DANIELE 4 - Embimbiliya - Bíblia Sagrada em Umbundu

¹ Soma Nevukandesa wa tuma kapata osi lokolofeka lokomanu vakualimi añi añi va tunga kuosi kilu lieve hati, Ombembua yu luili!

² Nda sima siti, Ca sungulukila oku lekisa ovilimbu lovikomo Suku Tõlo a ndingila.

³ Ovilimbu viaye via piãla cimue, kuenda ovikomo viaye vinene cimue! Usoma waye owo usoma ko pui, kuenda uviali waye u kala tunde kocitumbulukila toke kocitumbulukila.

⁴ Ame ndi Nevukandesa nda lisanja vonjo yange loku sanjuka velombe liange.

⁵ Nda lota onjoi ya saluisa, kuenje ovisimĩlo nda kala lavio pula wange lovinjonde viutima wange via sakalaisa.

⁶ Oco nda handeleka okuti olonoño viosi vio ko Bavulono viya kokuange ha vi sapuila elomboluilo lionjoi yaco.

⁷ Oco vakualumbu la vakuakusingila la va Kaldea lavakuakutanga olombungululu veya. Nda va sapuila onjoi puãi ovo ka va tẽlẽle oku yi ndomboluila.

⁸ Noke puãi, Daniele weya kokuange, haeye Beltesiatare, oyo onduko yosuku yange. Kokuaye kuli espiritu liolosuku vi kola. Kuenje ndo sapuila onjoi siti,

⁹ A Beltesiatare, osongui wavakualumbu, ndi cĩ okuti espiritu liolosuku vi kola li kasi kokuove, kuenje lalimue elumbu lia tatama kokuove; oco sapuile ovinjonde nda kala lavio vonjoi nda lota, kuenda elomboluilo liaco.

¹⁰ Ovinjonde viutima wange eci nda kala pula wange, vievi, Nda vanja, kuenje ota, kua mõlẽha uti umue pokati kilu lieve, kuenje usõvi waco walua.

¹¹ Uti waco wa kula, wa pama kuenje onumbutue yawo ya pitila toke kilu, yu wa mõlẽha toke kasukiyo o kilu lieve.

¹² Amẽla awo a posoka lepako liawo lia lua, haiwo wa tekula vosi. Ovinyama viusenge via vunda vocilembo cawo, lolonjila viokilu via tunga vovianja viawo, kuenje oviendalomuenyo viosi via tekuiwa lawo.

¹³ Kovinjonde viutima wange eci nda kala pula wange, nda vanja, kuenje ota, kilu kua tunda ondavululi, haeye o kola.

¹⁴ Wa vilikiya londaka ya lua, hati, Timbuli uti, teti ovianja, tutumũli amẽla, sanduli apako; ovinyama vemẽhi liaco vi tilemo, lolonjila kovianja viaco.

¹⁵ Haimo sipo ocisingi lovi viaco, ci kuti lelienge liutale losipi, ci kale vusenge powangu u talala. Ci yule lowume wokilu, ci kale ño vusenge kumue lovinyama, okulia kuaco ku kale owangu wokilu lieve.

¹⁶ Utima waye womunu wu pongoluiwe, kuenje a tambule utima wocinyama. Kuenda olotembo epanduvali viu lomboke.

¹⁷ Episo eli lia kutiwa lolondavululi, kuenda ocihandeleko eci ca tunda kuava va kola, oco vakuamuenyo va limbuke okuti Tõlo o viala kusoma womanu, haeye eca usoma ku a panga, kuenje o vialeka ndaño yu o sule pokati komanu.

¹⁸ Eyi oyo onjoi nda lota, ame ndisoma Nevukandesa. Ove a Beltesiatare, sapuile elomboluilo liaco, omo olonoño viosi viusoma wange ka vi ci tẽla. Ove puãi o ci tẽla, momo kokuove kuli espiritu liolosuku vi kola.

¹⁹ Oco Daniele, haeye Beltesiatare, handi wa saluka kuenje ovisimĩlo viaye vio puiya. Soma yu wa popia laye hati, A Beltesiatare, onjoi lelomboluilo liaco ka vi ka ku puiye ño. Beltesiatare wa tambulula hati, A cime cange, onjoi yi linge yava va ku suvuka kuenda elomboluilo liaco liovanyãli vove.

