EFETIKILO 11 - Embimbiliya - Bíblia Sagrada em Umbundu

¹ Oluali luosi lua kala lelimi limosi lupopi umosi.

² Noke, eci va ilukila kutundilo oco va sanga etapi kofeka ya Sinare kuenje va tungako.

³ Va livangula pokati omunu lukuavo, vati, Enjui, tu tungi atisolo, tu a kanguli ciwa londalu, Kuenje atisolo aco a linga ovawe avo, ohala yaco ekokoto.

⁴ Ovo va linga vati, Enjui, tu litungili imbo; tu tungivo ombonge, utue wayo u pitile kilu; tu kemãlisa onduko yetu sanga tu sandokaila kuosi kilu lieve.

⁵ Yehova yu wa loka oku vanja imbo omãla vomanu va tunga, lombonge yaco.

⁶ Yehova yu wa linga hati, Ota, epata eli limosi, elimi limuamue va kuete pokati kavo vosi; leci efetikilo ño liovina va laika oku linga; cilo ka va tokoka vali cimue va panga oku linga.

⁷ Enjui, tu lokiliko, tu pongoluisi elimi liavo, oco ka va ka liyeve vali omunu lokuavo.

⁸ Oco Yehova wa va sandola; va sandokaila kuosi kilu lieve; kuenje va sandokaila kuosi kilu lieve; kuenje va liwekako oku tunga imbo.

⁹ Oco ombonge yaco va yi luka Bavele, momo oko Yehova a tengisila alimi olofeka viosi, kuenje Yehova wa va sandowaila kuosi kilu lieve.

¹⁰ Alo o-o apata a Semi. Anyamo avali kovaso yetande, eci Semi a kala locita canyamo, oco wa cita Aripasade.

¹¹ Eci a cita Aripasade eye Semi wa kala vali lomuenyo ovita vitãlo kanyamo kuenje wa cita cita omãla valume lomãla vakãi.

¹² Eci Aripasade wa kala lakui atatu kanyamo kanyamo atãlo oco wa cita Sela.

¹³ Eci a cita Sela eye Aripasade wa kala vali lomuenyo ovita vikuãla kanyamo kanyamo atatu kuenje wa cita cita omãla valume lomãla vakãi.

¹⁴ Eci Sela a kala lakui atatu kanyamo oco wa cita Heveru.

¹⁵ Eci a cita Heveru eye Sela wa kala vali lomuenyo ovita vikuãla kanyamo kanyamo atatu kuenje wa cita cita omãla valume lomãla vakãi.

¹⁶ Eci Heveru a kala lakui atatu kanyamo kanyamo akuãla oco wa cita Pelegi.

¹⁷ Eci a ka cita Pelegi eye Heveru wa kala vali lomuenyo ovita vikuãla kanyamo kanyamo akuĩ atatu, yu wa cita cita omãla valume lomãla vakãi.

¹⁸ Eci Pelegi a kala lakui atatu kanyamo kuenje wa cita Reu.

¹⁹ Eci a ka cita Reu eye Pelegi wa kala vali lomuenyo ovita vivali kanyamo kanyamo ecea, yu wa cita cita omãla valume lomãla vakãi.

²⁰ Eci Reu a kala lakui atatu kanyamo kanyamo avali oco wa cita Seruki.

²¹ Eci a ka cita Seruki eye Reu wa kala vali lomuenyo ovita vivali kanyamo kanyamo epanduvali, yu wa cita cita omãla valume lomãla vakãi.

²² Eci Seruki a kala lakui atatu kanyamo oco wa cita Nahore.

²³ Eci a ka cita Nahore eye Seruki wa kala vali lomuenyo ovita vivali kanyamo, yu wa cita cita omãla valume lomãla vakãi.

²⁴ Nahore wa kala lakui avali kanyamo kanyamo ecea kuenje wa cita Terahi.

²⁵ Eci a cita Terahi eye Nahore wa kala vali lomuenyo ocita lekui kanyamo kanyamo ecea kuenje wa cita cita omãla valume lomãla vakãi.

²⁶ Terahi wa kala lakui epanduvali kanyamo kuenje wa cita Avirama, Nahore, la Harane.

²⁷ Alo o-o apata a Terahi. Terahi wa cita Avirama, Nahore, la Harane; Harane wa cita Lote.

²⁸ Eye Harane wa fila kovaso a isiaye Terahi vofeka vo citila, vo Uri ko Kaldea.

²⁹ Avirama la Nahore va kuẽla akãi; onduko yukãi wa Avirama, Sarai; onduko yukãi wa Nahore, Milika, omõla a Harane, isia ya Milika, isia ya Yisika.

³⁰ Sarai wa kala osiule; omõla ka kuete.

³¹ Terahi yu wa enda lomõlaye Avirama, la Lote, omõla a Harane, onekulu yaye, kuenda Sara ndatembo yaye, ukãi womõlaye Avirama; wa tunda lavo vo Uri kofeka yava Kaldea, oku enda kofeka ya Kanana, kuenje veya ko Harane haiko va tunga.

³² Oloneke viosi via Terahi ovita vivali kanyamo kanyamo atãlo; leye Terahi wa fila ko Harane.