DANIELE 6 - Embimbiliya - Bíblia Sagrada em Umbundu

¹ Dariu yu wa panga oku tukuila ovopange uviali ocita lakũi avali kapalanga, ha va kala kolonẽle viosi viofeka.

² Kuenje wa va tukuila asongui vatatu, pokati kavo pa kala Daniele, okuti apalanga va va lekise ovopange avo, oco Soma ka ka sange epese.

³ Daniele yu wa kemãla pokati kasongui lapalanga, momo wa kala lespiritu lia velapo. Kuenje Soma wa sima oku u tumbikila uviali wosi wofeka.

⁴ Oco asongui lapalanga va sanda evelo lioku pindika Daniele londaka yimue yuviali. Puãi ka va muĩle evelo limue, ndaño eko, momo we lipua ka va sangele kokuaye cimue cĩvi ndaño eko.

⁵ Oco alume vaco va popia vati, Ota, ka tu sangi ale evelo ku Daniele u, te nda tu li sanga kovihandeleko via Suku yaye.

⁶ Haico asongui vaco lapalanga va liongoluila ku Soma, yu va popia laye vati, A Soma Dariu, kala hũ lomuenyo.

⁷ Asongui vosi vosoma, la vakalei lapalanga lakulu lolonguluvulu va sokoluila pamosi oku imba oluiya locihandeleko ci kola okuti ka ci tava oku lomba cimue ndaño kosuku ndaño komunu pokati koloneke akũi atatu, te lika kokuove, a Soma; kuenje wosi ka tava a imbiwe veleva liolohosi.

⁸ Kaliye a Soma, kolisa ocihandeleko kuenda kapa onduko yove kocisonẽhua caco, oco ka ci ka pongoloke, ndovihandeleko via va Media la va Persia, vina ka vi pongolowaiwa.

⁹ Oco Soma Dariu wa kapa onduko yaye kocisonẽhua lokocihandeleko caco.

¹⁰ Oco eci Daniele a kulĩha okuti ocisonẽhua ca kolisua, oco wa enda vonjo yaye. Olonjanela viohondo yaye via kala upulule haivio via imba ovaso ko Yerusalãi. Yu wa kekamẽla kolongolo viaye olonjanja vitatu veteke, kuenje wa lomba, loku pandula Suku yaye, ndeci a tuwa oku lingainga.

¹¹ Oco alume vaco va liongolola kuenje va sanga Daniele loku felevela loku likutilila ku Suku yaye.

¹² Oco veya ku Soma, yu va popia laye vati, A Soma, kua kapele hẽ onduko yove kocihandeleko cokuti ka ci tava oku lomba ndaño komunu pokati koloneke akũi atatu, te lika kokuove, u Soma, kuenje wosi ka tava a imbiwe veleva liolohosi? Soma yu wa tambulula hati, Oco, ondaka yaco yocili muẽle, ndovihandeleko via va Media la va Persia vina ka vi pongolowaiwa.

¹³ Yu va tambulula vali Soma, vati, Daniele, una ukuepata liolomandekua vio ko Yuda, ka ku sumbile, a Soma, ndaño ocihandeleko ci kuete onduko yove, puãi o likutilila olonjanja vitatu veteke.

¹⁴ Eci a yeva olondaka viaco, Soma yu wa sumua calua kuenje wa likapela oku popela Daniele; yu wa sakalala ho popela toke ekumbi lia iñila.

¹⁵ Oco alume vaco va liongoluila ku Soma, yu va popia la Soma vati, Wa kulĩha, a Soma, ovihandeleko via va Media la va Persia, okuti lacimue ocihandeleko pamue oluiya lua kolisiwile la Soma lu tẽla oku pongoluiwa.

¹⁶ Oco Soma yu wa handeleka, kuenje va nena Daniele, yu vo wimba veleva liolohosi. Soma yu wa popia la Daniele hati, Suku yove, una o vumbavumba, a ku popele.

¹⁷ Yu va nena ewe kuenje va li kapa kuvelo weleva. Soma yu wa kapako ondimbukiso yaye muẽle, leyi yolombuale viaye, oco lacimue ci pongoluiwe kondaka ya Daniele.

¹⁸ Kuenje Soma yu wa enda kelombe liaye, wa lala ekãha loku likandangiya okulia; ka tavele okuti vo nenela ovisikilo, lotulo tuo tila.

¹⁹ Komẽle, Soma yu wa pasuka ociteketeke yu wa enda lonjanga keleva liolohosi.

²⁰ Eci a pitila keleva, yu wa kovonga Daniele londaka yesumuo. Soma yu wa popia la Daniele hati, A Daniele, vukuenje wa Suku Ukuamuenyo, Suku yove, una o vumbavumba, wa tẽla hẽ oku ku popela kolohosi?

²¹ Oco Daniele wa popia la Soma hati, A Soma, kala hũ lomuenyo!

²² Suku yange wa tuma omunga yaye, wa yika ovimẽla violohosi, kuenje ka via ndingile cimue; momo kokuaye nde lipua; ndaño kokuove, a Soma, sia lingile cimue cĩvi.

²³ Oco Soma wa sanjuka cimue, yu wa handeleka oku upa Daniele keleva. Oco Daniele wopiwa keleva, kuenje lalimue epute vo sanga lalio, momo wa kolela Suku yaye.

²⁴ Soma yu wa handeleka kuenje va nena alume vana va pindikile Daniele yu va va imba veleva liolohosi, ovo muẽle lomãla vavo lakãi vavo. Kuenje osimbu ka va pitilile handi kosi yeleva, olohosi via va kuata loku teya akepa avo osi.

²⁵ Oco Soma Dariu wa sonẽhela apata osi lolofeka lomanu vakualimi añi añi va tunga kilu lieve, hati, Ombembua yu luili!

²⁶ Njimba oluiya luokuti kuviali wosi wusoma wange omanu va lulumĩle Suku ya Daniele loku u sumbila. Momo eye, eye Suku Ukuamuenyo, o kala ño hũ; kuenje usoma waye ka u nyolãha, luviali waye u kala ño hũ toke kesulilo.

²⁷ Eye o popela haeye o yovola; eye o linga ovilimbu lovikomo kilu loposi, haeye wa popela Daniele kunene wolohosi.

²⁸ Oco Daniele u wamamako koku sumũlũha kondalu ya Soma Dariu, lokondalu ya Soma Kuro u Persia.