DANIELE 11 - Embimbiliya - Bíblia Sagrada em Umbundu

¹ Ame puãi, kunyamo watete wa Dariu, u Media, nda votokela oku u kuatisa loku u kolisa.

² Kaliye hu lekisa eci cocili. Tala, mu katuka vali olosoma vikuavo vitatu vo Persia. Yakuãla yaco yi linga ohuasi ya piãla, vosi vakuavo ci sule. Kuenje, eci a linga unene lukuasi waye, o tutuminya vosi ha va katukila usoma wa va Helasi.

³ Kuenje osoma yimue onoi yi katuka, haeye o viala lomoko yalua, loku linga ocipango caye.

⁴ Eci a talama, oco usoma waye u teyiwa loku tepelua kavindi akuãla okilu. Owo ka u tiamẽla komãla vaye; ndaño omoko a vialele layo, hayoko vali. Momo usoma waye u tambuiwa, wenda povaka omanu va liñi.

⁵ Osoma yo ko Sul yi pama, haico umue kovakesongo vaye. Haeye o pama calua, Soma ci sule; o viala, kuenje uviali waye unene.

⁶ Kovaso yanyamo, va linãla; kuenje omõla a Soma yo ko Sul, ukãi, iya ku Soma yo ko Norte, ha va lisila ocisila combembua. Ukãi waco ka kala longusu yokuoko kuaye. Soma leyevo ka kolipo, ndaño omãla vaye. Puãi ukãi waco o pakuiwa kumue lava vo nena kuenda omõlaye lu wo kolisa koloneke viaco.

⁷ Puãi, kocinjovelela colombombo viukãi waco, ku katuka umue komangu yaye, iya kolohoka viasualali, kuenje iñila vombonge ya Soma yoko Norte, o liyaka laye ho yuli.

⁸ Kuenda olosuku viavo, loviñumañuma viavo viutale wa itilua kumue lovikuata viavo via posoka viopalata lulu, haeye o vi tambula loku vi tuala k'Egito. Oco o liwekapo anyamo amue oku katukila Soma yo ko Norte.

⁹ Leye iñila kusoma wa Soma yo ko Sul, puãi o tiukila kofeka yaye muẽle.

¹⁰ Puãi omãla vaye va katula ovita, loku konga owiñi walua wolohoka. Umue wavo amako, o linga ndendunde loku pita kuosi; oco o tiuka, kuenje va enda loku yaka toke kombonge ya Soma yo ko Sul.

¹¹ Oco Soma yo ko Sul o fungula, yu o tunda oku yaka la Soma yo ko Norte. O katula owiñi walua, kuenje olohoka via Soma yo ko Norte vi eciwa peka liaye.

¹² Eci owiñi waco u yuliwa oco o lipanda vutima waye. O lundula olohuluwa, haimo ka lingi fũ.

¹³ Momo Soma yo ko Norte o tiuka loku konga owiñi wa piãla, watete u sule. Kovaso yolotembo, ndokuti anyamo, iya kumue lolohoka vinene lovikuata vialua.

¹⁴ Koloneke viaco, valua va katukila Soma yo ko Sul. Olonjaki pokati kepata liove muẽle va linga usuanji ha va lemũlũla ocinjonde, puãi va ci tokoka.

¹⁵ Oco Soma yo ko Norte iya, o longeka olondunda, o kuata imbo lia malẽhĩsua. Kuenje olohoka vio ko Sul ka vi tamãlãla, ndaño omanu vaye va nolĩwa, momo ka ku kala vali ongusu yoku tamãlãla.

¹⁶ Puãi u o katukila Soma yaco, o linga ocipango caye kuenje lomue o litamãlãla laye. Haeye o talama vofeka yulamba lofeka yaco yosi yi kala peka liaye.

¹⁷ O likapela oku iya lunene wusoma waye wosi, kumue lavakuesunga, kuenje o linga eci a yongola. O wĩha ukãi ho nyõli, haimo ka tumãla, ndaño eye muẽle, Soma, ka cu kuatisa.

¹⁸ Kovaso yaco o pongolokela kolofeka viokonẽle yokalunga, kuenje o kuata vialua. Puãi ombuale yimue yimũla esepu liaye, hacoko lika, esepu liaye liu tiukila.

¹⁹ Oco o pongolokela kolombonge viofeka yaye muẽle, puãi o lipunduka, o kupuka, kuenje ka sangiwa vali.

²⁰ Oco komangu yaye ku katuka umue o pitisa ondiandia pokati kulamba wusoma. Kovaso yoloneke viñamiñami o nyanyuiwa, puãi halonyeñoko ndaño loku yaka.

²¹ Oco komangu yaye ku katuka vali omunu waño, okuti ka vo wĩhĩle omoko yusoma. Iya ndukuambembua, ha kuata usoma lombambe.

