EFETIKILO 28 - Embimbiliya - Bíblia Sagrada em Umbundu

¹ Oco Isake wa kovonga Yakoba kuenje poku u sumũluisa wo handeleka hati, Ku ka kuẽle ukãi u Kanana.

² Katuka, kuende ketapi lia Arama, konjo ya Sekulu Betuele, oko o ka kuẽla ukãi komãla va nyohonu Lavane.

³ Kuenje Suku Ukuonenewosi a ku sumũluise, a ku ihe ombuto, a ku luise hu lingi ohongele yapata;

⁴ a ku muise ove esumũluho lia Avirahama, lombuto yove, hu lingi kapiñala kofeka yilo yulungi, eyi Suku a eca ku Avirahama.

⁵ Oco Isake wa tuma Yakoba, yu wa enda ketapi lia Arama ku Lavane, omõla a Betuele, u Arama, mume wa Rebeka, ina ya Yakoba le Esau.

⁶ Kuenje Esau wa ci mõla ndomo Isake a sumũluisa Yakoba loku u tuma ketapi lia Arama oku ka kuela ukãi, lomo poku u sumũluisa o handeleka hati, Ku ka kuẽle ukãi u Kanana.

⁷ Wa mõlavo ndomo Yakoba a pokola ku isiaye la inaye, kuenje wa enda ketapi lia Arama.

⁸ Eci Esau a limbuka okuti isiaye Isake ka solele akãi va Kanana,

⁹ oco Esau wa enda ku Isameli, kuenje ukãi Mahalati, omõla a Isameli omõla a Avirahama, haeye mukai wa Nevayoti, wo vokiyako kakãi a kala lavo.

¹⁰ Yakoba yu wa tunda ko Bereseva oku enda ko Harane.

¹¹ Wa pitila vusenge umue kuenje haimo a lala omo ekumbi lia iñila ale. Wa nyañula ewe limue lia kalako, wa li kapa kovitue, wa kunamẽlako, kuenje wa pekela.

¹² Oco wa lota onjoi yokuti osikata ya tunda posi, utue wayo wa pitila toke kilu, kuenje kua kala olomunga via Suku, evi vi londa, evi vi loka.

¹³ Yehova wa talama kilu liayo, wa linga hati, Ame ndi Yehova, Suku ya sekulu yove Avirahama, haime ndi Suku ya Isake. Osi eyindeti wa pekela ndi yeca kokuove, lombuto yove.

¹⁴ Ombuto yove yi linga ndeseke lioposi, lovitumbulukila viove vienda kutakelo lokutundilo, ko Norte loko Sul. Apata osi okilu lieve a sumũluhila kokuove lokombuto yove.

¹⁵ Ocili, ame ñasi kumue love. Hu lava lava kuosi wenda, kuenje hu nena vali vofeka yilo. Si ku yanduluka toke nda linga eci nda likuminya love.

¹⁶ Yakoba yu wa pasuka kotulo, wa linga hati, Ocili muẽle, Yehova o kasi vusenge ulo, kuenje sia ci kulĩhile.

¹⁷ Yu wa yokoka hati, Usenge ulo u kola, palo ocili ponjo ya Suku, haipo pombundi yokilu.

¹⁸ Yakoba yu wa pasuka omẽle, wa nyañula ewe a kunamelele, wa li sembika ndongunji, kuenje wa itilako ulela.

¹⁹ Yu wa luka onduko yusenge waco hati, Betele, puãi onduko yimbo liaco kefetikilo ya kaile Lusi.

²⁰ Yakoba yu wa lisila ocisila hati, Nda Suku o kala lame ha ndava ndava konjila yange ngendela, loku ngavela ombolo yokulia, luwalo woku wala,

²¹ okuti niukila vali lombembua konjo ya tate, oco ndinga siti, Yehova eye Suku yange;

²² kuenda vali ewe eli nda sembika ndongunji li linga onjo ya Suku. Cosi o nyiha hu tepelako onepa yekui.