EFETIKILO 29 - Embimbiliya - Bíblia Sagrada em Umbundu

¹ Yakoba wa enda lungende waye, wa pitila kofeka yomanu vokonano.

² Eci a petula ovaso wa mõla ocisimo vusenge, loviunda vitatu violomeme via vutamapo; momo kocisimo caco oko va nyuisaila oviunda. Komẽla wocisimo kua tuvikiwa ewe linene.

³ Eci oviunda viosi vi liongoluilako, oco angombo va tuvula ewe liaco komẽla wocisimo ha va nyuisa olomeme; noke va tuvikako vali ewe komẽla wocisimo.

⁴ Yakoba yu wa popia lavo hati, Akuetu, ene hẽ, wa tunda pi? Ovo vati, Etu tu va Harane.

⁵ Eye wa va pula hati, Wa kũlihi Lavane, omõla a Nahore? Vati, Tuo kuliha.

⁶ Wa va pula hati, O kasi ciwa? Vati, O kasi ciwa; omõlaye Rahele viyo lolomeme.

⁷ Eye hati Ekumbi handi lia lua, halioko ekumbi lioku ongolola ovinyama; nyuisi olomeme, kuendi, ka vi lisi vali.

⁸ Ovo vati, Ka tu ci tẽla toke oviunda viosi vi ongoloka, kuenje tu tuvula ewe komẽla wocisimo loku nyuisa olomeme.

⁹ Osimbu a kala loku vangula lavo Rahele weya lolomeme via isiaye, omo eye o vi lisa lisa.

¹⁰ Oco eci Yakoba a mõla Rahele, omõla a Lavane nyohonu yaye, kuenda olomeme via Lavane nyohonu yaye, oco Yakoba wa kokela, wa tuvula komẽla wocisimo kuenje wa nyuisa olomeme via Lavane nyohonu yaye.

¹¹ Yakoba yu wa sipula Rahele kuenje wa kaluka oku lila.

¹² Oco Yakoba wa lisitulula ku Rahele okuti eye ocimumba ca isiaye, kuenda okuti eye omõla a Rebeka; kuenje Rahele wa lupuka oku ka sapuila isiaye.

¹³ Eci Lavane a yeva ondaka ya Yakoba, omõla a mũkai waye, oco wa yoloka, wa ñualehela laye; wo kuata, wo sipula, wo tuala konjo yaye. Kuenje Yakoba wa sapuila Lavane ovina evi viosi.

¹⁴ Lavane yu wa popia laye hati, Ocili, ove vukepa liange, haive vusitu yange. Kuenje Yakoba wa kala laye osãi.

¹⁵ Oco Lavane wa popia la Yakoba hati, Omo vucimumba cange o mbumba nga ocali? Nukuile ofeto yove.

¹⁶ Lavane wa kala lomãla vakãi vavali; onduko yukulu Lea, onduko yumãlehe waco Rahele.

¹⁷ Ovaso a Lea a kasi loluhopio, Rahele puãi wa posoka, haeye ondambi.

¹⁸ Yakoba wa sola Rahele, kuenje wa linga hati, Ndi vumbila omõlove umãlehe Rahele, anyamo epanduvali.

¹⁹ Lavane wa kumbulula hati, Ciwa oku weca kokuove, oku weca kulume wiñi hacoko. Kala ño lame.

²⁰ Oco Yakoba wa vumbila Rahele anyamo epanduvali, kuenje wa ci sokisa ndoloneke viaño omo wo sola ca lua.

²¹ Yakoba yu wa popia la Lavane hati, Nyihe ukãi wange si litokeka laye, momo oloneke viange via tẽla.

²² Lavane wongolola alume vovimbo liaye, kuenje wa lingisa okulia.

²³ Puãi onõlosi wa katuka lomõlaye Lea, kuenje wo tuala ku Yakoba; oco Yakoba wa litokeka laye.

²⁴ Eye Lavane wa eca ufeko waye Silipa komõlaye Lea ha lingi ufeko waye.

²⁵ Eci kua ca omẽle, ota, ca kala Lea. Yakoba yu wa popia la Lavane hati, Oco hẽ, wa ci ndingila nye? Ha Rahele ko hẽ nda ku vumbila? Nye wa ñembela?

²⁶ Lavane wa kumbulula hati, Hacoko va lingainga kulo okuti va kuẽlisa umãlehe osimbu nuñulu yaco ka kuẽlele handi.

²⁷ Tẽlisa ño osimanu yaye, oco tu ku ihavo ukuavo ha ku u vumbila vali epanduvali likuavo lianyamo.

²⁸ Yakoba wa ci linga kuenje wa tẽlisa osimanu yaye. Lavane yu wo wiha omõlaye Rahele ha lingi ukãi waye.

²⁹ Kuenje Lavane wa eca ufeko waye Biliha komõlaye Rahele ha linga ufeko waye.

³⁰ Oco Yakoba wa litokekavo la Rahele, kuenje wa sola ca lua Rahele, Lea ci sule, yu wo vumbila vali epanduvali likuavo lianyomo.

³¹ Eci Yehova a mõla okuti Lea wa suvukiwa, oco wa situlula vimo liaye; Rahele wa kala ño osiũle.

³² Lea we mina, wa cita omõla ulume kuenje wo luka Ruvene, hati, Ocili Yehova wa vanja ohali yange, kaliye veyange o sola.

³³ Yu we mina vali, wa cita omõla ulume, kuenje hati, Omo Yehova a yeva okuti nda suvukiwa oco wa nyiha vali omõla u; yu wo luka Simeone.

³⁴ We mina vali, wa cita vali omõla ulume, kuenje wa linga hati, Cilo veyange o namelẽla, momo ndo citila omãla vatatu valume. Oco onduko yaye ya lukiwa Lewi.

³⁵ Yu we mina vali, wa cita vali omõla ulume, kuenje wa linga hati, Cilo sivaya Yehova, oco wo luka Yuda; kuenje wa talama oku cita.