EFETIKILO 25 - Embimbiliya - Bíblia Sagrada em Umbundu

¹ Avirahama wa kuẽla vali ukãi ukuavo, onduko yaye Ketura.

² Wa cita laye omãla, Simirama, Ikasane, Medana, Midiane, Isimbake la Suha.

³ Ikasane yu wa cita Seva la Dedane. Omãla va Dedane ovo va Asuri la va Letusi kuenda va Lewumi.

⁴ Omãla va Midiane vava, Efa, Efere, Hanoke, Avida la Eldana. Ava vosi omãla va Ketura.

⁵ Avirahama wa eca cosi a kuete ku Isake.

⁶ Puãi komãla valume ava a cita lakama, Avirahama wa eca olombanjaile; kuenje osimbu a kala lomuenyo wa va tepisa komõlaye Isake, wa va tuma kutundilo, kofeka ya Kedema.

⁷ Oloneke viovanyamo omuenyo wa Avirahama vievi: ocita lakui epanduvali kanyamo kanyamo atãlo.

⁸ Avirahama wa tula omuenyo, wa fa tupu ekongo liocili, osekulu muẽle, wa kuka ca lua, wa enda ku vangandiaye.

⁹ Omãla vaye, Isake la Isamẽli, vo kenda veleva lia Makapela, vusenge wa Efirone omõla a Soyara, u Hiti, una u kasi kutundilo wa Mamire,

¹⁰ haiwo usenge Avirahama a landele ku va Hiti; omo va kenda Avirahama kuenda ukãi waye Sara.

¹¹ Kovaso yokufa kua Avirahama, Suku wa sumuluisa omõlaye Isake. Isake wa tumãla ko Bere-lahai-roi.

¹² Alo o-o apata a Isameli, omõla a Avirahama una Hagare u Egito, ufeko wa Sara, a cita ku Avirahama.

¹³ Olonduko viomãla va Isameli poku luka kuavo ndeci va likuama koku citiwa vievi: Nuñulu ya Isameli Nevayoti, kuenda Kedare, Adivele, Mivisama,

¹⁴ Misima, Duma, Masa,

¹⁵ Hadade, Tema, Yeturi, Nafisi la Kedema.

¹⁶ Ovo omãla va Isameli, kuenda ovio olonduko viavo lovaimbo avo lovilombo viavo ekui liolombuale kolombuale vivali, kapata avo.

¹⁷ Anyamo vomuenyo wa Isameli a soka locita kakui atatu kanyamo kanyamo epanduvali. Wa tula omuenyo, wa fa, kuenje wa enda ku va so yaye.

¹⁸ Ofeka yavo ya kala tunde ko Havila toke ko Suri, kongave ya Egito, vofeka yimba ovaso ka Asuria. Wa litungila konele ya vangandiaye vosi.

¹⁹ Alo o-o apata a Isake omõla a Avirahama. Avirahama wa cita Isake.

²⁰ Isake wa tẽla akui akuãla kanyamo eci a kuẽla ukãi waye Rebeka, omõla a Betuele u Arama, kuna ketapi lia Arama, mukãi wa Lavane u Arama.

²¹ Isake wa likutililila ku Yehova ukãi waye, omo wa kala osiũle. Yehova wa tava kohutililo yaye kuenje ukãi waye Rebeka we mina.

²² Omãla vaco va liyakela vimo liaye, yu wa linga hati, Nda oco ci kasi ame ñala ndeti? Oco wa enda oku ci pula ku Yehova.

²³ Yehova wa popia laye hati, Olofeka vivali vi li vimo liove. Apata avali o cita a litepa. Epata likuavo li pama ca lua, likuavo li sule. Ukulu wendamba o vumba umãlehe.

²⁴ Eci oloneke viaye vioku cita via pitila oco vimo liaye mua kala olonjamba.

²⁵ Omõla watete eci a tunda, etimba liaye liosi li kusuka ndocikutu cocipa; oco vo luka Esau.

²⁶ Noke manjaye wa tunda, kuenje eka liaye lia kuatelela kocisendemãi ce Esau; oco vo luka Yakoba. Isake wa kala lakui epandu kanyamo eci Rebeka a va cita.

²⁷ Eci omãla va kula, Esau wa linga enyanga, ukuosenge. Yakoba eye embombe, ocimbakoko.

²⁸ Isake wa sola Esau momo wa lialia olositu viaye. Rebeka wa sola Yakoba.

²⁹ Eteke limue, eci Yakoba a kala loku teleka ombelela, Esau weya, wa tiuka kusenge, wa lambuka.

³⁰ Esau wa popia la Yakoba hati, Nyiheko kamue okambelela aka ka kusuka, momo nda lambuka. Oco vo lukila Edome.

³¹ Yakoba wa linga hati, Tete ndandise unuñulu wove.

³² Kuenje Esau wa kumbulula hati, Ota, nda lunga lokufa, unuñulu waco hẽ, u sumũluisa ndati?

³³ Yakoba wa linga hati, Likuminya lame tete. Yu wa likuminya laye kuenje wa landisa unuñulu waye ku Yakoba.

³⁴ Yakoba wa iha Esau ombolo lombelela yohale, kuenje Esau wa lia, wa nyua, wa katuka, wa enda. Omo Esau a sepula unuñulu waye.