DANIELE 2 - Embimbiliya - Bíblia Sagrada em Umbundu

¹ Kunyamo wavali wondalu ya Nevukandesa, oco Nevukandesa wa lota olonjoi kuenje utima waye wa tokotelua, otulo lakamue.

² Kuenje Soma yu wa tuma oku kovonga vakualumbu lavakuakusingila lovimbanda lava Kaldea, okuti vo lomboluila olonjoi viaye. Oco veya kuenje va talama kovaso a Soma.

³ Soma yu wa popia lavo hati, Nda lota onjoi, kuenje utima wange wa sakalala loku kulĩhĩsa onjoi yaco.

⁴ Oco va Kaldea va tambulula Soma velimi lia Suria, vati, A Soma, kala hũ lomuenyo! Sapula Onjoi kuvakuenje vove hã ha tu ku sapuila elomboluilo liaco.

⁵ Soma wa tambulula, wa popia la va Kaldea hati, Eci nda lota ca ndimba. Nda ko sapuila onjoi lelomboluilo liaco, vu nyanyuiwa kuenda olonjo viene vi linga eyala.

⁶ Puãi nda vu sapuila onjoi yaco lelomboluilo liaco, vu tambula peka liange olombanjaile lonima kuenda ekemainyo lia lua. Oco sapuili yapa onjoi lelomboluilo liaco.

⁷ Va tambulula vati, Soma a sapule onjoi kuvakuenje vaye oco tu yi lombolole.

⁸ Soma yu wa tambulula hati, Ocili vu kasi loku suisa olondaka omo wa limbuki okuti onjoi ya ndimba.

⁹ Puãi nda ka wa sapuilili onjoi yaco, episo liene limuamue omo wa sokiyi olondaka viuhembi kuenda vielimbi, oku vi popia kovaso ange loku lavoka okuti otembo yi pongoloka. Oco muẽle, sapuili yapa onjoi yaco oco ndimbuke nda vu tẽla oku yi ndomboluila.

¹⁰ Va Kaldea va tambulula Soma vati, Kilu lieve ka kuli u o tẽla oku lombolola ondaka yaco ya Soma; omo layimue osoma, pamue ocime, pamue ombiali, wa la pinga ocina ca soka ndeci kukualumbu pamue kukuakusingila pamue ku Kaldea.

¹¹ Eci Soma a pinga ca tĩla, lomue o tẽla oku ci sapula ku Soma, te lika olosuku ka vi tumayala pokati komanu.

¹² Soma yu wa tema loku fungula calua, wa handeleka okuti va ipaya olonoño viosi vio ko Bavulono.

¹³ Oco va imba oluiya luokuti olonoño vi ipaiwa; kuenje va sanda Daniele la vakuavo ha va va ipa.

¹⁴ Oco Daniele wa popia lolondunge lutate la Arioke, kesongo liasualali va lavalava Soma, haeye wa katukila oku ipa olonoño via va Bavulono;

¹⁵ kuenje wa kumbulula, wa popia la Aroike, kesongo kaco, hati, Oluiya lua Soma lu kasi ndati lonjanga ndeyi? Oco Arioke wa sapuila Daniele ondaka yaco yosi.

¹⁶ Daniele yu wa iñila ku Soma kuenje wo pinga oku wĩha evelo lioku lomboluila Soma onjoi.

¹⁷ Kuenje Daniele wa enda konjo yaye, ha sapula ondaka yaco ku vakuavo, Hananiya la Misaeli la Asariya,

¹⁸ oco va lombe ku Suku yokilu mekonda lielumbu liaco, kuenda oco Daniele la vakuavo ka va ka nyolẽhe kumue lolonoño viosi vikuavo vio ko Bavulono.

¹⁹ Oco onjoi ya Soma ya situluiwa ku Daniele kocinjonde pokati kuteke, kuenje Daniele wa tumbangiya Suku yokilu.

²⁰ Daniele yu wa linga hati, Onduko ya Suku yi sivayiwe oloneke vienda ño hũ, momo olondunge viaye, unene waye.

²¹ O pongolola olotembo lovovo; eye upa olosoma haeye o tumbika olosoma; haeye eca olondunge kuava va lunguka kuenda ukulĩhĩso kolonoño.

²² O situlula evi via longa levi via yombekua. Wa kulĩha eci ci li vowelema, kuenje kokuaye oko kuli ocinyi.

²³ Hu pandula, hu sivaya, ove a Suku yovakukululu vange, omo wa nyihã olondunge longusu, kuenje cilo wa situluila eci tua ku pinga omo wa tu situluila onjoi ya Soma.

²⁴ Oco Daniele wa enda ku Arioke, una wa tukulua la Soma oku ipa olonoño via Bavulono. Wa enda kokuaye kuenje wa linga hati, Ku ka nyole olonoño via Bavulono. Nuale ku Soma, kuenje ndu sapuila elomboluilo liaco.

²⁵ Oco Arioke wa tuala Daniele lonjanga ku Soma, kuenje wa popia laye hati, Nda sanga ulume pokati kolomandekua viomãla va Yuda o situluila Soma elomboluilo liaco.

