DANIELE 12 - Embimbiliya - Bíblia Sagrada em Umbundu

¹ Koloneke viaco ku katuka Mingeli, ombiali yinene haeye ombindikiyi yomãla vepata liene. Oco ku kala otembo yohali, okuti ya linga ndoyo ka ya leya tunde kefetikilo liolofeka toke opo. Koloneke viaco, epata liene li popelua, okuti u wosi onduko yaye yi sangiwa okuti ya sonẽhĩwa velivulu.

² Va lua va pekela voneketela yokufa va pasuka, vamue va enda komuenyo ko pui, vakuavo va enda kosõi lokesepu ka li pui.

³ Ava va kasi lolondunge va nina ndokutua kuovailu, lava va tiamisila valua kesunga va ka nina ndolombungululu, oloneke vienda ño hũ.

⁴ Ove puãi, a Daniele, yika olondaka evi, sitika elivulu liaco, toke kotembo yesulilo. Va lua va enda oko loko, kuenda ukulĩhĩso u lua.

⁵ Oco ame ndi Daniele nda vanja, kuenje ota, omanu vavali vakuavo va talama, ukuavo sinya lilo liolui, ukuavo sinya olio.

⁶ Ukuavo wa popia lulume wa wala ovalatanya, u o tãi kilu liovava ovolui, hati, Oloneke viñãmi vi pitapo toke ovikomo evindeti vi sulila?

⁷ Kuenje nda yeva ulume wa wala ovalatanya, una wa talama kilu liovava ovolui; wa tulika vilu eka liaye liondio, leka liaye liepĩli, kuenje wa lisinga lu o kasi hũ lomuenyo, okuti ci kala otembo yimosi lolotembo lonepa yotembo; oco ovina evi viosi vi pua, eci va mala oku nyanyõla unene wepata li kola.

⁸ Nda yeva, puãi ka ca ndombolokele, oco nda popia siti, A Ñala yange, esulilo liovina evi lie?

⁹ Eye wa popia hati, Kuende ño, a Daniele, momo olondaka evi via yikiwa, haivio via sitikiwa toke kotembo yesulilo.

¹⁰ Valua va liyelisa ha va yeli loku nyikiwa. Puãi olondingaĩvi vi linga evĩho, kuenje layimue ondingãivi yi limbuka. Puãi kuava vakualondunge ci lomboloka.

¹¹ Tunde apa ocilumba ci taima taima ño-o ca upiwapo kuenje va piñainyapo cavo celaviso ca pitahãla etombe, pa pita ohulukãi kovita vivali lakuĩ ecea koloneke.

¹² Wa sumulũha u o lavoka loku pitila toke kohulukãi lovita vitatu koloneke, koloneke akũi atatu lavitãlo.

¹³ Ove puãi, kuende ño lonjila yove toke kesulilo; momo o ka puyuka, kuenje o ka talama vocipiñalo cove kesulilo lioloneke.