ATENDELO 6 - Embimbiliya - Bíblia Sagrada em Umbundu

¹ Yehova wa popia la Mose hati,

² Popia la va Isareli huti, Nda ulume pamue ukãi o lisila ocisila cuNasiri okuti o litepa la vakuavo ha litumbika ku Yehova oco o linga ndomo:

³ o likandangiya ovinyu lovina viosi vi koluisa; ka nyui ovindangele viovinyu pamue ovindangele vievi vi koluisa, ka nyui ovava ayuva, pamue oku lia ayuva owisu ndaño a a kukuta.

⁴ Koloneke viosi viuNasiri waye ka li cimue ci tunda kuyuva, ndaño olomema viaco, ndaño akambi aco.

⁵ Oloneke viosi viuNasiri waye vutue waye ka mu piti omoko yomuto. O kala muẽle o kola toke oloneke viaye vioku litumbika ku Yehova via pua. O yovisa esinga liaye.

⁶ Oloneke viosi a litumbika ku Yehova kami ocipepi locivimbi.

⁷ Ka livĩhĩsila ndaño isiaye pamue inaye ndaño manjaye yulume pamue mukãi waye, nda va fa, omo a lisila la Yehova oco cu pandeka.

⁸ Oloneke viosi viuNasiri waye o kola ku Yehova.

⁹ Nda omunu o fila ocipikipiki kovaso aye, kuenje eye o vĩhĩsa utue wuNasiri waye, oco keteke liokuliyelisa kuaye eye o pemũla utue waye; keteke liepanduvali oco a lipemũla.

¹⁰ Eteke liecelãla o nena olopomba vivali pamue ivuvu vivali violonende kocitunda kuvelo wombalaka yoku ñualehela la Yehova.

¹¹ Ocitunda ci lumbila, yimue ocilumba cekandu, yikuavo ocilumba coku pia elisi, oco ci tuvika ekandu liaye lina a linga omo a lamba kocivimbi. Eteke liaco muẽle o kolisa utue waye,

¹² hailio a litepa la vakuavo loku litumbika ku Yehova oku tẽlisa oloneke viuNasiri waye. O nena okameme kulume ka tẽla unyamo ndocilumba ceko. Puãi oloneke viokonyima ka vi tendiwa omo uNasiri waye wa vĩhĩsua.

¹³ Ocihandeleko cuNasiri eci oloneke viocisila caye vi pua ceci, Vo nena kuvelo wombalaka yoku ñualehela la Yehova.

¹⁴ Eye o lumba ovilumba viaye ku Yehova, okuti ocilumba caye coku pia elisi o nena okameme kulume ka tẽla unyamo haiko ka ka kuete etondelo: ocilumba cekandu, o nena okameme komange ka tẽla unyamo haiko ka ka kuete etondelo; ocilumba combembua o nena ocitupi comeme ka ci kuete etondelo.

¹⁵ O nenavo uhamba wolombolo ka vi kuete etumbisa, lakende osema ya fina ya tengiwa lulela, lakende a pelevala a pua etumbisa a sieketiwa lulela, kuenda ocilumba caco colomema lovilumba viaco vioku nyua.

¹⁶ Oco ocitunda ci vi nena ku Yehova, kuenje cu lumbila ocilumba caye cekandu locilumba caye coku pia elisi.

¹⁷ O lumba ocitupi cocitundasonde combembua ku Yehova, o ci lumbila kumue luhamba wolombolo ka vi kuete etumbisa. Ocitunda ci lumbavo ocilumba caco colomema locilumba caco coku nyua.

¹⁸ Oco uNasiri o pemuĩla utue wuNasiri waye puvelo wombalaka yoku ñualehela la Yehova. O yelula esinga liuNasiri waye kuenje o li kapa vondalu vemi liocitundasonde combembua.

¹⁹ Ocitunda ci nyañula okuokuo kuocitupi kua telekiwa, lombolo yimue ka yi kuete etumbisa vuhamba, lekende limue lia pelevala ka li kuete etumbisa, kuenje o vi kapa povaka uNasiri eci a pamũla ale utue wuNasiri waye.

²⁰ Ocitunda ci vi yangelisila ndocilumba coku yangelisa kovaso a Yehova. Vi linga onepa yi kola yocitunda, kumue lonete yoku yangelisa kuenda ocikalo coku tulika. Noke ci tava uNasiri oku nyua ovinyu.

²¹ Evi ovio ovihandeleko viuNasiri wa lisila ocisila. Ocilumba caye coku Yehova ci soka leci a lisila pokati kovisila viaye viuNasiri. Kilu liaco eca vali ndeci a tẽla. Ndeci a lisila haico a linga okuti o telisa ovisila viuNasiri waye.

²² Oco Yehova wa popia la Mose hati,

²³ Popia la Arone lomãla vaye huti, Eci wu sumũluĩsa va Isareli oco vu popia lavo hoti,

²⁴ Yehova a ku sumũluĩse loku ku lava.

²⁵ Yehova a ku tuisile ocipala caye, loku ku linga ohenda.

²⁶ Yehova a ku petuile ocipala caye, loku ku muĩsa ombembua.

²⁷ Oco va kapa onduko yange ku va Isareli, kuenje ndi va sumũluĩsa.