EFETIKILO 2 - Embimbiliya - Bíblia Sagrada em Umbundu

¹ Oco ilu losi lovina viosi vi kasimo via malusuka oku lulikiwa.

² Eteke liepanduvali ocu Suku a malusula upange waye a linga; yu wa puyuka eteke liepanduvali kupange waye wosi a linga.

³ Suku yu wa sumũluĩsa eteke liepanduvali hã ha li kolisa; momo eteke liaco olio a puyuka kupange waye wosi a linga woku sovola.

⁴ Alo o-o apata vilu losi eci a sovuiwa. Eteke Yehova Suku a lulika osi lilu,

⁵ oco vongongo ka mua kaile handi ocikũla, ndaño ovikũla viovusenge ka via tundile handi; momo Yehova Suku ka lokisile handi ombela kilu lieve, ndaño omunu o lima osi ka kua kaile.

⁶ Ombundu, oyo like ya tunda tunda posi ha yi yulaisa kuosi kilu liongongo.

⁷ Oco Yehova Suku wa tunga omunu leve lioposi, yu wo fuimĩla ofela yomuenyo vanyulu aye, kuenje omunu wa kuata omuenyo.

⁸ Yehova Suku yu wa kũla ocumbo ve Edene lia kala kutundilo; omo a kapa omunu a sovola.

⁹ Posi Yehova Suku wa kũlĩsapo oviti viosi via posoka oku vi tala, haivio vi tava oku liako. Vokati kocumbo wa kapamo uti womuenyo kuenda uti woku kulĩhĩsa eci ciwa leci cĩvi.

¹⁰ Olui lua tunda ke Edene oku tapela ocumbo; oku tunda kocumbo lua litepa ha lu lingi olondui vikuãlã.

¹¹ Onduko yolui luatete Posone; oluo lua ñualã kofeka yosi ya Havila kuna kuli ulu;

¹² ulu wofeka yaco uwa; mulivo ekokoto lovawe a berilo.

¹³ Onduko yolui luavali Gihone; oluo lua ñuala kofeka yosi ya Kusi.

¹⁴ Onduko yolui luatatu Ketekele; oluo lua pita konano ya Asuria. Olui luakuãla oluo Ferati.

¹⁵ Yehova Suku wa nyañula ulume wo kapa vocumbo ce Edene ha ci limi loku ci tata.

¹⁶ Yehova Suku wa handeleka ulume hati, Oku lia ci tava oku lialia koviti viosi viokocumbo;

¹⁷ te lika uti woku kulĩhĩsa eci ciwa leci cĩvi, owo ka ci tava oku liako, momo eteke o liako haico o fa.

¹⁸ Kuenje Yehova Suku wa linga hati, Ulume oku kala ño lika waye haciwako; ndu lulikila oñuatisi a sesemẽla.

¹⁹ Yehova Suku wa tunga leve lioposi ovinyama viosi viovusenge, lolonjila viosi viovilu; yu wa vi nena kulume ha tali omo a vi luka; kuenje onduko ulume a luka layo ocendalomuenyo cosi, haiyo ya linga onduko yaco.

²⁰ Oco ulume wa luka olonduko viovinyama viosi viovimbo, lolonjila viovilu, lovinyama viovusenge; puãi oñuatisi ulume a sesamela ka kua kaile.

²¹ Oco Yehova Suku wa pekelisa ulume otulo tuelume; kuenje osimbu a pekela wopa lumue kolomati viaye, lapa lua tunda wa sitikapo lositu.

²² Olumati luaco Yehova Suku opa kulume wa lu tunga ukãi yu wo nena kulume.

²³ Oco ulume wa linga hati, Ukãi u, eye ekapa liakepa ange, haeye ositu yositu yange; o tukuiwa ukãi momo wopiwa kulume.

²⁴ Oco ulume o sia isiaye la inaye hã ha litokeka lukãi waye, kuenje va linga etimba limuamue.

²⁵ Kuenje lulume lukãi waye kavali kavo va kala ño epõlõla; osõi ka va kuatele.