²⁶ Soma yu wa tambulula, wa popia la Daniele, una wa lukiwa Beltesiatare, hati, O tẽla hẽ oku situluila onjoi nda mõla lelomboluilo liayo?

²⁷ Eci Soma a pinga ca linga elumbu, okuti ndaño olonoño pamue vakuakusingila pamue vakualumbu pamue vakuakutanga olombungululu ka va tẽla oku ci situluila Soma.

²⁸ Puãi kilu kuli Suku ukuakusitulula alumbu, kuenje haeye wa lekisa ku Soma eci ci kala koloneke viesulilo. Onjoi yove lovinjonde wa vi muĩla pula wove vievi:

²⁹ Eci wa kala pula wove, a Soma, kutima wove kueya ovisimĩlo viovina viya kovaso. Kuenje U ukuaku situlula alumbu, Eye wa ku lekisa evi viya.

³⁰ Ame puãi, elumbu liaco ka lia situlukilile omo ndukualondunge via velapo, evi viomanu vosi vi sule, te lika okuti elomboluilo li kulĩhĩwe la Soma hu limbuka ovisimĩlo viutima wove.

³¹ Ove a Soma, wa kala loku vanja, kuenje wa mõla ociñumañuma cinene. Ociñumañuma caco cinene ca piãla, lokunina kuaco kua posoka cimue. Ca talama vilu kovaso ove, kuenje okumõlẽha kuaco kua koka usumba.

³² Utue wociñumañuma, ulu wa fina; onete lovoko, opalata; imo lovikalo, osipi;

³³ ovolu aco, utale; olomãi viaco, nẽli viutale nẽli viotuma.

³⁴ Eci wa kala loku vanja, oco ewe ka lia tetuiwile lovaka omunu lia veta ociñumañuma kolomãi viaco viutale lotuma, kuenje lia vi nyanyõla.

³⁵ Oco utale lotuma losipi lopalata lulu, viosi via nyanyõha, via linga ndovisaikiti pocimbandi kotembo yoku sasa; ofela ya vi pengula, kuenje ka via mõlẽhẽle vali. Puãi ewe lia vetele ociñumañuma lia linga omunda yinene kuenda lia yukisa ilu lieve liosi.

³⁶ Eyi oyo onjoi. Kuenje tu sapula elomboluilo liaco ku Soma.

³⁷ Ove a Soma, vusoma yolosoma, momo Suku yokilu wa ku ĩha usoma lunene longusu kuenda ekemainyo.

³⁸ Kuosi ku kasi omãla vomanu, lovinyama viusenge, lolonjila viokilu, eye wa vi eca peka liove, haeye wa ku ĩha omoko yoku vi viala viosi. Ove muẽle vutue waco wulu.

³⁹ Kovaso yove ku katuka usoma ukuavo u sule; noke usoma watatu wosipi u viala ilu lieve liosi.

⁴⁰ Usoma wakuãla u kola muẽle ngõ ndutale; ndeci utale u nyanyula kuenda u teya ovina viosi, haico owu u nyanyula loku sasõla, ndeci utale u sasõla cosi.

⁴¹ Kuenda ndeci wa mõla olomãi lovimuine viotuma viutungi wolombia, kuenda viutale, haico usoma waco u litepa. Haimo mu kala cimue congusu yutale ndeci wa mõla utale wa tengiwa lotuma tuonata.

⁴² Ndeci ovimuini violomãi viutale lotuma, haico usoma waco nẽli u pama, nẽli u leñela.

⁴³ Ndeci wa mõla utale wa litenga lotuma tuonata, haico va litenga lombuto yomanu. Puãi ka vi lingi vimuamue, ndeci utale ka u litokeka lotuma.

⁴⁴ Koloneke violosoma viaco, Suku yokilu o katula usoma, kuenje ka u nyolẽha, ka u tambuiwa lomanu vofeka yiñi; puãi owo u nyõla loku lia ovosoma aco osi, haiwo u kala muẽle hũ oloneke ka vi pui.

⁴⁵ Ndomo wa mõla okuti komunda kua tetuka ewe puãi halovaka omunuko, hailio lia nyanyula utale losipi lotuma lopalata lulu, oco Suku Unene wa lekisa ku Soma eci ci kala kovaso. Onjoi yaco ocili; lelomboluilo liaco lia kolelua.

⁴⁶ Kuenje Soma Nevukandesa wa wila posi, yu wa fendela Daniele kuenda wa handeleka oku u lumbila ocilumba kuenda insensu.

⁴⁷ Soma yu wa popia la Daniele hati, Ocili Suku yene eye Suku yolosuku, haeye Nala yolosoma, haeye Ukuakusitulula alumbu, omo ove wa tẽla oku situlula elumbu elindeti.

⁴⁸ Oco Soma wa kemãlĩsa Daniele, wo wĩha oviali vialua via piãla, yu wo vialeka kofeka yosi ya Bavulono kuenda wo tumbika ndusongui unene wolonoño viosi vio ko Bavulono.

⁴⁹ Daniele wa pinga Soma, kuenje yu wa tumbika Sadrake la Mesake la Aved-Nego ndakulu kupange wofeka ya Bavulono. Puãi Daniele wa kala kala kelombe lia Soma.