DANIELE 3 - Embimbiliya - Bíblia Sagrada em Umbundu

¹ Soma Nevukandesa wa tunga ociñumañuma culu, usõvi waco akũi epandu kovikeya, upati waco ovikeya epandu. Wa ci votuila ketapi lia Dura, kofeka ya Bavulono.

² Soma Nevukandesa yu wa tuma oku ongolola apalanga lovakalei lolonguluvulu lolonganji vinene lasoleki volombongo lasongui vofeka lolonganji lolombiali viosi violofeka, ha va kolisa etumbiko liociñumañuma cina Soma Nevukandesa a tunga.

³ Oco apalanga lovakalei lolonguluvulu lolonganji vienene lasoleki volombongo lasongui vofeka lolonganji lolombiali viosi violofeka va liongoluila oku tumbika ociñumañuma cina Soma Nevukandesa a tunga. Va talama kovaso ociñumañuma ca tungiwa la Nevukandesa.

⁴ Ndaka yu wa kaluka hati, Ene apata osi, alofeka, amanu vakualimi añi añi, co handelekelui ceci,

⁵ Eci vu yeva ocileñi cenguena lolumbendo lohalupa lolumbeta lokalialia loñoma kuenda ovisikilo viñi viñi, wili posi, fendeli ociñumañuma culu ca tungiwa la Soma Nevukandesa.

⁶ Wosi ka wila posi kuenda ka fendela, haico muẽle a imbiwa vokati kelungulungu liondalu vofolono.

⁷ Oco, eci omanu vosi va yeva ocileñi cenguena lolumbendo lohalupa lolumbeta lokalialia kuenda ovisikilo viñi viñi, oco apata osi lolofeka viosi lomanu vakualimi añi añi, haico va wila posi, va fendela ociñumañuma culu ca tungiwa la Soma Nevukandesa.

⁸ Oco koloneke viaco, va Kaldea vamue veya kuenje va pindika va Yuda.

⁹ Yu va popia la Soma Nevukandesa vati, A Soma, kala hũ lomuenyo!

¹⁰ Ove a Soma, wa eca ocihandeleko cokuti vosi va yeva ocileñi cenguena lolumbendo lohalupa lolumbeta lokalialia loñoma va wile posi loku fendela ociñumañuma culu,

¹¹ kuenje nda umue ka wila posi loku fendela, a imbiwe vokati kelungulungu liondalu vofolono.

¹² Kuli alume vamue, va Yuda, wa va tumbika ndakulu kupange wofeka ya Bavulono, Sadrake la Mesake la Aved-Nego. Alume vaco, a Soma, ka va ku sumbile, ka va vumbi olosuku viove, ndaño oku fendela ociñumañuma culu cina wa tungisa.

¹³ Oco Nevukandesa wa tema loku fungula kuenje wa tuma oku kopa Sadrake la Mesake la Aved-Nego, yu va nena alume vaco ku Soma.

¹⁴ Nevukandesa wa popia lavo hati, A Sadrake la Mesake la Aved-Nego, wa likali hẽ locipango, okuti ka vu vumbi olosuku viange ndaño oku fendela ociñumañuma culu nda tungisa?

¹⁵ Kaliye kapeliko. Oco, eci vu yeva ocileñi cenguena lolumbendo lohalupa lolumbeta lokalialia loñoma, vu wila posi loku fendela ociñumañuma nda tungisa. Puãi nda ka vu fendela haico muẽle wimbiwi vokati kelungulungu liondalu vofolono, kuenje helie Suku u popeli peka liange?

¹⁶ Sadrake la Mesake la Aved-Nego va kumbulula vati, A Nevukandesa, ka tu sukila oku ku tambulula kondaka yaco.

¹⁷ Nda oco, Suku yetu una tu vumbavumba o tẽla oku tu popela kelungulungu liondalu vofolono; kuenje haeye o tu popela peka liove, a Soma.

¹⁸ Puãi nda hacoko, haimo ci kulĩhĩwe love, a Soma, okuti ka tu tava oku vumba olosuku viove, ndaño oku fendela ociñumañuma culu cina ove wa tungisa.

¹⁹ Kuenje Nevukandesa we yuka lonyeño, ocipala caye ca funguila Sadrake la Mesake la Aved-Nego. Yu wa handeleka okuti va tokotise fĩ ofolono loku vokiyako vali olonjanja epanduvali.

²⁰ Yu wa handeleka asualali vamue va pama oku kuta Sadrake la Mesake la Aved-Nego loku va imba vokati kelungulungu liondalu vofolono.

²¹ Oco omanu vaco va kutiwa kumue lovikalasãu viavo lotukapote tuavo lolonanga viavo, luwalo wavo wosi, kuenje va imbiwa vokati kelungulungu liondalu vofolono.

²² Omo ocihandeleko ca Soma ca kãla, oco owuya wofolono wakahandangala, okuti ulienge wondalu wa ipa alume vana va imbilemo Sadrake la Mesake la Aved-Nego.

²³ Omanu vaco vatatu, Sadrake la Mesake la Aved-Nego omo va kutiwila haimo va va imbila velungulungu liondalu vofolono.

²⁴ Oco Soma Nevukandesa wa saluka, wa votoka lonjanga. Yu wa popia lakulu vaye hati, Ka tua imbile he alume vatatu vondalu, va kutiwa? Va tambulula Soma vati, Oco muẽle a Soma.

²⁵ Yu wa kumbulula hati, Ota, ndete puãi alume vakuãla va kutuluka, va ñuala ñuala vokati kondalu kuenda va ñuaĩ; kuenda wakuãla yaco o mõlẽha ndomõla olosuku.

²⁶ Oco Nevukandesa wama kuvelo wofolono ya tokota, yu wa popia hati, Ene a Sadrake la Mesake la Aved-Nego, wakuenje va Suku Tõlo, tundi, enjui. Oco Sadrake la Mesake la Aved-Nego va tunda vokati kondalu.

²⁷ Oco apalanga lavakalei lolonguluvulu lakulu va Soma va liongolola, yu va tala alume vaco, va limbuka okuti ondalu ka ya kaile lomoko katimba avo, ndaño esinga liovitue viavo ka lia kakukile, ndaño ovikalasãu viavo ka via nyõlẽhẽle, ndaño oku lẽha ondalu ka va lẽhẽle.

²⁸ Nevukandesa wa popia hati, Suku ya Sadrake la Mesake la Aved-Nego a sivayiwe! Wa tuma ungelo waye, wa popela akuenje vaye vo kolela, kuenje va sinila ocihandeleko ca Soma loku eca atimba avo oco ka va ka vumbe ndaño oku fendela osuku yimue yiñi, te lika Suku yavo muẽle.

²⁹ Oco kaliye nda handeleka okuti pokati kapata osi lolofeka lavakualimi vosi ava va tomba Suku ya Sadrake la Aved-Nego, va nyanyuiwa kuenda olonjo viavo vi linga eyala; momo ka kuli osuku yikuavo yi tẽla oku popela ndeci eye.

³⁰ Kuenje Soma wa ĩha Sadrake la Mesake la Aved-Nego omangu ya velapo vofeka ya Bavulono.