EFETIKILO 1 - Embimbiliya - Bíblia Sagrada em Umbundu

¹ Poku fetika Suku wa sovola ilu losi.

² Osi ya kala ño upolokoso, ka mua kaile cimue. Owelema wa sikilĩlĩle ocipala cokalunga. Espiritu lia Suku lia endela kilu liovava.

³ Suku yu wa linga hati, Ku iye ocinyi kuenje ocinyi ceya.

⁴ Suku wa mõla ocinyi okuti ca posoka. Suku wa tepisa ocinyi lowelema.

⁵ Suku wa luka ocinyi hati, Utanya. Owelema wo luka hati, Uteke. Kuenje kua kala oñolõsi, kua kalavo omẽle, eteke liaco olio mosi.

⁶ Suku yu wa linga hati, Pokati kovava pa kale epuluvi, li tepise ovava lovava.

⁷ Suku yu wa lulika epuluvi li tepisa ovava a kala vemẽhĩ liepuluvi liaco, lovava akuavo a kala kilu liepuluvi. Haico ca lingiwa.

⁸ Suku yu wa luka epuluvi liaco hati, Ilu. Kuenje kua kala oñolõsi, kua kalavo omẽle, eteke liaco olio vali.

⁹ Suku yu wa linga hati, Ovava a kasi vemẽhi lilu a likongele pamosi, ongongo yi mõlẽhe. Haico ca lingiwa.

¹⁰ Suku wa luka ongongo hati, Osi. Oku kua likongela ovava wa lukako hati, Okalunga. Suku yu wa ci mõla okuti ca posoka.

¹¹ Suku wa linga hati, Osi yi tunde owangu, lovikũla vimaime olombuto, loviti viapako yimaime apako ndapata avio, omo muli ombuto yaco, vilu lieve. Haico ca lingiwa.

¹² Osi ya tunda owangu, lovikũla via imaima olombuto ndapata avio, oviti viapako vi kuete ombuto yaco ndapata ao. Suku wa ci mõla okuti ca posoka.

¹³ Kuenje kua kala oñolõsi, kua kalavo omẽle, eteke liaco olio tatu.

¹⁴ Suku yu wa linga hati, Ku kale ovinyi kepuluvi liokilu oku tepisa utanya luteke; vi linge olondimbukiso violotembo loloneke lanyamo;

¹⁵ vi linge ovinyi kepuluvi liokilu, hã ha vi taimĩla kilu lieve. Haico ca lingiwa.

¹⁶ Suku yu wa lulika ovinyi vivali vinene, ocinyi ca velapo ci viala kutanya, ci sule ci viala kuteke, wa lulikavo olombungululu.

¹⁷ Suku wa vi kapa kupuluvi liokilu oku tuila kilu lieve,

¹⁸ loku viala kutanya lokuteke hã ha vi tepisa utanya lowelema. Suku yu wa ci mõla okuti ca posoka.

¹⁹ Kuenje kua kala oñolõsi, kua kalavo omẽle, eteke liaco olio kuãla.

²⁰ Suku yu wa linga hati, Vovava mu siate ovitundo vioviendalomuenyo, olonjila vi palãlaile vilu vepuluvi li kasi pokati kilu loposi.

²¹ Oco Suku wa sovola ovimuandu vinene viovokalunga loviendalomuenyo viosi vi litevateva, viosi via siata vovava ndapata avio; lolonjila viosi vi pãlala, ndapata avio. Suku wa ci mõla okuti ca posoka.

²² Suku yu wa vi sumũluĩsa hati, Liciti, siati, yuki vovava okalunga, lolonjila le vi siate kilu lieve.

²³ Kuenje kua kala oñolosi, kua kalavo omẽle, eteke liaco olio tãlo.

²⁴ Suku yu wa linga hati, Kilu lieve kuiye ovinyama ndapata avio, ovinyama viovimbo, lovipuka, lovinyama viovusenge ndapata avio. Haico ca lingiwa.

²⁵ Suku yu wa lulika ovinyama viovusenge ndapata avio, lovinyama viovimbo ndapata avio, lovipuka viosi vi likoka posi ndapata avio. Suku wa ci mõla okuti ca posoka.

²⁶ Suku wa linga hati, Tu luliki omunu ukuacilelembia cetu, ukuesetahãlo lietu hã ha viala kolõsi viovokalunga, lokolonjila viovusenge, lokovinyama viovimbo, lokoluali luosi kuenda kovipuka viosi vi likoka posi.

²⁷ Suku yu wa sovola omunu ukuacilelembia caye, ukuacilelembia caye muẽle Suku a sovola, ulume lukãi wa va sovola.

²⁸ Suku wa va sumũlũĩsa. Suku wa va sapuila hati, Liciti, siati, yukisi oluali, lu yuli, viali kolõsi viovokalunga, lokolonjila viovusenge, lokovinyama viosi vi ñuala ñuala kilu lieve.

²⁹ Suku yu wa linga hati, Tali, ndo wihi ovikũla viosi vi kasi vongongo yosi yokilu lieve, vina vimaima olombuto, loviti viosi vimaima apako a kuete ombuto; vi linge okulia kuene.

³⁰ Ovinyama viosi kilu lieve, lolonjila viosi viovusenge, lovipuka viosi vi likoka posi, vi kuete ofela yomuenyo, okulia kuavio ovikũla viosi vi talala. Haico ca lingiwa.

³¹ Suku yu wa ci mõla okuti ovina viosi a lulika via posoka. Kuenje kua kala oñolosi, kua kalavo omẽle, eteke liaco olio epandu.