DANIELE 7 - Embimbiliya - Bíblia Sagrada em Umbundu

¹ Kunyamo watete wa Belsiatare, Soma ya Bavulono, Daniele wa lota onjoi kuenda wa mõla ovinjonde eci a kala pula waye. Noke wa sonẽha onjoi yaco loku sinumũla ovina viaco.

² Daniele yu wa popia hati, Nda mõla ocinjonde kuteke, kuenje ota, olofela vikuãla viokilu via veta okalunga kanene.

³ Kuenje ovinyama vikuãla vinene via tunda vokalunga, yu vi li kasi kasi.

⁴ Catete ca setãhala ohosi, ca kala lavava ongonga. Osimbu nda kala loku vanja oco avava aco a tukũiwa. Ca yeluiwa posi yu ca talamisua lolomãi vivali ndomunu; kuenje va cĩha utima womunu.

⁵ Ota, ocinyama cikuavo cavali ca setãhãla urso, ca yeluka onẽle, ci kuete olomati vitatu vomẽla, pokati kovayo aco. Kuenje va popia laco vati, Katuka, lia ositu ya lua.

⁶ Noke nda vanja, kuenje ota, cikuavo ca setãhãla ongue, ci kuete avava akuãla koñoño, ndonjila. Ocinyama caco ca kalavo lovitue vikuãla; kuenje ca ĩhiwa uviali.

⁷ Kovaso yaco vovinjonde viuteke nda mõla kuenje, ota, ocinyama cakuãla, ci linga usumba, ci yokokisa, haico ca pama cimue. Ca kala lovayo anene utale. Ca Ha, ca nyanyula loku kosa lolomãi ovina via supapo. Ca litepa lovinyama viosi viatete, haico ca kala lolombinga akũi.

⁸ Nda kala loku vanja kolombinga viaco, kuenje ota, pokati kavio pa tundila okambinga kakuavo, kuenje polombinga vina viatete pa tukũiwa vitatu via kala kovaso yokambinga kaco. Kuenje ota, kokambinga kaco kua kala ovaso ndovaso omunu, lomẽla wa popia olonambelo.

⁹ Osimbu nda kala loku vanja, nda mõla ovialo via tumbikiwa, kuenje umue Ukuasimbu wa tumãla. Uwalo waye u yela ndocikokoto kuenda esinga liutue waye ndutele u yela. Ocalo caye ca soka ndilienge viondalu, lalola aco ondalu yi taima.

¹⁰ Kovaso yaye kua tunda olui luondalu. Ohulukãi yolohulukãi vo vumba, ohuluwa yolohuluwa va talama kovaso aye. Ekanga lia yaliwa lalivulu a tuvuiwa.

¹¹ Oco omo liocileñi colondaka violonambelo via popia okambinga nda vanja. Kuenje, ota, osimbu nda kala loku vanja oco ocinyama ca ipaiwa, letimba liaco lia nyõlĩwa, yu lia imbiwa vondalu ha li pi.

¹² Puãi uviali wovinyama vikuavo wa pundiwa, haimo via muĩsua handi omuenyo otembo yimue.

¹³ Nda mõla vovinjonde viuteke, kuenje ota, kovalende okilu kueya umue wa setãhãla omõla omunu. Weya ku Ukuasimbu, kuenje wa lekisua kokuaye.

¹⁴ Kuenje wa ĩhĩwa uviali lulamba kuenda usoma, oco apata osi lolofeka lomanu vakualimi añi añi vo vumbe. Uviali waye ka u pui, ka u piti kuenje usoma waye ka u nyolĩwa.

¹⁵ Kuenje ame ndi Daniele utima wange wa tokotelua vokati kange, lovinjonde nda mõla via saluisa.

¹⁶ Ndamẽla ku umue pokati kava va tãiko, yu ndo pula ocili covina viaco viosi. Oco wa sapuila kuenje wa ndomboluila ovina viaco viosi.

¹⁷ Ovinyama viaco vikuãla vinene ovio olosoma vikuãla vi katuka kilu lieve.

¹⁸ Puãi olosandu via Tõlo vi tambula usoma, haivio vi kala hũ lusoma waco oloneke ka vi pui.

¹⁹ Oco noke nda yongola oku kulĩha ocili cocinyama cakuãla ca litepa la viosi vikuavo, cina ca linga usumba walua, ca kala lovayo utale lolonjala viosipi, haico ca lia, ca nyanyula loku kosa lolomãi ovina via supapo;

²⁰ kuenda oku kulĩha eci colombinga ekũi viokutue waco, la kana kakuavo ka tunda, kuenje vitatu via kupuka kovaso yako, okambinga kana ka kala lovaso, kuenda lomẽla wa popia lolonambelo, kuenda ka mõlẽha ndu ka velapo pokati ka vikuavo.

²¹ Nda mõla kuenje okambinga kaco haiko ka kala loku yaka lolosandu, yu ka vi yula;

²² toke Ukuasimbu weya, kuenje kolosandu via Tõlo kua eciwa omoko yolonganji; haico otembo ya pitila eci olosandu via tambula usoma.

²³ Oco wa popia hati, Ocinyama cakuãla oco usoma wakuãla kilu lieve, haiwo wa litepa lovosoma osi akuavo U ka lia ilu lieve liosi, loku nyanyula.

²⁴ Olombinga ekũi, ovio olosoma ekũi vi katuka kusoma waco, kuenje kovaso yavio ku katuka yimue yikuavo, oyo yi litepa levi viatete, kuenje yi lundula olosoma vitatu.

²⁵ O popia olondaka vioku tomba Tõlo, kuenje o kangisa olosandu via Tolo. Haeye o panga oku pongolola olotembo lovihandeleko, kuenje olosandu vi eciwa peka liaye otembo yimosi lolotembo lonepa yotembo.

²⁶ Puãi ekanga liya, kuenje va ka wupa uviali waye, ha vo nyõli loku u nyanyula olumue.

²⁷ Usoma luviali kuenda unene wovosoma osi vemẽhi lilu weciwa kepata liolosandu via Tõlo. Usoma waye ka u pui, kuenje ovoviali osi o vumba loku pokola kokuaye.

²⁸ Opo pa sulila ondaka yaco. Puãi ame ndi Daniele nda tokotelua calua lovisimĩlo viange, kuenje ocipala cange ca pongoloka. Puãi nda soleka olondaka viaco vutima wange.