ATENDELO 5 - Embimbiliya - Bíblia Sagrada em Umbundu

¹ Yehova wa popia la Mose hati,

² Sapuila va Isareli okuti va tundisa vocilombo vakuavilundu vosi, lava vosi va kasi loku pita cimue ketimba, la vosi va vĩhĩsua omo va lamba kovivimbi.

³ Va tundisue muẽle, ci kale alume, ci kale akãi. Va tundisiwile kofeka, okuti ka va vĩhĩsa ocilombo cavo omo ame ñasi vokati kaco.

⁴ Oco va Isareli va ci linga, va va tundisa vocilombo. Ndeci Yehova a popia la Mose haico va Isareli va linga.

⁵ Yehova wa popia la Mose hati,

⁶ Popia la va Isareli huti, Nda ulume pamue ukãi o linga ekandu limue omanu va lingainga, okuti o lueyela ku Yehova, kuenje o kasi leko,

⁷ omunu waco o litavela ekandu liaye a linga loku feta eci ca soka leko liaye, kuenje o vandekako onepa yatãlo yoku eca ku a lingila eko.

⁸ Puãi nda omunu waco ka kuete ngandiaye kundeti ci tava oku eca oniuwile yaco, oniuwile yaco yeko yeciwa ku Yehova, yi linga yocitunda; yi vandeka kocitupi coku tuvika ekandu va tuvika laco ekandu liaye.

⁹ Kuenda ovilumba viosi, okuti ovina viosi vi kola va Isareli va nena kocitunda, vi linga viocitunda.

¹⁰ Evi viosi vi kola omunu a nena vi linga viocitunda. Cosi omunu a eca kocitunda ci linga cocitunda.

¹¹ Yehova wa popia la Mose hati,

¹² Popia la va Isareli huti, Nda ukãi umue o lueya kuenje o lingila cĩvi veyaye,

¹³ okuti ulume ukuavo o pekela laye kuenje veyaye ka ci kũlĩhĩle, omo lomue wo sanga ndaño ukãi wa livĩhĩsa, kuenje ka ku li ombangi yu pisa omo ka vo sangele;

¹⁴ oco nda ulume o kuata ukuelume okuti o kuatela ukãi waye wa livĩhĩsa ukuelume, pamue nda o linga ukuokuelume okuti o kuatela ukãi waye ukuelume, ndaño ukãi ka livĩhĩsile,

¹⁵ oco ulume enda kocitunda lukãi waye, o wambatela ocilumba ca tukuiwa okuti onepa yekui yefa liosema yosevata: ka itilako ulela, ka kapiko insensu, momo ocilumba caco ocilumba colomema coku kuatela ukuelume, haico ocilumba conjivaluiso coku ivaluisa ohole.

¹⁶ Ocitunda cu wamisa, cu kapa kovaso a Yehova.

¹⁷ Ocitunda ci nyañula ovava a kola vocikuata cotuma, o nyañulavo oneketela yoposi yombalaka, o yimba vovava.

¹⁸ Ocitunda ci kapa ukãi kovaso a Yehova, ci salũla esinga liukãi, ci kapa povaka ukãi ocilumba colomema conjivaluiso, haico ocilumba coku kuatela ukuelume. Ovava ombulungu oku pisa pamue oku yovuisa a kala peka liocitunda.

¹⁹ Ocitunda ci lisingisa, citi, Nda lomue ulume wa pekela love, okuti kua lueyele loku livĩhĩsa osimbu ove wa kueliwa, oco ovava a ombulungu ka a ku lingi cimue.

²⁰ Puãi nda wa lueya osimbu ove wa kueliwa kuenje wa livĩhĩsa okuti ulume umue haveyoveko wa pekela love,

²¹ oco ocitunda ci lisingisa vali ukãi citi, Yehova a ku yukisa vovimela viomanu loku pembuiwa eci Yehova a fuvisa ocikalo cove loku lendisa imo liove.

²² Lovava a ombulungu a iñile vetimba liove loku lendisa imo liove, a fuvise ocikalo cove. Ukãi a popia hati, amene, amene.

²³ Ocitunda ci sonẽha asingo a velivulu, kuenje ci a yava vovava ombulungu.

²⁴ Noke a nyuisa ukãi ovava ombulungu; ukãi o nyua ovava ombulungu kuenje olongembia via lua vi fetika.

²⁵ Ocitunda cupa peka liukãi ocilumba colomema cukuelume, ci yangelisa ocilumba colomema kovaso a Yehova kuenje ci ci tuala kutala.

²⁶ Ocitunda ci yoya epupu liocilumba colomema ndonjivaluiso yaco kuenje ci li yokela kutala. Noke o nyuisa ukãi ovava ombulungu.

²⁷ Eci co nyuisa ovava, oco nda ukãi wa livĩhĩsa kuenje wa pita veyaye konyima, oco ovava ombulungu o wiñila kuenje olongembia via lua vi fetika. Imo liaye li lenda locikalo caye ci fuva. Kuenje ukãi waco o yuka vovimẽla viomanu pokati kofeka yavo.

²⁸ Puãi nda ukãi ka livĩhĩsile kuenje wa yela, o yovoka, o kuata omãla.

²⁹ Eci oco ocihandeleko cukuelume, nda ukãi okueliwe o lueya loku livĩhĩsa;

³⁰ pamue nda ulume ukuokuelume o kuatela ukãi waye ukuelume; oco o kape ukãi kovaso a Yehova, kuenje ocitunda cu lingila ocihandeleko eci cosi.

³¹ Oco ulume o yovoka, lukãi enda longole yaye.