EFETIKILO 14 - Embimbiliya - Bíblia Sagrada em Umbundu

¹ Koloneke via Amirafele, osoma ya Sinare, la Arioke, osoma ya Elasare, la Ketolomeri, osoma ya Elami, kuenda Tidale, osoma yolofeka,

² olosoma viaco via liyaka la Bera, osoma ya Sodoma, la Birisia, osoma ya Gomora, la Sinava, osoma ya Adema, la Semevere, osoma ya Sevomi, kuenda osoma ya Bela ndokuti Soyara.

³ Avandeti vosi va likongela kocimbota ca Sidimi, ndokuti kociva comongua.

⁴ Ekui lianyamo kanyamo avali va vumba Ketolomeri, unyamo wekui latatu oco va linga usuanji.

⁵ Kunyamo wekui lakuãla Ketolomeri weya lolosoma via litokeka laye; wa kundula va Kefayi vo Asitatore-Karinayimi, la va Susimi vo Hama lava Yemi ketapi lia Kiritami,

⁶ la va Hori komunda yavo ko Seire toke ketumba lia Parane li kasi kekalasoko.

⁷ Oco va tiukila ko Simbata ndokuti Kadesi; va kundula ofeka yosi ya va Amaleke kuenda va Amori, vana va tunga ko Hacecone-tamare.

⁸ Kuenje kueya osoma ya Sodoma, losoma ya Gomora, losoma ya Adema, losoma ya Sevomi kuenda osoma ya Bela, ndokuti Soyara, oku liyaka lavo vocimbota ca Sidimi,

⁹ okuti oku liyaka la Ketolomeri, osoma ya Elami, la Tidale, osoma yolofeka, la Amirafele, osoma ya Sinare, kuenda Arioke, osoma ya Elasare, okuti olosoma vikuãla vi yaka lolosoma vitãlo.

¹⁰ Kocimbota ca Sidimi kua kala oviva via lua viekokoto, kuenje osimbu osoma ya Sodoma losoma ya Gomora va tila, vamue va kupukilamo; ava va sialapo va tilila kolomunda.

¹¹ Oco va punda ovikuata viosi via va Sodoma la va Gomora, lovilia viavo viosi va enda lavio.

¹² La Lote, ocimumba ca Avirama, u wa tungile ko Sodoma, vo kuatavo lovikuata viaye, kuenje va enda.

¹³ Umue wa puluka, weya wa ci sapula ku Avirama u Heveru, eci a tumãla ketumba lia Mamire u Amori, manja a Esikole keunda a Anere, momo vakuacisoko la Avirama.

¹⁴ Eye Avirama wa yeva okuti ocimumba caye ca kuatiwa yu wa tunda lovita vitatu kekui lecelãla viakuenje vakuepata liaye haivo va pakisiwa, kuenje wa va landula toke ko Dani.

¹⁵ Oko, pokati kuteke, wa tepisila olohoka viakuenje vaye, kuenje wa va lupuisa, wa va yoluisa toke ko Hoka, ko Norte ya Damasko.

¹⁶ Oco ovikuata viosi wa tiuka lavio kuenda Lote ocimumba caye wa tiukavo laye, lovikuata viaye, lakãi, lomanu.

¹⁷ Eci Avirama a tiuka koku kundula Ketolomeri lolosoma via kala laye, oco osoma ya Sodoma yeya oku ñualehela laye vocimbota ca Siawe, ndokuti ocimbota cosoma.

¹⁸ Kuenda Melikicedeke, osoma ya Saleme, ya nena ombolo lovinyu; eye ocitunda ca Suku Fũ.

¹⁹ Yu wo sumũluisa hati, Avirama a sumũluisue la Suku Fũ, Usovoli wilu losi;

²⁰ Suku Fũ a sivayiwe momo wa eca anyali vove peka liove. Kuenje Avirama wa wiha onepa yekui yovina viosi.

²¹ Soma ya Sodoma wa popia la Avirama, hati, Va nyihe lika omanu; ovikuata kala lavio ove muẽle.

²² Avirama wa kumbulula Soma va Sodoma hati, Nda lisila la Yehova Suku Fũ, Usovoli wilu losi,

²³ siti, Si tambula cimue cove, ndaño elinya limosi, ndaño olunjita, sanga ove o linga huti, Avirama ame ndo muisa ukuasi.

²⁴ Si tambula cimue te eci ca lia akuenje vange, Anere la Esikole la Mamire; puãi vana vaile lame, ovo va tambule olonepa viavo.