EFETIKILO 21 - Embimbiliya - Bíblia Sagrada em Umbundu

¹ Yehova yu wa pasula Sara ndomo a popia kuenje Yehova wa lingila Sara ndomo a likuminya.

² Sara yu we mina, wa citila Avirahama omõla ulume kukongo waye, kotembo yina Suku a tukuilile.

³ Avirahama yu wa luka omõla wo citiwila, una a cita la Sara, hati, Onduko yaye Isake.

⁴ Oco Avirahama wa seva evamba omõlaye Isake eci a tẽla oloneke ecẽlãla, ndeci co sapuila Suku.

⁵ Avirahama yu wa tẽlisa ale ocita canyamo eci a cita omõlaye Isake.

⁶ Kuenje Sara wa popia hati, Suku wa njolisa muẽle vosi va ci yeva va laika oku njola.

⁷ Kuenje wa linga hati, Elie wa sima oku popia la Avirahama hati, Sara o nyamisa omãla? Haimo ndo citila omõla ulume kukongo waye.

⁸ Omõlaco yu wa kula, wa sumũha; kuenje Avirahama wa linga okulia kua lua eteke va sumũla Isake.

⁹ Puãi Sara wa mõla omõla a Hagare u Egito, una a cita la Avirahama, wa yola epembe.

¹⁰ Yu wa popia la Avirahama hati, Tundisa ukama lomõlaye, momo omõla ukama ka lingi kapiñala kove lomõlange Isake.

¹¹ Ondaka eyi, Avirahama yo puiya cimue omo wa sola omõlaye.

¹² Suku yu wa popia la Avirahama hati, Ka ci ka ku puiye ño ndaño o sole omõlaco, kuenje o sole ukama wove. Cosi ca popia love Sara tava ño kondaka yaye; momo ku Isake ku tukuiwilua ombuto yove.

¹³ Leyevo, omõla vukama, ndu lingisa ofeka, momo leyevo ombuto yove.

¹⁴ Avirahama yu wa pasuka ociteketeke, wa yelula ombolo lonjeke yovava, wa vi eca ku Hagare, wo vi tuika kocitãi, yu wo tundisa lomõla. Kuenje Hagare wa tunda, wa tungayala vekalasoko lia Bereseva.

¹⁵ Eci ovava vonjeke a puamo, oco wa langeka omõla vemẽhi liocisapa cimue,

¹⁶ kuenje wa enda, wa litumãlela okacivanja lomõla, ca soka ndoku imba usongo lohonji; momo hati, Si ka mole okufa kuomõla. Osimbu a tumalela okacivanja, oco omõla wa kaluka oku lila.

¹⁷ Suku yu wa yeva ondaka yomõla. Omunga ya Suku kilu ya vilikiya Hagare yiti, Nye ca ku sumuisa a Hagare? Ku ka yokoke ño. Suku wa yeva uteto womõla pana a kasi.

¹⁸ Katuka, petula omõla, ko kuate peka liove, momo ho lingisa ofeka yinene.

¹⁹ Oco Suku wa patulula ovaso aye, yu wa mõla ocisimo covava kuenje wa endako, wa yukisa onjeke lovava, yu wa nyuisa omõlaye.

²⁰ Suku wa kala lomõla, kuenje omõla wa kula, wa tunga vekalasoko. Wa linga enyanga.

²¹ Wa tunga vekalasoko lia Parane. Inaye wa ko kuelelele ukãi ukuafeka ye Egito.

²² Kotembo yaco Avimeleke la Fikoli, kesongo liovita viaye, va popia la Avirahama vati, Suku o kasi love kovina viosi o lingainga;

²³ oco lisinga vonduko ya Suku okuti ku ñembi ame, ndaño omõlange, ndaño onekulu yange; puãi ndeci nda ku linga ove ohenda haico ove o ndinga ame ohenda, loku lingavo ohenda ofeka wa tumãlamo ndulungi.

²⁴ Avirahama yu wa popia hati, Ndi lisinga.

²⁵ Eci Avirahama a lisiosuĩla ku Avimeleke ondaka yocisimo covava ovakuenje va Avimeleke vo ci nyehã,

²⁶ oco Avimeleke wa linga hati, U wa ci linga siu wi; lovevo kua ci sapuilile; ame sia ci yevele mbu toke etaili.

²⁷ Avirahama yu wa senga olomeme lolongombe, wa vi eca ku Avimeleke kuenje va lisila ocisila, kavali kavo.

²⁸ Oco Avirahama wa tepapo otumeme epanduvali tuotumange, ha tu likalela.

²⁹ Avimeleke yu wa popia la Avirahama hati, Otumeme otuo epanduvali, tu likasilili, tua lomboloka nye?

³⁰ Eye hati, Nda soka siti, Otumeme otu epanduvali o tu tambula peka liange hu njimbila uvangi okuti ame nda fẽla ocisimo cilo.

³¹ Oco a lukila onduko yusenge waco hati, Bereseva, momo oko va lisingila kavali kavo.

³² Va lisila ocisila ko Bereseva. Oco Avimeleke la Fikoli, kesongo liovita viaye, va katuka, va tiukila kofeka ya va Filisiti.

³³ Kuenje Avirahama wa kũla uti ko Bereseva; wa likutililako vonduko ya Yehova, Suku ka pui.

³⁴ Avirahama yu wa tumãla vofeka ya va Filisiti oloneke via lua.