²² Olohoka vi taka kovaso aye, loku nyanyõha, ndaño ombuale yocisila, layovo.

²³ Tunde va lisila laye, o linga ovilinga vielimbi. O katuka, o linga unene lomanu ka va luile.

²⁴ Iñila ocipikipiki kolonẽle via velapo viofeka. O linga eci vaisiaye ka va la linga, ndaño vakukululu vaye; amũla evi via kuatiwa levi via pundiwa kuenda ukuasi. Enda ño okasimbu loku tumba ahala oku nyõla olombonge.

²⁵ Oco o wengula unene waye lutõi waye, kuenje o katukila Soma yo ko Sul lolohoka vialua viasualali. Kuenje Soma yo ko Sul o yaka lolohoka viaye viakahandangala, haivio via pama. Puãi ka yuli, momo va tumbila ahãla.

²⁶ Ava va lialia kovilia viaye ovo muẽle vo nyõla, olohoka viaye vi takata, kuenje valua va fa ongambu.

²⁷ Olosoma viaco vivali vi kala lutima woku linga cĩvi, kuenda va vanguila uhembi komesa yimuamue. Puãi ka ci silivila cimue, momo esulilo liya kotembo ya tukuiwa.

²⁸ Oco o tiukila kofeka yaye lovikuata vialua. Utima waye u suvuka ocisila ci kola. O linga ocipango caye kuenda o tiukila kofeka yaye.

²⁹ Kotembo ya tukuiwa o tiuka vali loku enda ko Sul, puãi konjanja eyi ka ci kala ndeci ca kaile tete.

³⁰ Momo olonaviyu via Kitimi viya oku yaka laye, kuenje o ci tokoka loku tiukila. Yu o funguila ocisila ci kola, loku linga ocipango caye. Poku tiukila imba ovaso kuava va tokoka ocisila ci kola.

³¹ Olohoka vi kala laye, vi vĩhĩsa ocitumãlo ci kola, haico ombonge, loku upa ocilumba ci taima taima ño-o, loku piñainyapo cimue cavo celaviso ca pitahãla etombo.

³² O nũla lombambe ava va lueyela ocisila, puãi omanu va kũlĩha Suku yavo va kola ngõ kuenje va tamãlãla.

³³ Kuenda pokati komanu, ava va kuete olondunge va longisa valua; ndaño oloneke vimue va kupuka losipata lulienge, lumandekua kuenda oku pundiwa.

³⁴ Eci va kupuka, va kuatisiwa naito; puãi valua va litokeka lavo lombambe.

³⁵ Vamue pokati kavakualondunge va kupuka, ha va nyikiwa loku kanguka loku yelisua, toke kotembo yesulilo, momo ci kala kotembo ya tukuiwa.

³⁶ Soma o linga eci a panga. O lipanda loku likapa kunene, kilu liolosuku viosi; haeye o toñomãla la Suku yolosuku lolondaka vi komõhĩsa; kuenje amako kunene toke onyeño ya suapo, momo eci ca sokiyiwa ci lingiwa.

³⁷ Eye ka sumbila olosuku viavaisiaye, ndaño ocisola cakãi. Ka kuli osuku yimue a sumbila, momo o lipanda kilu liovina viosi.

³⁸ Komangu yaco puãi, o sumbila osuku yolombonge via pama; oco, osuku yimue vaisiaye ka va yi kulĩhĩle oyo a yi sumbila lulu lopalata lovawe a tĩla lovikuata via posoka.

³⁹ Kuenje o linga ndeci a yongola lolombonge via pama lekuatiso liosuku ka ya kulĩhĩlue. Vosi va tava kokuaye o va luisila ulamba, o va vialeka komanu valua, haeye o va avela olofeka ndonima.

⁴⁰ Kotembo yesulilo Soma yo ko Sul o liyaka laye; kuenje Soma yo ko Norte o wundumũhĩla ndocipepe lakãlu lavakuatuvalu lolonaviyu vialua. Iñila volofeka ndendunde li supoka, kuenje o pitamo.

⁴¹ Iñilãvo vofeka yulamba. Olofeka vialua vi lunduiwa, puãi vimue vi puluka peka liaye, vievi: Edome la Moavi lava vanene pokati komãla va Amoni.

⁴² Haeye õluĩla eka liaye kolofeka viñi vĩñi, kuenje ofeka y'Egito ka yi puluka.

⁴³ O linga cime cukuasi wulu lopalata, kuenda wovikuata viosi via tĩla vio veEgito. Va Libia la va Etiopia vo kuama.

⁴⁴ Puãi olohali vi tunda kutundilo lo ko Norte viu sakalaisa, kuenje o tunda lokufungula kua lua ha kundula loku nyanyõla valua.

⁴⁵ O tamulũila olombalaka vielombe liaye pokati kokalunga lomunda yi kola haiyo yulamba. Haimo esulilo liaye liya, kuenje lomue u kuatisa.