EFETIKILO 17 - Embimbiliya - Bíblia Sagrada em Umbundu

¹ Eci Avirama a kala lakui ecea kanyamo ecea, oco Yehova wa limõlehisa kokuaye, wa popia laye hati, Ame ndi Suku Ukuonenewosi. Endaela volonjila viange loku pua evelo.

² Kuenje ndi lisila love ocisila, haime hu luisa enene.

³ Avirama wa wila posi, wa lituvikapo, kuenje Suku wa popia laye hati,

⁴ Ocili, ocisila cange ci kasi love, o linga onjali yolofeka via lua.

⁵ Onduko yove ka vi tukuiwa vali Avirama, yi tukuiwa puãi Avirahama, momo nda ku lingisa kukululu yolofeka via lua.

⁶ Ame hu muisa ombuto ya lua cimue; hu lingisa olofeka; olosoma vi tunda kokuove.

⁷ Ñolisa ocisila nda lisila love lombuto yove yu ku kuãi, kuenda ovitumbulukila viavo, ha ci lingi ocisila ka ci pui. Ndinga Suku yove. Ndingavo Suku yombuto yove yu ku kuãi.

⁸ Kokuove lokombuto yove yu ku kuãi ngeca ofeka omu o kasi loku tuñayala, okuti ofeka yosi ya Kanana, ha yi lingi ocipiñalo ka ci pui. Lame ndinga Suku yavo.

⁹ Suku wa popia la Avirahama, hati, Lava ocisila cange, ove muẽle lombuto yove yu ku kuãi toke kovitumbulukila viavo.

¹⁰ Ocisila cange cokuti oco ndi lisila love lombuto yove yu ku kuãi, haico vu lava, ceci; alume vosi pokati kene va siviwe evamba.

¹¹ Vu seviwila kociyuvuluila cetimba liene; ci linge ondimbukiso yocisila ci kasi pokati kange lene.

¹² Pokati kene, omõla ulume wosi wa tẽla oloneke ecelãla o seviwa. Pokati kovitumbulukila viene, ulume wosi, ci kale onyitiwe yovepata, ci kale u wa landiwa lolombongo kukombe hokuambuto yoveko,

¹³ lu wa citiwa vepata, lu wa landiwa lolombongo viove, vosi va seviwe. Oco ocisila cange ci kala kositu yene, ci linga ocisila ka ci pui.

¹⁴ Ulume ociyamba, ka seviwile kociyuvuluila cetimba liaye, o takumuĩwa kepata liavo; wa sama ocisila cange.

¹⁵ Suku wa popia la Avirahama hati, Ukãi wove Sarai, ku ko tukule vali onduko yaco ya Sarai, te oku u tukola Sara.

¹⁶ Ame ndu sumũlũisa, hu iha omõla ulume o cita la Sara; leye Sara ndu sumũlũisa ha lingi inakulu yolofeka. Olosoma viapata vomanu vi tunda kokuaye.

¹⁷ Oco Avirahama wa wila posi, wa lituvikapo, wa yola kuenje wa litana lutima hati, Omõla hẽ, o citiwa ku o kuete ocita calima? Sara layevo ukuakui ecea kalima o cita?

¹⁸ Oco Avirahama wa popia la Suku hati, Ciwa nda Isameli o mõla esumuluho kokuove.

¹⁹ Suku wa linga hati, Oco hacoko. Sara ukãi wove o ku citila omõla ulume, u luka Isake. Ñolisila kokuaye ocisila cange ha ci lingi ocisila ka ci pui kombuto yaye yu kuama.

²⁰ Kondaka ya Isameli nda ku yevavo. Ocili ndu sumũlũisa, ndu muisavo ombuto loku u luisa enene; ekui lavivali kolombiali vi citiwa laye siu lingisa ofeka yinene.

²¹ Puãi ocisila cange ndi ci kolisila ku Isake, u Sara a cita love, kenyamuali koloneke nda vilo.

²² Eci a mãla oku vangula laye, oco Suku wa enda, Avirahama wa siala.

²³ Avirahama yu wa kuata omõlaye Isameli, lolonyitiwe viosi viepata liaye, kuenda vosi a landa lolombongo viaye, okuti alume vosi vakuepata lia Avirahama, kuenje eteke liaco hailio a va sevisa evamba kociyuvuluila cetimba liavo, ndeci ca popia Suku.

²⁴ Avirahama wa kala lakui ecea kanyamo kanyamo ecea eci a seviwa evamba kociyuvuluila cetimba liaye.

²⁵ Isameli omõlaye wa kala lekui kanyamo kanyamo atatu eci a seviwa evamba kositu kociyuvuluila cetimba liaye.

²⁶ Eteke liongongo wa seviwa evamba Avirahama lomõlaye Isameli,

²⁷ lalume vosi vakuepata liaye, okuti vava va citiwila vepata, lava va landiwa lolombongo kukombe. Vosi yavo va seviwila pamosi evamba.