EFETIKILO 19 - Embimbiliya - Bíblia Sagrada em Umbundu

¹ Olomunga vina vivali via pitila ko Sodoma koñolosi. Lote wa tumãla vombundi ya Sodoma. Eci Lote a va mõla, oco wa katuka, wa enda oku ñualẽhela lavo, wa petamẽla posi.

² Yu wa popia hati, Ewa a vacime cange, ndo pambukili vonjo yukuenje wene. Ndo lalimo loku sukula olomãi viene, oco omẽle vu pasuka ociteketeke ha wendi onjila yene. Ovo vati, Kotoko, tu lala ño vokololo.

³ Puãi wa va peya ca lua, kuenje va pambuka, va iñila vonjo yaye; yu wa va telekela okulia, wa va yokela otumbolo ka tu kuete etumbisa, kuenje va lia.

⁴ Eci ka va pekelele handi, oco ovalume vakuimbo ndokuti va Sodoma, lamãlehe, lakulu vendamba, omanu vosi vokolonjango viosi, va ñuala konjo.

⁵ Va vilikiya Lote vati, Alume veya kokuove oñolosi yilo va kasi pi? Va nena kokuetu oco tu va kũlihe.

⁶ Oco Lote wa tundila posamua, wa yila epito ocinyimaime,

⁷ yu wa popia lavo hati, Ene akuetu ko ka lingi ño evĩho.

⁸ Tala, ame ñasi lomãla vavali vakãi ka va la kũliha ulume, ndi va eca kokuene ho lingi lavo ndeci wa pangi. Puãi alume ava, ko ka va lingi cimue cĩvi, momo veya oku singa vonjo yange.

⁹ Ovo vati, Tundako. Va popia vati, Undeti weya mulo ukombe, cilo o yongola oku linga onganji! Kaliye ũvi tu ku linga ove u velapo, ũvi tu va linga ovo u sule. Kuenje va sindika Lote longusu ya lua, veya oku teya epito.

¹⁰ Puãi alume va kala vonjo volola ovoko avo, va kokela Lote vonjo, kuenje va yika epito.

¹¹ Yu wa imba ociteke alume va kala kuvelo wonjo, ava vatito lava vanene, okuti va likavisa loku sandiliya uvelo.

¹² Akombe va popia la Lote vati, Helie vali o kasi love mulo? Olondatembo, lomãla vove valume, kuenda omãla vove vakãi, la vosi vove va kasi mulo vimbo, va tundemo.

¹³ Momo tu nyõla imbo lilo omo eyuala liavo ku Yehova lia piãla enene, kuenje Yehova wa tu tuma oku li nyõla.

¹⁴ Lote yu wa tunda, wa pañinya olondatembo viaye vialume, ava va si oku kuẽla omãla vaye vakãi, hati, Katuki, mulo tundimo, momo Yehova o nyõla imbo lilo. Puãi kolondatembo viaye ca soka ndesevu.

¹⁵ Eci kua ca omele olomunga via veta onjanga Lote, viti, Katuka, ambata ukãi wove, lomãla vove akãi vavali va kasi kulo, sanga o pia longole yimbo.

¹⁶ Eye haimo wa simũlapo; ovalume va kuata peka eye muẽle Lote, lukãi waye, lomãla vaye vavali vakãi, momo Yehova wo kuatela ohenda, kuenje vimbo vo wupamo, vo talamisa kofeka konẽle yimbo.

¹⁷ Eci va va tundisila kofeka oco va popia vati, Tila, popela omuenyo wove; ku ka vanje konyima; ku ka talame ketapi; tilila komunda, sanga o pia.

¹⁸ Lote yu wa popia lavo hati, Oco hacoko, a vacime cange.

¹⁹ Tala, ukuenje wene wa sanga ohenda kokuene. Wa ndingi ohenda ya lua oku popela omuenyo wange. Ame si tẽla oku tilila kolomunda sanga ekundu li sanga kuenje ndi fa.

²⁰ Tala, imbo olio li kasi ocipepi, hailio litito, oko ci tava oku tilila. Nda o tava, oko mulukila handi —halititoko hẽ?— oco omuenyo wange u popeliwa.

²¹ Yu wo kumbulula hati, Ci tava, hu lingavo ohenda eyi okuti si kundula vali imbo oliondoto wa tukula.

²² Yayulako, tililako, momo si tẽla oku linga cimue te wa pitilako. Oco va lukila imbo liaco vati, Soyara.

²³ Ekumbi lia tunda ale eci Lote a pitila ko Soyara.

²⁴ Yehova yu wa lowila vo Sodoma lovo Gomora ofuofuo londalu via tunda kilu ku Yehova;

²⁵ yu wa kundula ovaimbo aco, letapi liaco liosi, lolonungi viovaimbo aco, lovikũla viosi vioposi.

²⁶ Ukãi waye wa kala konyima yaye, puãi wa vanja konyima kuenje wa linga ongunji yomongua.

²⁷ Avirahama wa enda ociteketeke kuna a talamele kovaso a Yehova.

²⁸ Yu wa vanja ko Sodoma loko Gomora lokofeka yosi yetapi liaco, kuenje owisi wofeka yaco wa londa kilu ndowisi wofolono.

²⁹ Oco eci Suku a nyõla ovaimbo oketapi, Suku wa ivaluka Avirahama. Wa tundisa Lote pokati kekundu liaco, eci a kundula ovaimbo omu Lote a tungile.

³⁰ Lote wa tunda ko Soyara, wa tunga kolomunda lomãla vaye vavali vakãi, momo wa kuata usumba woku tunga ko Soyara, yu wa tumãla veleva lomãla vaye vavali vakãi.

³¹ Ukulu wendamba wa popia lumãlehe waco hati, Tate wa kuka, kuenje kofeka yosi ka kuli ulume o likuela letu ndeci ca tuwa olofeka viosi.

³² Enju, tu nyuise tate ovinyu, tu pekele laye, oco tu popele ombuto ya tate.

³³ Kuenje va nyuisa isiavo ovinyu uteke waco. Ukulu wendamba yu wa iñilamo, wa pekela la isiaye. Lote ka kũlihile eci a pekela, ndaño eci a pasuka.

³⁴ Hẽla liaco ukulu wendamba wa popia la manjaye hati, Ame nda pekelele ale la tate hẽla; tu ko nyuise vali ovinyu uteke ulo, oco ove wiñilemo, o pekele laye, ha tu popela ombuto ya tate.

³⁵ Kuenje va nyuisa vali isiavo ovinyu uteke waco. Umãlehe waco yu wa enda, wa pekela laye. Lote ka kũlihile eci a pekela ndaño eci a pasuka.

³⁶ Oco omãla va Lote, kavali kavo, va lumbula ovaimo ku isiavo.

^37-38 Ukulu wendamba yu wa cita omõla ulume, wo luka Moavi; eye osekulu ya va Moavi toke etali lilo. Umãlehe waco layevo wa cita omõla ulume; wo luka Benami; eye osekulu yomãla va Amoni toke etali lilo.