EFETIKILO 12 - Embimbiliya - Bíblia Sagrada em Umbundu

¹ Yehova wa popia la Avirama hati, Tunda vofeka yene lokovangandiove, lokoluse luove, kuende toke kofeka hu yi lekisa.

² Hu lingisa ofeka yinene; hu sumũlũisa; ñemalisa onduko yove okuti omanu va ku sumũlũhila.

³ Ava va ku sumũluisa ndi va sumũlũisa, lu o ku siñala ndu siñala; apata osi oluali a sumũlũhila kokuove.

⁴ Oco Avirama wa katuka ndondaka ya Yehova kuenda Lote wa enda laye. Avirama wa kala lanyamo akui epanduvali kanyamo kanyamo atãlo eci a tunda ko Harane.

⁵ Avirama wa enda lukãi waye Sarai, la Lote ocimumba caye; wambata ovikuata viavo viosi va longeka, kumue lomanu va fukila vo Harane. Va tundako oku enda kofeka ya Kanana. Eci va iñila vofeka ya Kanana,

⁶ oco Avirama wa enda toke wa pitila ketumba lioko Sekeme, kesisi lia Morehi. Kotembo yaco va Kanana oco olonungi viofeka yaco.

⁷ Yehova wa limõlehisa ku Avirama hati, Ame ngeca ofeka yilo kombuto yove. Oco Avirama wa tungapo utala apa Yehova a limõlehisa kokuaye.

⁸ Kuenje wa ilukako; wa enda komunda yi kasi konele yutundilo wa Betele, oko a tamuluila ombalaka yaye, ko Betele kutakelo, ko Hai kutundilo; wa tungako utala ha likutililila ku Yehova.

⁹ Haimo Avirama wa seya seyako atulo, oku enda ko Negembe ko Sul.

¹⁰ Mua kala onjala vofeka yaco. Oco Avirama wa lokila ke Egito ha vongelako momo onjala ya lua vofeka.

¹¹ Eci veya ocipepi loku iñila ke Egito, wa popia la Sarai ukãi waye hati, Tala, ame nda kulĩha okuti ove wukãi wa posoka oku ku vanja.

¹² Eci va Egito va ku mõla, va popia vati, Eye ukãi waye, noke va njipa, kuenje ove o siala lomuenyo.

¹³ Oco ove, sapula huti, Ndimukãi waye, oco va ndinga ciwa kuenje ñala lomuenyo omo va ku sanjukila ove.

¹⁴ Eci Avirama a pitila ke Egito, ve Egito va mõla ukãi waye okuti wa posoka cimue.

¹⁵ Leci olombuale via Fareo vio mõla, oco vio pandiyila ku Fareo, kuenje ukãi wa tualiwa kelombe lia Fareo.

¹⁶ Yu Fareo wa sumũlũisa Avirama omo Fareo wa sola ukãi; kuenje Avirama wa fuka olomeme, lolongombe, lovimbulu, lakuenje, lafeko, lovimbulu violomange kuenda olongamelo.

¹⁷ Yehova puãi wa vetisa Fareo la vakuanjo yaye ovoveyi a kola omo wa tambula Sarai, ukãi wa Avirama.

¹⁸ Oco Fareo wa tumila Avirama, wo pula hati, Eci wa ndinga, nye? Nye kua ci sapuilile okuti eye ukãi wove?

¹⁹ Nye wa popela huti, Mukãi wange, yu ndo tambula ha lingi ukãi wange? Cilo ukãi wove yu, u tambula, kuende laye.

²⁰ Fareo yu wo kundika kovalume vamue kuenje vo sindikila, lukãi waye, lovina viosi a kuete.