ATENDELO 4 - Embimbiliya - Bíblia Sagrada em Umbundu

¹ Yehova wa popia la Mose kuenda Arone hati,

² Pokati ka va Lewi tendapo alume kombuto ya Kohata. Va tenda epata epata, kuenda imo imo.

³ Va tenda tunda kuava va kuete akuĩ atatu kanyamo toke kuava va kuete akuĩ atãlo kanyamo, okuti ava va tẽla oku kala vocisoko cava va linga upange wovombalaka yoku ñualehela la Yehova.

⁴ Upange wa va Kohata wovombalaka yoku ñualehela la Yehova, haiwo u kola koku kola, wowu:

⁵ Eci ocilombo ci votoka, Arone lomãla vaye veñila kuenje va tulula ongumbo yoku vindikiya, va sikĩlĩla layo ocikasia covisila.

⁶ Noke va ci sikĩlĩla lonanga yovipa violonjundu. Kilu liaco va sikĩlĩlako vali lonanga yonoloti, kuenje va somehamo olomuangaluwa viaco.

⁷ Omesa yombolo yoku taliwa va yi sikĩlĩla lonanga yonoloti, va kapako alonga aco lotualonga tuinsensu latiyela lasanga va itaila lao. Va kapa kapavo ombolo yoku taliwa.

⁸ Va sikĩlĩla cosi lonanga yi kusũka. Kilu liaco va kapako vali onanga yovipa violonjundu. Va somehamo olomuangaluwa viaco.

⁹ Va nyañula onanga yonoloti, kuenje va sikĩlĩla layo ondiyelo yocinyi, lolovela viayo, lotuayola, lotualonga, kuenda ovikuata viayo viosi viulela.

¹⁰ Ondiyelo lovikuata viayo viosi va vi sikĩlĩla lonanga yovipa violonjundu kuenje va ci kapa kocikalavekua.

¹¹ Utala wulu tete vo sikĩlĩla lonanga yonoloti, noke va sikĩlĩla lonanga yovipa violonjundu. Va somehamo olomuangaluwa viaco.

¹² Va nyañula ovikuata viosi vi tiama kefendelo liovocitumãlo ci kola, va vi kapa vonanga yonoloti, kuenje va vi sikĩlĩla lonanga yovipa violonjundu loku vi kapa kocikalavekua.

¹³ Vopa kutala etiko, kuenje va sikĩlĩlako onanga yi vumbula.

¹⁴ Va kapako ovikuata viosi vi tiama kupange u lingilua kutala, okuti oviyukilo, lolongalufu, lolopa, latasu, okuti ovikuata viosi vi tiama kutala; vi sikĩlĩla cosi lonanga yovipa violonjundu. Va somehamo olomuangaluwa viaco.

¹⁵ Eci Arone lomãla vaye va mãla oku sikĩlĩla ocitumãlo ci kola lovikuata viosi viocitumãlo ci kola, kuenje ocilombo lacovo ca longeka ale, oco va Kohata veya noke oku vi yelula. Puãi ka va lambi kovina vi kola sanga va fa. Evi ovio ovikuata viombalaka yoku ñualehela la Yehova viambatiwa la va Kohata.

¹⁶ Eleasa omõla ocitunda Arone o kala locikele culela wolovela, kuenda insensu vielemba liwa, locilumba colomema coloneke viosi, lulela woku waveka. Ocikele cosi combalaka yoku ñualehela la Yehova levi viosi vi kasimo, okuti ocitumãlo ci kola lovikuata viaco, ocikele caco cosi ca Eleasa.

¹⁷ Yehova wa popia la Mose kuenda Arone hati,

¹⁸ Ko ka tepi epata liocikoti ca va Kohata ku va Lewi;

¹⁹ puãi oku va popela okuti va kala lomuenyo kuenje ka va fi eci veya ocipepi lovikuata vi kola vu linga lavo ndomo: Arone lomãla vaye va iñila kuenje va tukula u upange waye locitele caye, u upange waye locitele caye.