²⁰ Uti una wa mõla, haiwo wa lepa, wa pama, usõvi waco wa pitila toke kilu kuenda wa mõlẽha kuosi kilu lieve;

²¹ uti waco, amẽla awo a posoka lepako liawo lia lua, haiwo wa tekula vosi, kuenda ovinyama visusenge via vunda vemẽhi liawo lolonjila viokilu via tunga kovianja viawo,

²² uti waco, ove muẽle, a Soma, wa linga unene, haive wa pama. Unene wove walua, wa kula, wa pitila toke kilu kuenda uviali wove wa sambuka toke kasukiyo okilu lieve.

²³ Soma wa mõla ondavululi haeye o kola wa tunda kilu, wa popia hati, Timbuli uti, u nyõli, haimo sipo ocisingi lovi viaco. Ci kuti lelienge liutale, ci kale vusenge powangu u talala. Ci yule lowume wokilu, ci kale ño vusenge kumue lovinyama, toke olotembo epanduvali viu lomboka.

²⁴ Cosi eci a Soma, ondaka ya Tõlo yeya ku cime cange, Soma. Elomboluilo liaco lieli:

²⁵ Ove o tundisua pokati komanu, ocitumãlo cove ci kala pokati kovinyama viusenge, kuenda o lisua owangu ndolongombe. O yula lowume wokilu, kuenda olotembo epanduvali vi ku lomboka, toke o limbuka okuti Tõlo eye o viala kusoma womanu, haeye o weca ku a panga.

²⁶ Ocihandeleko coku siapo ocisingi lovi viaco ca lomboloka okuti usoma u tiukila kokuove eci o limbuka okuti Ukuailu o viala.

²⁷ Oco, a Soma, va tave kelungulo liange. Akandu ove a pue loku linga esunga, kuenda olohole viove vi malusuke loku lingila ohenda olohukũi, oco ombembua yove yameko handi.

²⁸ Ovina evi viosi vieya ku Soma Nevukandesa.

²⁹ Kovaso yolosãi ekui la vivali, wa kala loku ñuala ñuala velombe lio ko Bavulono.

³⁰ Soma yu wa popia hati, Halioko hẽ Bavulono, imbo linene, nda li tunga lomoko yunene wange, ha li lingi ombala yi muisa ulamba usoma wange?

³¹ Osimbu Soma ka mãlẽle vomẽla, oco ondaka ya tunda kilu, yiti, A Soma Nevukandesa, ca popiwa kokuove okuti usoma wa ku tunda.

³² O tundisua pokati komanu, ocitumãlo cove ci kala pokati kovinyama viusenge, kuenda o lisua owangu ndolongombe. Olotembo epanduvali vi ku lomboka, toke o limbuka okuti Tõlo, eye o viala kusoma womanu, haeye o weca ku a panga.

³³ Kowola yaco muẽle haico ondaka ya lemulũha ku Nevukandesa. Wa tundisua pokati komanu kuenje wa lia owangu ndolongombe; etimba liaye lia yula lowume wokilu; toke esinga liaye lia kula ndovonya ongonga, kuenda olonjala viaye ndevi violonjila.

³⁴ Kesulilo lioloneke viaco, ame ndi Nevukandesa nda petuila ovaso kilu kuenje olondunge via njiya vali. Nda tumbangiya Tõlo, yu nda sivaya loku kemãlĩsa Ukuamuenyo ka u pui, momo uviali waye wenda ño hũ, lusoma waye kocitumbulukila lokocitumbulukila.

³⁵ Omanu vosi vokilu lieve hacimueko kovaso aye. Haeye o linga ndeci a panga lolohoka viokilu kuenda pokati komanu vokilu lieve. Kuenje lomue o tẽla oku tateka eka liaye, ndaño oku popia laye hati, O linga nye?

³⁶ Haico olondunge viange via njiya vali. Ulamba wusoma wange, lunene wange, luwale, wa niukila vali. Akulu vange lolombuale viange va sukila vali, yu nda tumbuluiwa vali vusoma wange kuenje unene wulamba wange wa mbokiyiwa.

³⁷ Kaliye ame ndi Nevukandesa sivaya, mandiya, kuenda sumbila Soma yokilu. Momo ovopange aye osi ocili kuenda olonjila viaye viosi viesunga. Eye o tẽla oku kapa kutito ava va endaenda lepela.