EFETIKILO 16 - Embimbiliya - Bíblia Sagrada em Umbundu

¹ Sarai ukãi wa Avirama, ka citile laye; eye wa kala lufeko waye u Egito, onduko yaye Hagare.

² Sarai wa popia la Avirama, hati, Tala, Yehova ka nyihile uyali. Litokeka lufeko wange sanga muĩla omãla kokuaye. Avirama yu wa tava kondaka ya Sarai.

³ Eci okuti Avirama o kasi ale vofeka ya Kanana ekui lianyamo, oco Sarai ukãi wa Avirama wa pañinya ufeko waye, Hagare, u Egito, yu wo weca ku Avirama veyaye, ha lingi ukãi waye.

⁴ Yu wa litokeka la Hagare, kuenje we mina. Eci a limbuka okuti we mina, wa pembula ondona yaye.

⁵ Sarai yu wa popia la Avirama hati, Ohali yange yi ku vete ove muẽle. Ufeko wange nda weca vonete yove, leci a limbuka okuti we mina wa membula. Yehova a tetulule pokati kange love.

⁶ Avirama puãi wa popia la Sarai, hati, Ota, ufeko wove o kasi peka liove; linga ño laye eci ca ku sungulukila. Oco Sarai wo talisa ohali, kuenje ufeko wa tila.

⁷ Omunga ya Yehova yo sanga kociva covava vekalasoko, kociva cokonjila yoko Siuri.

⁸ Yu ya popia laye hati, A Hagare, ufeko wa Sarai, wa tunda pi? Wenda pi? Eye hati, Nda tila cime cange Sarai.

⁹ Omunga ya Yehova ya popia laye yiti, Tiukila vali ku cime cove; ka litumbike peka liaye.

¹⁰ Oco omunga ya Yehova yo sapuilavo yiti, Ame nduisa ca lua ombuto yove okuti okulua kuayo ka ku tendiwa.

¹¹ Kuenje omunga ya Yehova ya popia laye, yiti, Ota we mina; noke o cita omõla ulume, u luka Isameli ca lomboloka Suku a yeve, momo Yehova wa yeva ohali yove.

¹² Eye o tuwa ndocisema covusenge; o liyaka yaka lavakuavo vosi, lovo vosi va yaka yaka laye, o tunga pokati kavo vosi.

¹³ Oco Hagare wa luka Suku u wa vangula laye, hati, Ove wu Suku o vanja vanja; momo wa lipula hati, Ocili hẽ okuti nda mõla Suku, kuenje haimo ñasilili lomuenyo?

¹⁴ Oco ocisimo caco ca lukiwa, Cisimo cukuamuenyo o vanja vanja. Ci kasi pokati ka Kadesi la Berede.

¹⁵ Hagare yu wa citila Avirama omõla ulume, kuenje Avirama wa luka omõlaye una Hagare a cita hati, Onduko yaye Isameli.

¹⁶ Avirama wa kala lakui ecẽlãla kanyamo kanyamo epandu eci Hagare o citila omõla Isameli.