EFETIKILO 32 - Embimbiliya - Bíblia Sagrada em Umbundu

¹ Yakoba yu wa enda ungende waye, kuenje olomunga via Suku via ñualehẽla laye.

² Eci a vi mõla Yakoba wa linga hati, Usoko wa Suku owo, kuenje wa luka onduko yusenge waco hati, Visoko.

³ Yakoba yu wa tuma olomunga kovaso ku huvaye Esau, kofeka ya Seire, kusenge we Edome.

⁴ Wa vi usika, hati, Ondaka vu ka vangula la Ñala Esau yeyi, hoti, Ukuenje wove Yakoba wa linga hati, Nda ka vongalaile ku Lavane, nda kala laye toke cilo.

⁵ Ñuete olongombe lovimbulu lolomeme lakuenje lafeko, oco nda tumila oku sapuila Ñala yange si sangi ohenda kokuove.

⁶ Olomunga via tiuka ku Yakoba, vio sapuila viti, Tua ile ku huvove Esau kuenje eye o kasi loku iya lovita vikuãla kalume oku ñualehẽla love.

⁷ Oco Yakoba wa kuata ca lua usumba, kuenje co vindula ohele, yu wa tepisa olohoka vivali omanu va enda laye, lolomeme lolongombe lolongamelo.

⁸ Hati, Nda Esau o pitila kohoka yimosi ha yi veta, ohoka yikuavo yi puluka.

⁹ Yakoba yu wa likutilila hati, A Suku ya sekulu yange Avirahama haive Suku ya tate Isake, a Yehova, ove wa mañinya huti, Tiukila kofeka yene lo kusitue wove kuenje hu sumũluisa.

¹⁰ Sia sesamẽlele ndaño naito ocisola cove ka ci pongoloka. Sia sesamẽlele muẽle esunga wa ndingila, ame ndukuenje wove. Olui lulo Yordão, nda lu yoka lombueti yange. Cilo nda linga olohoka vivali.

¹¹ Mopele peka lia huvange Esau, momo ndu kuetele usumba, sanga iya o njipaya, lame la vainaco lotumãla.

¹² Ove puãi wa likuminya huti, Hu sumũluisa, lombuto yove ndi yi lingisa ndeseke liokalunga ka litava oku tendiwa omo okulua kualio kua lua enene.

¹³ Oko Yakoba a pekela uteke waco, kuenje wa tepa kovina a enda lavio ombanjaile ya huvaye Esau, yokuti

¹⁴ ovita vivali kolomange violohombo, lakui avali kovitupi violohombo, kuenda ovita vivali kolomange violomeme lakui avali kovitupi violomeme;

¹⁵ akui atatu kolongamelo vi nyamisa lotumãla tuaco, akui akuãla kolongombe violomange lolonui ekui, akui avali kovimbulu violomange lotunãle ekui.

¹⁶ Yu wa vi kundika povaka akuenje vaye, ocunda locunda ca likalela. Wa sapuila ovakuenje vaye hati, Livangi kovaso, pokati kocunda locunda cikuavo pa pindike epuluvi.

¹⁷ Wosika u watete hati, Nda wa tokeka la huvange Esau, ha ku pula hati, Ove elie? pamue hati, Wenda pi? pamue hati, Vielie evi wenda lavio?

¹⁸ ove kumbulula huti, Viukuenje wove Yakoba; vi linga ombanjaile ku Ñala Esau kuenje leyevo yu iyo konyima yetu.

¹⁹ Haico osikavo u wavali lu watatu la vosi va enda loviunda viaco hati, Ovio olondaka vu ka kumbulula Esau eci vu ñualehẽla laye,

²⁰ kuenje vu linga hoti, Ukuenje wove Yakoba yu iyo konyima yetu. Momo wa sima hati, Ndi livondela laye lombanjaile ya livanga kovaso, oco mbanje noke kocipala caye; mbi o nambula lombembua.

²¹ Oco ombanjaile yaco ya livanga; eye muẽle wa lala uteke waco vocilombo.

²² Yu wa katuka uteke waco, ha pañinya akãi vaye vavali, lafeko vaye vavali, lomãla vaye ekui lamosi, kuenje va yokila ponjiva ya Yaboke.

²³ Wa va pañinya kuenje wa va yokisa okalui. Wa yokisavo ovikuata viaye.

²⁴ Eye Yakoba wa siala lika waye, kuenje ulume wa litila laye toke kua ca omẽle.

²⁵ Wa limbuka okuti ka tẽla oku u yula kuenje wo lamba kesokoluilo liocikalo caye, kuenje esokoluilo liocikalo ca Yakoba lia fomõha poku litĩla laye.

²⁶ Ulume hati, Ngece, ndopo ku ca. Yakoba hati, Siu ku eci te nda o sumũluisa.

²⁷ Ulume wo pula hati, Onduko yove, ove elie? Eye hati, Ame Yakoba.

²⁸ Ulume hati, Onduko yove ka yi tukuiwa vali Yakoba, te Isareli momo wa liyaka la Suku lomanu kuenje wa yula.

²⁹ Oco Yakoba wo puĩa hati, Sapuila onduko yove. Eye hati, Nye wa mulila onduko yange? Kuenje wo sumũluisilapo.

³⁰ Oco Yakoba a lukila onduko yusenge waco Penuele, ndokuti, Suku ndo mõla liso liange muẽle, haimo omuenyo wange wa popeliwa.

³¹ Ekumbi haiko lio tundila eci a pita ko Penuele; wa teñela omo ocikalo caye co valula.

³² Oco toke etali lilo va Israeli ka va lialia esipa li kasi kesokoluilo liocikalo, momo omunga ya lambele kesipa liesokoluilo liocikalo ca Yakoba.