ATENDELO 8 - Embimbiliya - Bíblia Sagrada em Umbundu

¹ Kuenje Yehova wa popia la Mose hati,

² Popia la Arone, huti, Eci o mĩha olovela viaco epanduvali vi taimĩla kovaso yondiyelo.

³ Arone wa ci linga ndoco, wa miha olovela viayo ha vi taimĩla kovaso yondiyelo, ndeci Yehova a sapuila Mose.

⁴ Ondiyelo ya tungiwa lulu kuenje tunde ketako toke kolonẽlẽho viaco ulu waco wa teliwa. Ndoseteko Yehova a lekisa ku Mose, haico a tunga ondiyelo.

⁵ Yehova wa popia la Mose hati,

⁶ Ku va Isareli tepako va Lewi kuenje va yelisa.

⁷ Oku va yelisa linga ndeci: Va nyĩla ovava oku yelisa, va pitise omoko yomuto ketimba liosi, va sukule uwalo wavo loku yua ovo muẽle.

⁸ Oco va kuate onale locilumba caco cosema, osema yaco ya fina ya tengiwa lulela; ove o kuata onale yikuavo yi linga ocilumba cekandu.

⁹ O nena va Lewi kovaso yombalaka yoku ñualehela la Yehova; wongolola va Isareli vosi.

¹⁰ Eci o nena va Lewi ku Yehova oco va Isareli va kapa ovaka avo ku va Lewi,

¹¹ kuenje Arone o lumba va Lewi ku Yehova ndocilumba coku yangelisa ca va Isareli, okuti va tambula omoko yoku linga upange wa Yehova.

¹² Noke va Lewi va kapa ovaka avo kovitue violonale, kuenje ove o lumba yimue ndocilumba cekandu, yikuavo ndocilumba coku pia elisi ku Yehova, okuti o likutilila va Lewi loku tuvika akandu avo.

¹³ O kapa va Lewi okuti ovo va vumba Arone lomãla vaye, o va lumba ku Yehova ndocilumba coku yangelisa.

¹⁴ Oco o tepa va Lewi ku va Isareli, kuenje va Lewi va linge vange.

¹⁵ Eci wa mala oku va yelisa loku va lumba ndocilumba coku yangelisa oco va Lewi va iñila noke oku linga upange vombalaka yoku ñualehela la Yehova.

¹⁶ Momo pokati ka va Isareli ovo muẽle va nyihiwa olumue. Ovo muẽle nda va nola ha va lingi vange, okuti ovaveli havo olonuñulu via va Isareli, havoko.

¹⁷ Momo olonuñulu viosi via va Isareli viange, ci kale viomanu, ci kale viovinyama. Eteke nda nyõla olonuñulu viosi vofeka ye Egito nda vi kolisa okuti vi linga viange.

¹⁸ Cilo va Lewi nda va piñainya polonuñulu viosi via va Isareli.

¹⁹ Va Lewi nda va eca ku Arone lomãla vaye ndombanjaile ya tunda ku va Isareli. Va lingila va Isareli upange wombalaka yoku ñualehela la Yehova. Va tuvika akandu a va Isareli okuti pokati ka va Isareli ka pa kala efengi nda va Isareli va kokela kocitumãlo ci kola.

²⁰ Oco Mose la Arone kuenda va Isareli vosi va ci linga la va Lewi. Cosi Yehova a sapuila Mose oku linga la va Lewi haico va Isareli va linga lavo.

²¹ Va Lewi va liyelisa kakandu, kuenje va sukula uwalo wavo. Arone wa va lumba ku Yehova ndocilumba coku yangelisa kovaso a Yehova, kuenje Arone wa va likutilila okuti o tuvika akandu avo loku va yelisa.

²² Noke va Lewi va iñila oku linga upange wavo vombalaka yoku ñualehela la Yehova. Va vumba Arone lomãla vaye. Ndeci Yehova a sapuila Mose oku linga la va Lewi, haico a linga lavo.

²³ Yehova wa popia la Mose hati,

²⁴ Ci tiama ku va Lewi ceci: Vakuanyamo akuĩ avali la tãlo kuenda kua supa va iñila kocisoko coku linga upange wombalaka yoku ñualehela la Yehova.

²⁵ Eci va tẽla akuĩ atãlo kanyamo oco va tunda kocisoko cavakuopange waco, ka vo lingi vali.

²⁶ Oku kuatisa vakuavo va linga upange waco vombalaka yoku ñualehela la Yehova ci tava. Puãi oku u linga ovo muẽle oco ka ci tava. Oco o linga la va Lewi eci o va tukuila ovikele viavo.