EFETIKILO 15 - Embimbiliya - Bíblia Sagrada em Umbundu

¹ Kovaso yovina evi ondaka ya Yehova yeya ku Avirama vocinjonde yiti, A Avirama, ku ka kuate usumba! Ame ndimbetateli yove; onima yove yi lua cimue.

² Puãi Avirama wa linga hati, A Ñala Yehova, o nyiha nye? Ame ngenda ño lusiũle, kuenje u o piñala onjo yange Eliesere u Damasko.

³ Avirama wa linga hati, Kua nyihile ombuto; kuenje upika umue wa citiwila vonjo yange, eye o linga kapiñala kange.

⁴ Ondaka ya Yehova ya yevala kokuaye yiti, U heyeko o linga kapiñala kove, te umue omõlove muẽle woku licitila, eye o linga kapiñala kove.

⁵ Oco wo tundisila posamua, wa popia laye hati, Vanja handi kilu, tenda olombungululu nda o ci tẽla oku vi tenda. Kuenje wo sapuila hati, Haico ci kala ombuto yove.

⁶ Eye wa kolela Yehova kuenje wo ci tendela ndesunga.

⁷ Yu wa popia laye hati, Ame ndi Yehova, haime nda ku upa ko Uri ku wa Kaldea, oku ku iha ofeka yilo okuti o yi piñala.

⁸ Puãi eye wa popia hati, A Ñala Yehova, ndi ci kũliha ndati okuti ndi yi piñala?

⁹ Oco wa popia laye hati, Nenele okanema kanyamo atatu, lokahombo komange kanyamo atatu, lokacitupi kanyamo atatu kuenda onende locivuvu copomba.

¹⁰ Oco wo nenela ovinyama evi viosi; wa vi tola pokati, kuenje wa kapa onele konele yikuavo; otunjila tuaco puãi ka tu towile.

¹¹ Eci olohumbihumbi via lokila kovife viaco, oco Avirama wa vi hanga.

¹² Eci ekumbi lia iñila otulo tuelume tua kuata Avirama, locinjoko ca lua longuele ya lua vio kuatavo.

¹³ Oco Yehova wa popia la Avirama, hati, Kũliha ocili okuti omãla vove va linga akombe vofeka yamãle, haimo va lingila apika, kuenje va talisuilamo ohali ovita vikuãla kanyamo.

¹⁴ Ame puãi misavo ofeka yaco yi va vumbisa, kuenje noke va tundamo lukuasi wa lua.

¹⁵ Ove muẽle wenda kolosekulu viove lombembua, o kendiwa ndekongo lia posoka.

¹⁶ Kocitumbulukila cakuãla oco va tiuka kulo: momo ongole ya va Amori ka ya puile handi.

¹⁷ Eci ekumbi lia iñila, lowelema weya, oco iko lia tunda owisi, kuenda ocitonga ca taima, via pita pokati kovinimbu viaco.

¹⁸ Eteke liaco hailio Yehova a likuminya ohuminyo la Avirama, hati, Tunde kolui lu Egito toke kolui luna lunene Ferati,

¹⁹ va Keni, la va Kenisi, la va Kadimoni,

²⁰ la va Hiti, lava Perisi, la va Refayimi,

²¹ la va Amori, la va Kanana, la va Girigasi, la va Yevusi, ofeka yaco Yosi nda yeca Kombuto yove.