DANIELE 1 - Embimbiliya - Bíblia Sagrada em Umbundu

¹ Kunyamo watatu kondalu ya Yehoyakimi, Soma ya Yuda, Nevukandesa Soma ya Bavulono, weya ko Yerusalãi kuenje wa li ñuala ocingonja.

² Yehova yu wa eca peka liaye Yehoyakimi, Soma ya Yuda, kumue lovikuata vimue vionjo ya Suku. Nevukandesa wa enda lavio kofeka ya Sinare, konjo yosuku yaye, yu wa vi kapa vetambo liosuku yaye.

³ Soma yu wa pañinya Asepenase, kalei kakuenje velombe, ho nenela vamue pokati komãla va Isareli, vakuambuto yolosoma leyi yolombuale,

⁴ akuenje ka va kuete etondelo, olondambi, va loñolõha kolondunge, kululĩhĩso, lokelilongiso, okuti va posokela oku vumba velombe lia Soma; kuenda oku va longisa ovisonẽhũa lelimi lia va Kaldea.

⁵ Soma yu wa va tukuila oku lialia okulia kuaye muẽle, kuenda oku nyuanyua ovinyu a nyuanyua eye muẽle, oco va tekuiwe anyamo atatu, toke va tẽla oku talama kovaso a Soma.

⁶ Oco, pokati kavo pa kala vamue omãla va Yuda, Daniele la Hananiya la Misaeli la Asariya.

⁷ Kalei kakuenje velombe, yu wa va luka olonduko vikuavo. Daniele wo luka Beltesiatare; Hananiya luka Sadrake; Misaeli wo luka Mesake, Asariya wo luka Aved-Nego.

⁸ Daniele puãi, wa panga vutima waye hati, Si livĩhĩsa lokulia kua Soma, ndaño lovinyu a nyuanyua. Oco wa pinga ku Kalei okuti ka ko kisike hã ha livĩhĩsa.

⁹ Kuenje Suku yu wa muisa Daniele ocame lohenda kovaso a Kalei kakuenje velombe.

¹⁰ Kalei yu wa popia la Daniele hati, Ñuete usumba la Soma, cime cange, una wa tukula eci vu lia leci vu nyua, sanga oku mõla ovipala viene o limbuka okuti evi viamãlẽhe lavakuẽle via velapo, kuenje vu ñokela oku tetiwa utue la Soma.

¹¹ Oco Daniele wa popia lukuakuava okulia, una Kalei a ĩha ocikele coku tekula Daniele la Hananiya la Misaeli la Asariya, hati,

¹² Hu pinga siti, Seteka akuenje vove ekũi lioloneke. Va tu ĩhe ovilia viaño viocumbo, kuenda ovava.

¹³ Oco noke o vanje ovipala vietu levi viamãlẽhe va lialia okulia kua Soma, kuenje ndeci o mõla haico o linga lakuenje vove.

¹⁴ Oco wa tava kokuavo kondaka yaco, kuenje wa va seteka ekũi lioloneke.

¹⁵ Kesulilo lioloneke viaco ekũi, ovipala viavo via posoka kuenda va neta, okuti amãlẽhe vosi va lialia okulia kua Soma, ci sule.

¹⁶ Oco ukuakuava okulia wa vopa ovilia viaco via Soma lovinyu, kuenje wa va ĩhãiha ovilia viocumbo.

¹⁷ Kaliye, Suku wa eca kakuenje vaco vakuãla ukũlĩhĩso luloño wovisonẽhũa viosi kuenda olondunge. Kuenda Daniele wa kala lukulĩhĩso wovinjonde viosi lu wolonjoi.

¹⁸ Kesulilo lioloneke Soma a tukuile oku va nena, Kalei kakuenje velombe wa va tuala ku Nevukandesa.

¹⁹ Soma yu wa vangula lavo, kuenje pokati kamãlẽhe vaco vosi, ka pa sangelue u wa lisoka la Daniele la Hananiya la Misaeli la Hasariya. Oco va kala kovaso a Soma.

²⁰ Eci Soma a va pula, kovina viosi violondunge lukulĩhĩso, wa sanga okuti va velapo calua, vakualumbu la vakuakusingila vosi va kala kofeka yaye yosi, ci sule.

²¹ Daniele yu wa kala toke kulima watete wa Soma Kuro.