EFETIKILO 30 - Embimbiliya - Bíblia Sagrada em Umbundu

¹ Eci Rahele a mõla okuti ka kasi oku cita la Yakoba, oco Rahele wa kuatela huvaye Lea esepa, yu wa popia la Yakoba hati, Nyihe omãla, nda hacoko, ndi fa.

² Yakoba wa temela Rahele, wa popia laye hati, Ame nga ñasi komangu ya Suku u wa ku tateka oku cita?

³ Oco Rahele hati, Ufeko wange Biliha yu, litokeka laye ha citila kolongolo viange okuti ndaño ame muĩla epata kokuaye.

⁴ Oco wa wiha ufeko waye Biliha ha lingi ukãi waye, kuenje Yakoba wa litokeka laye.

⁵ Leye Biliha we mina, wa citila Yakoba omõla ulume.

⁶ Rahele yu wa linga hati, Suku wa netuluila, kuenje wa yeva ondaka yange, wa nyiha omõla ulume. Oco wo luka Dani.

⁷ Biliha, ufeko wa Rahele, yu we mina vali, wa citila Yakoba omõla ulume wavali.

⁸ Kuenje Rahele wa linga hati, Nda liyaka la huvange uyaki wa lua kuenje nda yula; yu wo luka Nafitali.

⁹ Eci Lea a limbuka okuti ka citi vali, oco wa nyañula Silipa ufeko waye, wo weca ku Yakoba ha lingi ukãi waye.

¹⁰ Leye Silipa, ufeko wa Lea, wa citila Yakoba omõla ulume.

¹¹ Lea yu wa linga hati, Ociluli! kuenje wo luka Gadi.

¹² Silipa, ufeko wa Lea, wa citila Yakoba omõla ulume wavali.

¹³ Lea yu wa linga hati, Esanju liange! momo akãi va sanjukila, oco wo luka Asiere.

¹⁴ Koloneke vioku ungula otiliku Ruvene wa enda kepia oku sandiliya ovihemba violucito, kuenje wa vi nena ku inaye Lea. Rahele yu wa popia la Lea hati, Va nyiheko tumue otuvihemba tuolucito tua kopile omõlove.

¹⁵ Lea wa kumbulula hati, Eci wa nambula ale veyange ci sule, okuti lopo o yongola oku tambula vali ovihemba violucito via kopile omõlange? Rahele yu wa linga hati, Nda oco eye o pekela love uteke ulo mekonda liovihemba violucito via kopile omõlove.

¹⁶ Koñolosi eci Yakoba a tiuka kepia, oco Lea wo landula, wa linga hati, O lala lame, momo nda ku fetela ovihemba violucito via kopile omõlange. Yu wa pekela laye uteke waco.

¹⁷ Suku yu wa tava ku Lea, kuenje we mina, wa citila Yakoba omõla ulume watãlo.

¹⁸ Lea wa linga hati, Suku wa muisa onima yange momo nda eca ufeko wange ku veyange; kuenje wo luka Yisakare.

¹⁹ Eye Lea we mina vali, wa citila Yakoba omõla ulume wepandu.

²⁰ Lea wa linga hati, Suku wa muisa ombanjaile ya posoka, kaliye veyange o tunga lame momo nda citila omãla valume epandu, kuenje wo luka Sevulono.

²¹ Kovaso yaco wa cita omõla ukãi, wo luka onduko hati, Dina.

²² Oco Suku wa ivaluka Rahele, kuenje Suku wa tava oku situlula vimo liaye.

²³ Yu we mina, wa cita omõla ulume, wa linga hati, Suku wa njupa esepu liange.

²⁴ Kuenje wo luka Yosefe, hati, Yehova a mbokiyeko omõla ukuavo.

²⁵ Kovaso yoku cita Yosefe, Yakoba wa popia la Lavane hati, Ñatule, ngende kolietu, kofeka yetu.

²⁶ Va nyihe akãi vange, lomãla vange ava nda ku vumbila, oco ngende. Ocili ove wa kulĩha upange owu nda ku vumbila.

²⁷ Lavane wa popia laye hati, Ndinge ohenda oco mbangule love, momo nda taha kuenje nda limbuka okuti Yehova wa sumũluisa omo ove wa kala lame.

²⁸ Oco, nukuile ofeto o yongola kuenje hu yiha.

²⁹ Yakoba wo kumbulula hati, Ove wa kuliha ndomo nda ku vumbila, lomo ovinyama viove via kala lame.

³⁰ Osimbu sieyile, eci wa kaile laco citito; cilo ca linga ca lua, kuenje Yehova wa ku sumũluisila kupange wange. Cilo puãi eteke li pi nalavayela epata liange?

³¹ Lavane hati, Hu iha nye? Yakoba hati, Lacimue o nyiha. Nda o tava oku ndingila eci mopia love cilo, oco niuka vali kupange woku lisa ocunda cove, loku ci lava.

³² Nda ku pinga okuti etali mita vocunda cove cosi, njupamo olomeme viosi via mañana, levi vi kuete atumba, kuenda otumeme tuosi tu tekava. Njupamovo olohombo viosi via mañana, levi vi kuete atumba. Kuenje ovio vi linga ofeto yange.

³³ Noke kovaso, eci wiya oku sokiya lame, oco esunga o sanga kokuange olio li ku tukuila ndeci o feta. Pokati kolohombo ñasi lavio, nda pa sangiwa evi ka vi mañana pamue ka vi kuete atumba, kuenda vali nda pokati kotumeme pa sangiwa tumue ka tu tekava, ca lomboloka okuti via iviwa.

³⁴ Lavane yu wa linga hati, Omo muẽle, ci lingiwe ndomo wa popia.

³⁵ Eteke liaco eli Lavane wa tepako ovitupi violohombo vi kuete amiongo latumba, lolomange violohombo viosi vi mañana levi vi kuete atumba, cosi ci kuete pamue pa yela, kuenda viosi vi tekava pokati kolomeme, ha vi eci povaka vomãla vaye.

³⁶ Yu wa tepisila omãla vaye la Yakoba ocinala ca soka lungende woloneke vitatu; kuenje Yakoba wa lisa ocunda ca Lavane ca sialapo.

³⁷ Yakoba yu wa liangiliyila ovisiota vitalala vioviti vialamu levi viavelera levi via platanu, wa suvako ovinondolo vi yela, ha mõlehisa ci yela pokati kovisiota.

³⁸ Yu wa kapa ovisiota a suva kovaso yoviunda vakula lovovikulungu viovava omu oviunda vieyaiya oku nyuila. Kuenje momo vie minila eci vieya oku nyua,

³⁹ ca lomboloka okuti oviunda vie mina kovaso yovisiota, oco ovindu via cita cita evi vi kuete amiongo levi vi mañana kuenda atumba.

⁴⁰ Otumeme tuaco Yakoba wa tu tepako, ocunda caco wa cimbisa ovaso koviunda viamiongo, kuenda viosi vi tekava vocunda ca Lavane; kuenje wa tepako oviunda viaye, ka vi kapele vocunda ca Lavane.

⁴¹ Olonjanja viosi eci olomeme vi kuete ongusu vi londiwa, Yakoba wa kapa ovisiota viaco kovaso yolomeme povikulungu, ndokuti vi minila pokati kovisiota.

⁴² Puãi eci olomeme ka via pamele vieya, eye ka kapeleko ovisiota; okuti evi ka via pamele ovio via linga via Lavane, levi via pama ovio via linga via Yakoba.

⁴³ Oco Yakoba wamako ca lua cimue, wa fuka oviunda via lua, lafeko lakuenje lolongamelo kuenda ovimbulu.