EFETIKILO 23 - Embimbiliya - Bíblia Sagrada em Umbundu

¹ Sara wa kala lomuenyo ocita lakui avali kanyamo kanyamo epanduvali; ovo ovanyamo omuenyo wa Sara.

² Kuenje Sara wa fila vimbo lia Aramba, hailio Hevirone, vofeka ya Kanana. Avirahama weya oku lila Sara loku litetela.

³ Avirahama yu wa votoka kuna a lilila ukuluwiya, wa popia la va Hiti, hati,

⁴ Ame ndulungi, haime ndukombe pokati kene; nyihi aleva ovilangu pokati kovilangu viene, ñendemo wange nda fisa.

⁵ Va Hiti va tambulula Avirahama vati,

⁶ A cime cetu, tu yevelele ño. Ove vumbuale yinene pokati ketu. Eyambo liosi lia velapo kayambo etu omo o kenda wove wa fisa; lomue pokati ketu o ku limĩla eyambo liaye hu kendimo wove wa fisa.

⁷ Avirahama wa votoka, wa petamẽla ku va Hiti,

⁸ wa vangula lavo hati, Nda vu kasi lutima okuti ñenda wange nda fisa, njeveleli ño. Ka mingili ku Efirone, omõla a Soyara,

⁹ okuti o nyiha eleva lia Makapela, lia tiama kokuaye; li kasi kulilo wusenge waye. A li ndandisile kovaso ene londando ya sunguluka ha li lingi ovilangu viange.

¹⁰ Eye Efirone wa tumãla pamosi lomãla va Hiti, kuenje Efirone u Hiti wa tamulula Avirahama, okuti va Hiti la vosi va iñaila vombundi yimbo liaye va ci yeva, hati,

¹¹ Kotoko, a cime cange, njevelele ño. Usenge hu iha, leleva li kasimo, laliovo hu liha, hu wihila kovaso omãla vepata liange. Kendamo wove wa fisa.

¹² Avirahama yu wa petamẽla komanu vakuafeka,

¹³ wa popia la Efirone lomanu vakuafeka va ci yeva hati, Omo muẽle, puãi ndinge ohenda, njevelele. Feta olombongo viusenge. Va vi tambule ño, oco ñendamo wange nda fisa.

¹⁴ Efirone yu wa tambulula Avirahama hati,

¹⁵ A cime cange njevelele ño. Usenge wovita vikuãla violosiekele viopalata u linga hẽ nye pokati kange love? Kenda ño wove wa fisa.

¹⁶ Avirahama yu wa tava kondaka ya Efirone, kuenje Avirahama wa pesalela Efirone olombongo vina a tukuila ku va Hiti, Okuti ovita vikuãla violosiekele viopalata, evi va fũla fũla lavio.

¹⁷ Oco usenge wa Efirone u kasi ko Makapela, kuna kutundilo wa Mamire okuti usenge, kuenda eleva lia kalamo, loviti viosi via kala vusenge wosi, cosi ca landisiwa

¹⁸ ku Avirahama. Ca landisiwila kovaso a va Hiti, la vosi va iñaila kombundi yimbo liaye.

¹⁹ Kovaso yovina viaco Avirahama wa kenda ukãi waye Sara veleva liovusenge wo ko Makapela kutundilo wa Mamire, halio Hevirone, vofeka ya Kanana.

²⁰ Usenge leleva lia kalamo, via landisiwa ku Avirahama la va Hiti, ha vi lingi ovilangu viaye.