DANIELE 10 - Embimbiliya - Bíblia Sagrada em Umbundu

¹ Kulima watatu wa Kuro, Soma ya va Persia, ondaka yimue ya situluiwa ku Daniele, una wa lukiwa Beltesiatare. Ondaka yaco yocili, yi tukula ovita vinene. Ondaka yaco yo lomboloka kuenje wa kala lukulĩhĩso wocinjonde caco.

² Koloneke viaco, ame ndi Daniele, nda kala ndocikuluwiya olosemana vitatu ombulu.

³ Sia lile ovilia via posoka, ndaño ositu pamue ovinyu ka via iñilĩle vomẽla yange, ndaño oku liwaveka lulela sia liwavekele, toke olosemana viaco vitatu via tẽla.

⁴ Keteke liakũi avali lakuãla kosãi yatete nda kala kohulo yolui lunene, Hidekele.

⁵ Nda petula ovaso loku vanja, kuenje ota, kua kala ulume wa wala onanga yovalatanya. Vombunda yaye wa litika lulu wa fina wa Ufasi.

⁶ Etimba liaye lia setãhãla turkesa; ocipala caye ca mõlẽha ndociliakulo; ovaso aye ndilienge viondalu; ovoko aye lolomãi viaye via setãhãla evala liosipi yi nina; kuenda ocileñi colondaka viaye ca soka ndonjuvungo yowiñi.

⁷ Ame lika, ndi Daniele, nda mõla owima waco. Alume va kala lame ka va muĩle owima waco, puãi ocilulumu cinene ca va kuata, kuenje va tila ha va salama.

⁸ Oco ame nda siala lika liange, kuenje nda mõla owima waco unene, yu sia kaile vali longusu. Opolo yange ya pongoloka, kuenje ongusu ya mua.

⁹ Haimo nda yeva ocileñi colondaka viaye. Eci nda yeva ocileñi colondaka viaye, nda lituvika posi onuvika, lotulo tua lua.

¹⁰ Kuenje ota, eka limue lia ndamba, lia mbotuila kolongolo viange lokakanda ovaka ange.

¹¹ Eye wa popia lame hati, A Daniele, olume wa soliwa calua, yevelela olondaka mopia love, talama vilu, momo kaliye nda tumiwa kokuove. Eci a popia lame ondaka yaco nda talama loku luluma.

¹² Oco wa popia lame hati, Ku ka yokoke, a Daniele, momo tunde keteke liatete eci wa kapa utima koku loñolõha, loku likapa kutito kovaso a Suku yove, olondaka viove via yeviwa. Oco ndeya, mekonda liolondaka viove.

¹³ Puãi ombiali yusoma wa Persia wa tamãlãla lame oloneke akũi avali lamosi, kuenje ota, Mingeli, haeye umue pokati kolombiali vinene, weya ha ñuatisa, oco nda kalako lolosoma via Persia.

¹⁴ Kaliye ndeyilila oku ku limbukisa evi vi sanga epata liove koloneke viesulilo. Momo ocinjonde eci ci tiamẽla handi koloneke viaco.

¹⁵ Eci a popia lame olondaka evindeti, nda petamisa ocipala cange loku uhã ño ñu.

¹⁶ Kuenje ota, umue wa setãhãla omãla vomanu wa ndamba kolonjembue. Oco nda asama, nda popia lu wa kala kovaso ange, nda linga siti, A Ñala yange, mekonda liocinjonde olongembia via mbuila kuenje ongusu ya mua.

¹⁷ Ukuenje wa Ñala yange o tẽla ndati oku popia la Ñala yange? Momo cilo si kasi vali longusu, ndaño efuimo.

¹⁸ Oco umue wa setãhãla omunu wa ndamba vali, haeye wa ñolisa.

¹⁹ Kuenje wa popia hati, Olume wa soliwa calua, ku ka yokoke. Ombembua yi kale love, kolisako, oco kolisako! Eci a popia lame, nda kolisua, kuenje nda linga siti, A Ñala yange, va popie, momo wa ñolisa.

²⁰ Oco wa popia hati, Wa kulĩha eci ndeyilila kokuove? Kaliye niukila si liyaki lombiali ya Persia, eci ngenda, ota, ombiali ya Helasi yiya.

²¹ Puãi hu sapuila eci ca sonẽhĩwa vocisonẽhũa cocili, kuenje ka kuli umue o ñaila poku liyaka lavandeti, te Mingeli ombiali yene.