DANIELE 5 - Embimbiliya - Bíblia Sagrada em Umbundu

¹ Soma Belsiatare wa linga ocipito cinene lohulukãi yolombuale viaye, haeye wa nyuila ovinyu kovaso avo.

² Belsiatare, eci a mãha kovinyu wa tuma oku kopa ovikuata viulu lopalata vina Nevukandesa isiaye opile konembele yo ko Yerusalãi, okuti Soma lolombuale viaye lakãi vaye lovakama vaye va nyuilemo.

³ Oco va nena ovikuata viulu, levi viopalata viopilue vonembele, vonjo ya Suku yi kasi ko Yerusalãi. Kuenje Soma lolombuale viaye, lakãi vaye, lovakama vaye va nyuilamo.

⁴ Va nyua ovinyu kuenda va sivaya olosuku viavo viulu levi viopalata levi viosipi levi viutale levi vioviti kuenda evi viovawe.

⁵ Haico kua mõlẽha ovimuini vieka liomunu, via kala oku sonẽha kovaso yondiyelo, vocimano ca yanguiwa conjo ya Soma. Soma yu wa mõla ovimuini viaco via kala loku sonẽha.

⁶ Oco ocipala ca Soma ca pongoloka kuenda ovisimĩlo viaye vio sakalaisa. Asokoluilo oviongo viaye a señenya kuenda olongolo viaye via livetaveta kumue.

⁷ Soma yu wa vilikiya lolukandi ha vo nenela vakuakusingila la va Kaldea la vakuakutanga olombungululu. Soma wa popia lolonoño via Bavulono hati, Wosi o tanga ocisonẽhua eci loku situluila elomboluilo liaco, o tambula uwalo wohusu, lomota yulu posingo, kuenda omangu yombiali yatatu vusoma.

⁸ Oco olonoño viosi via Soma via iñila. Puãi ka via tẽlẽle oku tanga ocisonẽhua caco, ndaño oku sapuila Soma elomboluilo liaco.

⁹ Oco Soma Belsiatare wa tokotelua calua, kuenda ocipala caye ca pongoloka, lolombuale viaye via sonda.

¹⁰ Oco inakulu wa iñila vonjo yaco yocipito, mekonda liolondaka via Soma levi violombuale viaye. Inakulu yu wa popia hati, A Soma, kala hũ lomuenyo! Ovisimĩlo viove ka vi ka tokotelue ño, ndaño ocipala cove ka ci ka pongoloke.

¹¹ Vusoma wove muli ulume umue okuti o kuete espiritu liolosuku vi kola. Koloneke via so, kulume waco kua sangiwile ocinyi lukulĩhĩso lolondunge ndevi violosuku. Kuenje a Soma, so, Soma Nevukandesa, eye wo tumbikile ndusongui wavakualumbu lavakuakusingila lava Kaldea lavakuakutanga olombungululu.

¹² Momo ku Daniele una Soma a lukile Beltesiatare, kokuaye muẽle kua sangiwa espiritu lia velapo lukulĩhĩso, lolondunge luloño woku lombolola olonjoi loku situlula alumbu loku tetulula olondaka via tĩla. Oco Daniele a kovongiwe, a sapuile elomboluilo.

¹³ Kuenje va nena Daniele ku Soma. Soma yu wa popia la Daniele hati, Ove hẽ Daniele, una ukuepata liolomandekua vio ko Yuda, vana tate, Soma Nevukandesa, opile ko Yuda?

¹⁴ Nda yeva okuti o kasi lespiritu liolosuku, kuenda ocinyi lukulĩhĩso lolondunge via piãla.

¹⁵ Ndopo eci va nena kokuange olonoño lavakuakusingila ha va tangi ocisonẽhua eci loku sapuila elomboluilo liaco. Puãi ka va tẽlele oku situluila elomboluilo liaco.

¹⁶ Nda yeva puãi, okuti ove o tẽla oku lombolola kuenda oku tetulula olondaka via tĩla. Kaliye nda o tẽla oku tanga ocisonẽhua loku sapuila elomboluilo liaco, oco o tambula uwalo wohusu lomota yulu posingo, kuenda omangu yombiali yatatu vusoma wange.

¹⁷ Daniele yu wa tambulula Soma hati, Oviali viove vi kale ño love, lonima yove yi linge yomunu ukuavo! Haimo lumue nangela Soma ocisonẽhua hã siu sapuila elomboluilo liaco.

¹⁸ Ove a Soma, Suku Tõlo wa ecele ku so Nevukandesa usoma lunene lulamba luwale.

¹⁹ Kuenje mekonda liunene a wihĩle, apata osi lolofeka lomanu vakualimi añi añi vo lulumila kuenda vo kuatela usumba. Momo Soma u a panga o wipa, u a panga u muĩsa omuenyo, u a panga u kapa kunene, u a panga u kapa kutito.

²⁰ Puãi eci utima waye wa lipanda kuenda wa tĩlisua lundululu, oco wa kupuiwa kocalo caye, kuenje ulamba waye wo wupiwa.

²¹ Vo tundisa pokati komãla vomanu; utima waye wa linga ndu wovinyama, locitumãlo caye ca kala pokati kovisema viusenge; wa lisua owangu ndolongombe, kuenda etimba liaye lia yula lowume wokilu; toke a limbuka okuti Suku Tõlo o viala ovosoma omanu haeye o vialekapo u a panga.

²² Love a Belsiatare, vumõlaye, kua liketisile kutima wove ndaño wa kulĩha ale ovina viaco viosi.

²³ Wa likapa kunene kovaso a Cime cokilu; va ku nenela ovikuata vionjo yaye kuenje ove lolombuale viove lakãi vove lovakama vove, wa nyuilimo ovinyu; haive wa sivaya olosuku viopalata lulu, levi viosipi levi viutale levi vioviti levi viovawe, vina ka vi lete, haivio ka vi yevite kuenda lacimue via kũlĩha; puãi Suku, una o kuete peka liaye omuenyo wove lolonjila viove viosi, kuo pandiyile.

²⁴ Oco eye wa tuma ovimuine viaco ha vi sonẽha ocisonẽhua eci.

²⁵ Ocisonẽhua caco ceci: MENE, MENE, TEKEL, UFARSIN.

²⁶ Elomboluilo liolondaka evi lieli, MENE, ca lomboloka citi, Suku wa tenda oloneke viusoma wove, kuenje wa wimũla.

²⁷ TEKEL, ca lomboloka citi, wa pesaliwa kombalãsa, kuenje wa lela.

²⁸ PERES, ca lomboloka citi, usoma wove wa tepiwa pokati, kuenje wa eciwa ku va Media la va Persia.

²⁹ Haico Belsiatare a handeleka yu wa walisa Daniele uwalo wohusu, vo kapa omota yulu posingo kuenda va imba oluiya luokuti eye o linga ombiali yatatu vusoma.

³⁰ Uteke waco muẽle, haico Belsiatare, Soma ya va Kaldea, a ipaiwa.

³¹ Kuenje Dariu u Media wa tambula usoma waco. Wa kala lalima akũi epandu lavali.