EFETIKILO 22 - Embimbiliya - Bíblia Sagrada em Umbundu

¹ Kovaso yovina evi Suku wa seteka Avirahama; wa popia laye hati, A Avirahama. Leye hati, Ame ulo.

² Yu wa linga hati, Kuende lomõlove wongunga, Isake, una o sole; kuende laye kofeka ya Moriya, ko lumbe ocilumba coku pia elisi kilu liomunda yimue hu yi tukuila.

³ Avirahama yu wa pasuka ociteketeke, wa mãlehisa ocimbulu caye, wambata vamue vavali pakuenje vaye, kuenda omõlaye Isake; wa tiaña olohui viocilumba coku pia elisi, wa katuka, wa enda okundeti Suku wo sapuila.

⁴ Keteke liatatu Avirahama wa petula ovaso aye, wa muĩla kupãla omunda ya tukuiwa.

⁵ Oco Avirahama wa popia lakuenje vaye hati, Ene siali palo locimbulu;; ame lumãlehe tu amako toke okondoto; tu ka fendela, noke tu tiuka vali kokuene.

⁶ Avirahama wa yelula olohui viocilumba coku pia elisi, wa vi tuika omõlaye Isake; eye wa yenjeka peka liaye ondalu lomoko yaco; kavali kavo va endela pamosi.

⁷ Isake wa pula isiaye Avirahama hati, A tate. Eye wa linga hati, Ame ulo amõlange. Yu wa linga hati, Ondalu yeyi kuenda olohui; okameme kocilumba coku pia elisi hẽ, ka kasi pi?

⁸ Avirahama wo kumbulula hati, Suku o livanjela okameme kocilumba caye, amõlange. Kuenje va endela pamosi kavali kavo.

⁹ Va pitila okundeti Suku o sapuila. Avirahama wa tunga utala, wa kapako olohui, yu wa kuta omõlaye Isake, wo langeka kutala kilu liolohui.

¹⁰ Avirahama wolõla eka liaye; wa nyañula omoko oku ipaya omõlaye.

¹¹ Omunga ya Yehova kilu yo vilikiya yiti, A Avirahama, a Avirahama. Eye hati, Amilo.

¹² Yiti, Ku koluĩle omõla eka liove. Ku ko linge vali cimue. Ocili cilo ndimbuka okuti wa sumbila Suku, kuenje kua nimĩlile omõlove wongunga.

¹³ Avirahama wa petula ovaso, wa vanja, kuenje wa mõla ocitupi comeme konyima yaye, ca lisaka apamba aco kolosongo vienganji. Kuenje Avirahama wa endako, wa kuata ocitupi caco, wa ci lumba ocilumba coku pia elisi ca piñala pomangu yomõlaye.

¹⁴ Oco Avirahama wa lukako onduko hati, Yehova-yire, ca lomboloka citi Suku o miusa. Haico ci popiwa toke ketaili lilo, citi, Vomunda ya Yehova, Yehova o muisa.

¹⁵ Omunga ya Yehova kilu ya vilikiya vali onjanja yavali Avirahama,

¹⁶ yiti, Nda lisinga lomuenyo wange muẽle, ca popia Yehova ceci, hati, Omo wa linga elinga eli okuti kua nimĩlile omõlove wongunga,

¹⁷ oco ame hu sumũlũisa cocili. Nduisa ombuto yove ndolombungululu viokilu, pamue ndeseke li kasi pongongo yokalunga, kuenje ombuto yove yi piñala olombundi vianyali vavo.

¹⁸ Olofeka viosi viokilu lieve vi sumũlũhila kombuto yove momo wa pokola kondaka yange.

¹⁹ Avirahama yu wa tiukila kakuenje vaye, kuenje va katuka, va endela pamosi toke ko Bereseva, kuenje Avirahama wa tumãla ko Bereseva.

²⁰ Oco kovaso yovina evi kueya ava va sapuila Avirahama vati, Ocili, Milika leyevo wa cita omãla ku manjove Nahore;

²¹ Usi nuñulu yaye, Busi manjaye kuenda Kemuele so ya Arama,

²² la Keseti, Haso, Pilidasi, Yidilafa la Betule.

²³ Betule yu wa cita Rebeka. Ecẽlala liaco Milika wa va cita omãla ku Nahore, manja a Avirahama.

²⁴ Lukama waye, onduko yaye Reuma, leyevo wa cita Teva, Gahame, Tahasi la Mayaka.