EFETIKILO 18 - Embimbiliya - Bíblia Sagrada em Umbundu

¹ Oco Yehova wa limõlehisa ku Avirahama ketumba lia Mamire, eci a tumãla puvelo wombalaka, kowuya wekumbi pongunji.

² Avirahama wa petula ovaso aye, wa vanja yu wa mõla alume vatatu va tãi okacivanja laye. Eci a va mõla wa tunda puvelo wombalaka, wa va lupukila oku ñualẽhela lavo. Wa petamẽla posi,

³ wa linga hati, A cime cange, nda nda sanga ohenda kokuove, ku ka pite ño ombamba ukuenje wove.

⁴ Vo nenelipo otuvava, sukuli olomãi viene, puyukili vemẽhi liuti.

⁵ Ame ndu wupili okambolo okuti vu liupa onjala. Oco ci tava noke oku pitahãla omo weyi kukuenje wene. Ovo vati, Va linge ño ndeci wa popia.

⁶ Avirahama yu wa yolokela kombalaka ku Sara, wa popia laye hati, Tenga lombili oviyongelo vitatu viosema yotiliku, yi kosa, yoka otumbolo.

⁷ Avirahama wa lupukila kocunda, wa kuata onale yongombe ya neta, yi pepa, wa yeca kukuenje leye wa yayulako oku va yi telekela.

⁸ Wa nyañula ongundi lasenjele, lonale a va telekela, kuenje wa va vi tumbikila; yu wa va talamẽla pemẽhi liuti osimbu va lia.

⁹ Ovo va popia laye vati, Sara ukãi wove hẽ, o kasi pi? Eye hati, Ota, yu vombalaka omu.

¹⁰ Eye hati, Ocili njiya vali kokuove kotembo yonjovo, kuenje Sara ukãi wove o cita omõla ulume. Eye Sara wa ci yevela puvelo wombalaka ya kala konyima yaye.

¹¹ Avirahama la Sara, kavali kavo, va kuka, vopopako koloneke. Sara keyaiya vali kocituwa ndeci ca tuwa akãi.

¹² Sara yu wa liyola hati, Eci nda kuka ale, veyange yu leyevo ekongo, ndi mõla vali esanju?

¹³ Yehova yu wa popia la Avirahama hati, Nye Sara a yolela hati, Ocili hẽ nyita vali, ame ndihulukãi?

¹⁴ Kuli hẽ cimue okuti Yehova o ci tokoka? Kotembo ya tukuiwa okuti kotembo yonjovo, ame njiya kokuove, kuenje Sara o cita omõla ulume.

¹⁵ Puãi Sara wa likala hati, Sia yolele, omo wa kuata usumba. Eye hati, Kotoko, wa yola ocili.

¹⁶ Oco alume wa katukapo, va suñamẽla ko Sodoma. Avirahama wa va sindikila loku va lekisa onjila.

¹⁷ Yehova wa popia hati, Nguha nga okuti si sapuila Avirahama eci ndinga?

¹⁸ Momo eye Avirahama o linga muẽle ofeka yinene, haiyo ya pama, kuenje apata osi okilu lieve a sumũlũhila kokuaye.

¹⁹ Hacoko, si uhi, momo ndo nola ale okuti o handeleka omãla vaye la vakuepata liaye vo kuãi, ha va endela vonjila ya Yehova poku linga esunga locili, ndokuti Yehova o lemulũla ku Avirahama eci a lisila laye.

²⁰ Yehova yu wa linga hati, Omo eyuala lia Sodoma la Gomora lia lua, lakandu avo akahandangala,

²¹ oco ndokilako handi, si vanji loku kũlihisa nda vosi va kasi leyuala ndeci lia yevala kokuange. Nda ocili, nda haciliko, ha ci kũlihisa.

²² Ovalume va ñualapo oku enda ko Sodoma; puãi Avirahama pamosi haipo a talama kovaso a Yehova.

²³ Oco Avirahama wa kokela, wa pula hati, Ocili o nyõlela olondingesunga kumue lolondingaĩvi ale?

²⁴ Nda hẽ vimbo muli olondingesunga akui atãlo o li nyõla ño, ku li ecela mekonda liakui atãlo kolondingesunga vi kasimo?

²⁵ Ci kole kokuove oku linga ndomo okuti wipaya ondingesunga kumosi londingaĩvi, kuenje ondingesunga londingaĩvi va lisoka; oco ci kole kokuove! Onganji yoluali luosi hẽ, ka yi lingi esunga?

²⁶ Yehova yu wa linga hati, Nda nda sanga vimbo vo Sodoma akui atãlo kolondingesunga, ngecela imbo liosi mekonda liavo.

²⁷ Avirahama wa tambulula hati, Ame nda lukuta oku vangula la Ñala yange, ame ndineketela haime nditiko.

²⁸ Nda hẽ ku kamba vatãlo kolondingesunga viaco akui atãlo o nyõla imbo liosi momo kua kamba vatãlo? Eye hati, Si nyõli vali nda nda sangamo akui akuãla la vatãlo.

²⁹ Yu wamako loku vangula laye hati, Nda he mu sangiwa akui akuãla? Eye hati, Si nyõli vali nda muli akui akuãla.

³⁰ Yu wa linga hati, Ku ka teme ño, a Ñala yange, oco mopie. Nda he mu sangiwa akui atatu? Eye hati, Si ci lingi vali nda nda sangamo akui atatu.

³¹ Yu wa linga vali hati, Ocili nda lukuta oku vangula la Ñala yange. Nda hẽ mu sangiwa akui avali? Eye hati, Si nyõla vali nda muli akui avali.

³² Haico vali hati, Ku ka teme ño, a Ñala. Mopia vali onjanja yimosi, kua pua. Nda hẽ mu sangiwa ekui? Eye hati, Si nyõli vali ndaño muli ekui.

³³ Yehova yu wa enda eci a mãla oku vangula la Avirahama, kuenje Avirahama wa tiukila koliaye.