EFETIKILO 3 - Embimbiliya - Bíblia Sagrada em Umbundu

¹ Onyõha ya velelepo oku nyanga, ovinyama viosi viovusenge via lulika Yehova Suku vi sule. Kuenje ya pula ukãi yiti, Ocili Suku wa popia hati, Ko ka li koviti viosi viovocumbo, ale?

² Ukãi wa kumbulula onyõha hati, Tuakuakulia kapako oviti viovocumbo;

³ te epako liuti owo u kasi vokati kocumbo, owo Suku a linga hati, Ko ka liko, ndaño oku lambako, sanga vu fa.

⁴ Onyõha ya popia lukãi yiti, Mbu, okufa ka vu fi;

⁵ momo Suku wa kulĩha okuti eteke vu liako, ovaso ene haico a letuluka kuenje vu linga nda Suku, vu kulĩha eci ciwa leci cĩvi.

⁶ Ukãi yu wa mõla uti okuti wa posokela oku liako, haiwo wa posokela oku u tala, haiwo uti wa soliwila oku eca olondunge, yu wa yunga epako, kuenje wa lia; wa ecavo limue ku veyaye kuenje wa liavo.

⁷ Oco ovaso avo a situluka kavali kavo, kuenje va lilimbuka okuti va kasi ño epõlõla; oco va litongela amẽla akuyu ha va liluvikiyila okowalo.

⁸ Va yeva ondaka ya Yehova Suku eci a ñuala ñuala vocumbo koñolosi; oco ulume lukãi waye va salama kolonyima vioviti viovocumbo oku tila Yehova Suku.

⁹ Yehova Suku yu wa kovonga ulume, wo pula hati, O kasi pi?

¹⁰ Eye wa kumbulula hati, Nda yevela ondaka yove vocumbo kuenje nda kuata usumba, omo ñasi ño epõlõla oco nda salamẽla.

¹¹ Eye hati, Wa ku sapuila hati, O kasi epõlõla, helie? Mbi wa lia kuti una nda ku handeleka siti, Ku ka lieko?

¹² Eye ulume wa popia hati, Ukãi una wa nyiha oku kala lame, eye wa nyihako epako liuti waco kuenje nda lia.

¹³ Yehova Suku wa pula ukãi hati, Oco hẽ, nye wa ci lingila? Ukãi wa kumbulula hati, Onyõha ya ndueyisa kuenje nda lia.

¹⁴ Yehova Suku wa popia lonyõha hati, Omo wa linga ndoco, wa siñaliwa pokati kovinyama viosi viovimbo kuenda ovinyama viosi viovusenge. Imo liove o likoka posi hu lialia eve oloneke viosi viomuenyo wove

¹⁵ Ñapa ukuse pokati kene, love lukãi, lo pokati kombuto yove lombuto yaye. Eye o sasõla utue wove, kuenje ove u lumana kocisendemãi.

¹⁶ Wa popia lukãi hati, Ha luisa olongembia viove koku cita kuove; o cita cita omãla lolongembia, haimo onjongole yove yi kala kulume wove, leye o ku viala.

¹⁷ Ku Adama wa linga hati, Omo wa tava kondaka yukãi wove kuenje wa lia kuti una nda ku handeleka, siti, Ku ka lieko, oco osi yi siñalĩwa. O liako lohali oloneke viosi viomuenyo wove;

¹⁸ yi ku imĩla olosongo loholokoso; kuenje o lialia ovikũla viovusenge.

¹⁹ O lialia okulia kuove lesalamĩho liokopolo yove, toke eteke o tiukila vali keve; momo haiko wa tundile. Ove ukueve, keve haiko o tiukila.

²⁰ Ulume yu wa luka onduko yukãi waye hati, Heva, momo eye nyõho yava vosi va kasi lomuenyo.

²¹ Kuenje Yehova Suku wa tungila Adama lukãi waye ovikutu viovipa, yu wa va walisa.

²² Oco Yehova Suku wa popia hati, Ota, ulume wa linga ndetu, kaliye o kulĩha eci ciwa leci cĩvi; kandopo sanga õluĩla okuokuo kuaye kuti womuenyo loku kotolako ha li, hã ha kala hũ lomuenyo,

²³ oco Yehova Suku wo tundisa vocumbo ce Edene, okuti o ka lima osi kuna a tundile.

²⁴ Wa tundisa ulume, kuenje konele yutundilo wocumbo ce Edene wa kapako va Keruvi, losipata yondalu yi pongolokela kuosi oku lava onjila yo kuti womuenyo.