DANIELE 9 - Embimbiliya - Bíblia Sagrada em Umbundu

¹ Kulima watete wa Dariu, omõla a Asueru, ukuambuto ya va Media, una wa tumbikiwa Soma yolofeka viosi via va Kaidea, oco,

² kulima waco watete wusoma waye, ame ndi Daniele nda limbuka kalivulu anyamo ana a sesamẽla oku lemũlũla enyolẽho lia Yerusalãi, ndokuti akũi epanduvali kanyamo, ndeci a tukuiwa londaka ya Suku yina yeyile kuprofeto Yeremiya.

³ Oco nda likapela oku vanja ku Yehova Suku, siu sandiliya lalombelo lafelevelo, loku likandangiya okulia loku wala ovikẽlẽyi loku sieketa etiko.

⁴ Nda likutilila ku Yehova Suku yange, nda litavela siti, A Yehova, vu Suku unene haive wa sumbiwa, haive o lemũlũla ocisila lohenda kuava va ku sole loku lava ovihandeleko viove.

⁵ Tua linga ekandu kuenda tua linga olohole. Tuakuevĩho, kuenje tua sina loku pambuka kovihandeleko viove lokoviholo viove.

⁶ Ka tua yevelile akuenje vove ovaprofeto, vana va popia vonduko yove lolosoma vietu lasongui vetu lovakukululu vetu lepata liosi liofeka.

⁷ A Yehova, esunga li tiamẽla kokuove, etu puãi etali lilo osõi yi tu kuta, etu tumanu va Yuda, lava va tunga ko Yersualãi, la va Isareli vosi, ava va kasi ocipepi lava va kasi kupãla pokati kolofeka viosi wa va lupuisilako mekonda liakandu va ku lingila.

⁸ A Yehova, kokuetu ku tiamẽla osõi, kolosoma vietu, lokasongui vetu lokovakukululu vetu, momo tua ku lingila ekandu.

⁹ Ku Yehova Suku yetu ku kuete ohenda longecelo, omo etu tuo sinila,

¹⁰ ka tua pokuile kondaka ya Yehova Suku yetu loku endela vovihandeleko viaye, vina a tu handeleka lakuenje vaye ovaprofeto.

¹¹ Ocili, Isareli yosi ya lueya kovihandeleko viove, loku pambukako, oco ka yi ka pokole kondaka yove. Oco esiñalo lia tu wila lesingo lina lia sonẽhĩwa vovihandeleko via Mose, ukuenje wa Suku, momo tuo lingila ekandu.

¹² Wa linga ndeci a ci popele letu lolonganji vietu via tu viala, kuenje wa tu muisa ohali yimue yinene, okuti kilu lieve liosi lakumue kua lingiwa ndeci ca lingiwa la Yerusalãi.

¹³ Ndeci ca sonẽhĩwa vovihandeleko via Mose, oco ohali yaco yosi ya tu wila. Haimo ka tua lipilikilile ohenda ya Yehova Suku yetu, loku pongoloka kolohole vietu ha tu limbuka ocili cove.

¹⁴ Oco Yehova wa soleka ohali yaco kuenje wa li nena kokuetu, momo Yehova Suku yetu Ukuesunga kovopange aye osi, puãi etu ka tua pokuile kondaka yaye.

¹⁵ Kaliye a Yehova Suku yetu, ove wopa omanu vove kofeka y'Egito leka lia kola kuenje wa limuĩsa onduko ya kemãla, ndomo ci mõlẽha etali; ocili tua linga ekandu, tuakuevĩho.

¹⁶ A Yehova, mekonda leisunga liove lialua, hu pinga okuti onyeño yove loku fungula kuove ku upiwa kimbo liove lia Yerusalãi lokomunda yove yi kola; momo mekonda liakandu etu kuenda mekonda liolohole viavakukululu vetu, Yerusalãi lomanu vove va linga vakuesepu kuava vosi va tu ñuala.

¹⁷ Oco a Suku yetu, yevelela kaliye elombelo liukuenje wove lafelevelo aye; mekonda lionduko ya Yehova, tuisila ocipala cove konjo yove yi kola ya linga epile.

¹⁸ A Suku yange, vongola etũi liove, yeva; patulula ovaso ove, tala kenyolẽho lietu lokimbo lia tukuiwa londuko yove. Momo ka tu likutilila kokuove mekonda liesunga lietu, puãi mekonda liohenda yove yinene.

¹⁹ A Ñala, yeva! A Ñala, ecela! A Ñala, yevelela, linga! Ku ka taluke, mekonda lionduko yove muẽle, a Suku yange, mekonda limbo liove kuenda mekonda liomanu va tukuiwa londuko yove.

²⁰ Nda kala handi loku popia loku lomba loku litavela ekandu liange kuenda ekandu liepata liange va Isareli, loku likutilila ku Yehova Suku yange mekonda liomunda yi kola ya Suku yange.

²¹ Kuenje osimbu nda kala loku popia vohutililo yange, ulume Gabriel, una nda muĩle vocinjonde kefetikilo, weya loku pãlãla lonjanga, yu wa ndamba kowola yocilumba cokekumbi.

²² Wa ndongisa, yu wa popia lame hati, A Daniele, kaliye ndeyilila oku ku avela ukũlĩhĩso.

²³ Kefetikilo liolohutililo viove, ocihandeleko ca eciwa, yu ndeya oku ku sapuila, momo ove wa soliwa calua. Oco sokolola ondaka yaco, loku limbuka ocinjonde caco.

²⁴ Akũi epanduvali kolosemana vianyamo via tukuiwila epata liove kuenda imbo liove li kola, oku sulisa evĩho loku imũla akandu; oku tuvika ohole loku nena esunga ka li pui; oku yika ocinjonde kuenda ocitumasuku loku waveka U o kola koku kola.

²⁵ Oco kulĩha yapa, limbuka okuti tunde poku handeleka oku tumbulula loku tunga Yerusalãi toke pokuiya kua Mesiya, haeye Soma, pa kala olosemana epanduvali kuenda olosemana akũi epandu la vivali. Li tumbuluiwa kumue lolokololo viaco loluvila lua ñuala imbo, puãi kotembo yimue yohali.

²⁶ Kovaso yolosemana akũi epandu lavivali, Mesiya o tepiwako kuenje lomue o kala laye. Oco omanu vosoma yi laika oku iya va nyõla imbo locitumãlo ci kola. Esulilo liaye liya lendunde, kuenje toke kesulilo ku kala ovita, kuenda oku nyõla ndeci kua tukuiwa,

²⁷ kuenje o lisila osemana yimosi ocisila ca kola lomanu valua. Pokati kosemana yaco, imũla ocilumba cosonde leci colomema. Kuenje ukuakunyõla iya lovinyuañi via vĩha toke kesulilo, oco ovina via tukuiwa vi wila ukuakunyõla.