ATENDELO 9 - Embimbiliya - Bíblia Sagrada em Umbundu

¹ Yehova wa popia la Mose vekalasoko lia Sinai, kosai yatete yunyamo wavali kovaso yokutunda kuavo vofeka ye Egito, hati,

² Va Isareli va linga ofesta yo Pascoa kotembo ya tukuiwa.

³ Eteke liekui la kuãla kosãi eyi, koñolosi, kotembo ya tukuiwa, oco vu yi linga, vu yi linga ndovisila viaco viosi lovihõlo viaco viosi.

⁴ Mose wa popia la va Isareli hati, Lingi ofesta yo Pascoa.

⁵ Oco va linga ofesta yo Pascoa vosãi yatete, keteke liekui la kuãla liosãi, koñolosi, vekalasoko lia Sinai. Cosi Yehova a sapuila Mose haico va Isareli va linga.

⁶ Kua kala omanu vamue va vĩhĩsua omo va lamba kocivimbi, ka va tẽlele oku linga ofesta keteke liaco, oco veya ku Mose la Arone eteke liaco muẽle.

⁷ Omanu vaco vo pula vati, Etu tua vĩhĩsua omo tua lamba kocivimbi. Nye hẽ va tu tatekela oku lumbila kumosi la va Isareli ocilumba ca Yehova kotembo ya tukuiwa?

⁸ Mose wa kumbulula hati, Talameli toke njeva ndeci Yehova a handeleka.

⁹ Oco Yehova wa popia la Mose hati,

¹⁰ Sapuila va Isareli, huti, Nda umue pokati kene pamue kovitumbulukila viene o vĩhĩsua omo a lamba kocivimbi, pamue nda o kasi kupãla kungende, haimo a lingila Yehova ofesta yo Pascoa.

¹¹ Vosãi yavali, eteke liekui la kuãla, koñolosi oco va yi linga. Va yi lia lombolo ka yi kuete etumbisa likũla vi lula.

¹² Ka va supisapo cimue toke komẽle; ka va teya ekapa limue. Va yi linga ndocisila cosi co Pascoa.

¹³ U puãi wa yela haeye ka kasi kungende, nda ka lingi ofesta yo Pascoa, omunu waco o tepiwa ku vakuavo. Omo ka lumbile ocilumba ca Yehova kotembo ya tukuiwa, oco omunu waco o kala lepiso liaye.

¹⁴ Nda pokati kene pa tunga ukombe o yongola oku lingila Yehova ofesta yo Pascoa, ndocisila co Pascoa kuenda ndociholo caco, ci tava eye oku linga. Vu kala locisila cimuamue, ci kale ukombe, ci kale onyitiwe.

¹⁵ Eteke ombalaka ya tungiwa elende lia sikĩlĩla ombalaka, yokuti ombalaka yovisila. Kombalaka tunde koñolosi toke komele kua molẽha cimue ca soka ndondalu.

¹⁶ Oco ca kala kala, kutanya elende lia yi sikĩlĩla; kuteke kua molẽha cimue ca soka ndondalu.

¹⁷ Tuli elende lia yeluka kombalaka oco va Isareli va tunda. Oku elende lia talama haiko va Isareli va tunga ocilombo cavo.

¹⁸ Va Isareli va tunda londaka ya Yehova kuenje londaka ya Yehova va talama loku tunga ocilombo. Osimbu elende lia kala kilu liombalaka va tumãla vocilombo.

¹⁹ Ndaño elende lia tumãla kombalaka oloneke via lua haimo va Isareli va pokola kondaka ya Yehova, ka va tundile kocilombo.

²⁰ Olonjanja vimue elende lia kala kombalaka oloneke vimue oco va tumãla vocilombo ndondaka ya Yehova, noke, ndondaka ya Yehova, va tunda.

²¹ Olonjanja vimue elende lia kalako tunde koñolosi toke komẽle. Eci elende li katuka omẽle oco va tunda. Ndaño lia kala utanya luteke, eci elende li katuka oco va tunda.

²² Ndaño elende lia kala kombalaka oloneke vivali, pamue osãi, pamue unyamo lia vongela kilu liayo, haimo va Isareli va tumãla vocilombo, ka va tundile. Eci lia katuka oco va tunda.

²³ Va tumãla vocilombo ndondaka ya Yehova kuenje ndondaka ya Yehova va tunda. Va pokola kondaka ya Yehova okuti ondaka Yehova a sapuila Mose.