EFETIKILO 13 - Embimbiliya - Bíblia Sagrada em Umbundu

¹ Avirama wa tunda ke Egito kumue lukãi waye lovina viosi a kuete kuenda Lote; wa iñila vofeka ya Negembe vo Sul.

² Avirama wa linga ohuasi yinene yovinyama lopalata lulu.

³ Wa endaenda atulo aye tunde kofeka ya Negembe vo Sul toke ko Betele, te kuna kua kala tete ombalaka yaye, pokati ka Betele la Hai,

⁴ toke kuna kua kala utala a tungile tete; oko Avirama a likutilila ku Yehova.

⁵ La Lote le, u wa endaenda kumosi la Avirama, layevo wa fuka olomeme lolongombe, lolombalaka;

⁶ kuenje vofeka ka va suilemo okuti va tunga pamosi, momo ukuasi wavo wa lua, kuenje ka va tẽlele oku kala pamosi.

⁷ Pa kala uyaki pokati kangombo vovinyama via Avirama langombo vovinyama vio Lote. Kotembo yaco va Kanana la va Perisi ovo olonungi viofeka yaco.

⁸ Avirama yu wa popia la Lote hati, Ka pa ka kale ño uyaki pokati kange love, pamue pokati kangombo vange langombo vove, momo etu tusitue.

⁹ Ofeka yosi haeyi, litepa ño lame. Ove nda wilila kepĩli, ame njilila kondio; ove nda wilila kondio, ame njilila kepĩli.

¹⁰ Lote wa petula ovaso aye, wa mõla etapi liosi lioko Yordão okuti kuosi ku kuete ovava; kua soka ndocumbo ca Yehova, pamue ndofeka ye Egito pana poku enda ko Soyara; otembo yaco handi Yehova ka nyolele Sodoma la Gomora.

¹¹ Lote yu wa nolapo etapi lioko Yordão liosi, kuenje Lote wamako lungende waye woku enda kutundilo. Oco va litepa.

¹² Avirama wa tunga vofeka ya Kanana; Lote wa tunga vovaimbo oketapi; wa sondoluila ombalaka yaye ko Sodoma.

¹³ Va Sodoma va kala olondingaĩvi. Va lingaila Yehova akandu a lua.

¹⁴ Eci Lote a litepa laye, oco Yehova a popia la Avirama hati, Talama, petula ovaso ove, vanja ko Norte lo ko Sul kuenda kutundilo lo kutakelo.

¹⁵ Omo ofeka yosi o lete ndeti ndi yeca kokuove lokombuto yove otembo yosi.

¹⁶ Kuenda ombuto yove ndi yi lingisa ndeseke lioposi, ndokuti nda umue o tẽla oku tenda eseke lioposi o tẽlavo oku tenda ombuto yove.

¹⁷ Votoka, nyũla ofeka vusõvi wayo lovupati wayo, momo ndi yeca kokuove.

¹⁸ Oco Avirama wa sondolola ombalaka yaye, kuenje weya wa tumãla ketumba lioko Mamire li kasi vo Hevirone, haiko a tungila utala wa Yehova.