.

¹⁴ A Ñala yange, va pite ño kovaso yukuenje wove, ame ngenda levando, ñuama vakonjo ovinyama vi enda kovaso, lovolomãi viomãla toke tu pitila ku Ñala ko Seire.

¹⁵ Esau wa kumbulula hati, Hu silako vamue omanu va kasi lame. Yakoba hati, O ci lingila nye? A Ñala, ndinge ohenda, ci kale ño.

¹⁶ Eteke liaco Esau wa wila vonjila yoku tiukila ko Seire.

¹⁷ Puãi Yakoba wa enda ungende waye toke ko Sukote, wa tunga onjo, kuenje wa saika olonganjo viovinyama viaye. Oco va luka onduko yusenge waco vati, Olonganjo.

¹⁸ Eci a tunda ketapi lia Arama oco Yakoba wa pitila lombembua kimbo lia Sekeme vofeka ya Kanana. Wa tunga ocilombo konẽle yimbo.

¹⁹ Wa landa onepa yusenge kuna a tamũluila ombalaka yaye. Wa yi landa komãla va Hamore, isia ya Sekeme, locita covinimbu viutale wolombongo.

²⁰ Wa tungako utala, kuenje wo tukula hati, Suku eye suku ya Isareli.