DANIELE 8 - Embimbiliya - Bíblia Sagrada em Umbundu

¹ Kunyamo watatu wondalu ya Soma Belsiatare, ame ndi Daniele nda mõla ocinjonde, kovaso yocinjonde cina nda muĩle ale tete.

² Kuenje vocinjonde caco nda kala velombe lioko Susiana, kofeka y'Elami. Kuenje vocinjonde caco nda limbuka okuti ñasi kolui Ulai.

³ Nda petula ovaso loku vanja, kuenje ota, ocitupi comeme ca kala lolombinga vivali ca talama kocingẽingẽi colui. Olombinga viaco via lepa, puãi yikuavo ya piãla, yikuavo yi sule, kuenda eyi ya lepa haiyo ya sulako oku kula.

⁴ Nda mõla okuti ocitupi ca kala loku toma kutakelo loko Norte loko Sul. Lacimue ocinyama ca tẽla oku liyaka laco, kuenje ka kua kaile umue wa tẽla oku popela cimue peka liaco. Ca linga ño ocipango caco muẽle, haico ca lipanda.

⁵ Osimbu nda kala loku sokolola, ota, ocitupi cohombo ca tunda kutakelo, ca pita koluali luosi puãi ka ca liatele posi. Ocitupi caco ca kala lombinga yinene kupõlo.

⁶ Yu ca suñamẽla kocitupi comeme ca kala lolombinga vivali, cina nda mõla ci tãi kocingẽingẽi colui, kuenje ca cundumũhĩla longusu yaco yosi.

⁷ Kuenje nda ci mõla oku amẽla ocipepi locitupi comeme, yu ca ci kuatela onyeño. Ca puma ocitupi comeme, yu ca teya olombinga viaco vivali, kuenje ocitupi comeme ka ca kaile longusu yoku liyaka locitupi cohombo. Haico ca ci kupuila posi loku ci kosa lolomãi kuenje ka kua kaile umue wa tẽla oku popela ocitupi comeme peka liaco.

⁸ Ocitupi cohombo ca lipanda calua, puãi eci ca linga cinene oco ombinga yaco yinene ya teka. Pomangu yayo pa tundila olombinga vikuãla vinene ca piãla, via imba ovaso kavindi akuãla okilu.

⁹ Kombinga yimue pokati kolombinga viaco, kua tunda ombinga yitito, ya kula calua, haiyo ya imba ovaso ko Sul lokutundilo lokofeka yina ya posoka.

¹⁰ Yu yamako kunene toke kolohoka viokilu. Ya kupuila posi onepa yolohoka viaco lolombungululu, loku vi kosa lolomãi.

¹¹ Yamako kunene toke ku Soma yolohoka, yu yo wupa ocilumba ci taima taima ño-o, kuenje ocitumãlo caye ci kola ca leñuiwa.

¹² Va yĩha olohoka kumue locilumba ci taima taima ño-o, mekonda liakandu. Ocili va ci patuila posi, lombinga yamamako lelau.

¹³ Oco nda yeva umue o kola o kasi loku vangula, kuenda ukuavo o kola wa popia lu o kasi loku vangula hati, Toke otembo yi pi ku lemulũha ocinjonde ci tiamẽla kocilumba ci taima taima ño-o, lokekandu li nyõla, okuti ocitumãlo ci kola kumue lolohoka vi eciwa viosi ha vi kosiwa lolomãi?

¹⁴ Kuenje wa popia lame hati, Toke kolohulukãi vivali lovita vitatu koloñolõsi lokolomẽle. Oco noke ocitumãlo ci kola ci yelisua.

¹⁵ Oco eci ame ndi Daniele nda mõla ocinjonde caco, nda kala loku sokolola hã si ci limbuka. Kuenje ota, kovaso ange kua talama umue wa setãhãla omunu.

¹⁶ Kuenje nda yeva ondaka yomunu pokati kolui Ulai, wa vilikiya hati, A Gabriele, lomboluila omunu u ocinjonde.

¹⁷ Oco wa amẽla apa nda talama, kuenje eci eyapo nda yokoka, yu nda wila posi, nda lituvikapo. Puãi eye wa popia lame hati, Limbuka, amõla omunu, momo ocinjonde eci ci tiamẽla kotembo yesulilo.

¹⁸ Oco, osimbu a kala loku popia lame, nda tuvika ocipala cange posi lotulo tualua. Yu wa ndamba loku nalamisa vilu.

¹⁹ Kuenje wa popia lame hati, Hu situluila eci ci kala kotembo va sulako vonyeño, momo ci tiamẽla kotembo yesulilo, yina ya sokiyiwa.

²⁰ Ocitupi comeme cina wa mõla, ca kala lolombinga vivali, olombinga viaco vivali ovio olosoma via Media la Persia.

²¹ Ocitupi cohombo ca fuakũlũha, oco osoma ya Helasi; kuenda ombinga yinene ya kala kupolo, oyo osoma yatete.

²² Olombinga vikuãla via tunda loku tambula omangu yombinga yina ya teka, ovio ovosoma akuãla a katuka kofeka yaco, puãi halunene wayoko.

²³ Kesulilo liusoma wavo, eci vakuakandu va suapo, oco ku katuka osoma yimue ukuemande haeye ukualumbu.

²⁴ Unene waye u lua puãi halomoko yayeko. O nyõla calua cimue, kuenje amamako lelau loku linga ocipango caye. Haeye o nyõla vakuonene kuenda epata liolosandu.

²⁵ Mekonda lienyango liaye emande liaye liamamako. O lipanda vutima waye loku nyõla valua va kasi vombembua. O katukilavo osoma yolosoma, haimo o teka, puãi halovakako.

²⁶ Kuenje ocinjonde ca lekisua, cina coloñolõsi lolomẽle, oco cocili. Ove puãi, yika ocinjonde caco, momo ci tiamẽla kovaso yoloneke vialua.

²⁷ Oco ame ndi Daniele ongusu ya mua, yu nda kala loku vela oloneke vimue. Noke nda pasuka oku linga upange wa Soma. Nda salukila ocinjonde haimo ka ca ndombolokele.