²⁰ Ovo puãi ka va iñila oku tala evi vi kola, ndaño naito, sanga va fa.

²¹ Yehova wa popia la Mose hati,

²² Tendavo alume vakuambuto ya Gerisiono, o va tenda epata epata kuenda imo imo.

²³ O va tenda tunde kuava va kuete akui atatu kanyamo toke kuava va kuete akuĩ atãlo kanyamo, okuti ava va tẽla oku kala vocisoko cava va linga upange wovombalaka yoku ñualehela la Yehova.

²⁴ Upange wa va Gerisiono woku vumba loku ambata ovitele wowu:

²⁵ Va ambata olonanga viovombalaka yoku ñualẽhẽla la Yehova. Vambatavo ombalaka yoku ñualẽhẽla la Yehova kumosi locisikĩlĩlo cayo locisikĩlĩlo covipa violonjundu ci kasi kilu liaco. Vambatavo onanga yombindikiyo yokuvelo wombalaka yoku ñualẽhẽla la Yehova.

²⁶ Lolongumbo viocitali, lombindikiyo yuvelo wombundi yocitali ci ñuala ombalaka, kuenda utala lovikolo viavio, lovikuata viosi viupange wavio, laviovo va vi ambata. Lupange wosi u tiama kovitele viaco ovo vo linga.

²⁷ Arone lomãla vaye ovo va kala lomoko yoku tumila va Gerisiono okuti ovo va sokiya ovitele vambata lupange va linga. Vu va tukuila ocikele cavo cevi va ambata.

²⁸ Owo upange wapata a va Gerisiono vombalaka yoku ñualẽhẽla la Yehova. Itamare, omõla ocitunda Arone, eye o linga usongui wavo.

²⁹ O tendavo alume vakuambuto ya Merari, o va tenda epata epata kuenda imo imo.

³⁰ O tenda tunde kuava va kuete akuĩ atatu kanyamo toke kuava va kuete akuĩ atãlo kanyamo, okuti ava va tẽla oku kala vocisoko cava va linga upange wombalaka yoku ñualẽhẽla la Yehova.

³¹ Leci vambata oku vumba ombalaka yoku ñualẽhẽla la Yehova ceci; olomanji viombalaka lolombalaka viayo, kuenda olongunji viayo lotulukuki tuayo,

³² lolongunji viocitali ca ñualako lotulukuki tuavio, lolombambo viavio, kuenda ovikolo viavio, lovikuata viaco viosi lotuvinjangatela tuaco tuosi. Ove muẽle o va tepisila ovikuata vambata loku va sapuila olonduko viavio.

³³ Owo upange wapata a va Merari, ndomo va linga upange wavo wosi wombalaka yoku ñualẽhẽla la Yehova. Itamare, omõla ocitunda Arone, eye o linga usongui wavo.

³⁴ Mose la Arone lovasongui va noliwa va tenda alume vakuambuto ya Kohata, va va tenda epata epata, kuenda imo imo.

³⁵ Va va tenda tunde kuava va kuete akuĩ atatu kanyamo toke kuava va kuete akuĩ atãlo kanyamo, okuti ava va tẽla oku kala vocisoko cava va linga upange wovombalaka yoku ñualẽhẽla la Yehova.

³⁶ Poku tenda alume vakuambuto yavo vosi, omanu vavo va soka olohũlũkai vivali lovita epanduvali lakuĩ atãlo.

³⁷ Ava ovo va tendiwa kapata a va Kohata, okuti vosi va tẽla oku linga upange wombalaka yoku ñualehela la Yehova. Mose la Arone va va tenda ndeci Yehova a sapuila Mose.

³⁸ Oku tenda alume vakuambuto ya Gerisiono va va tenda epata epata kuenda imo imo.

³⁹ Va va tenda tunde kuava va kuete akui atatu kanyamo toke kuava va kuete akui atãlo kanyamo, okuti ava va tẽla oku kala vocisoko cava va linga upange wovombalaka yoku ñualehela la Yehova.

⁴⁰ Poku tenda alume vakuambuto yavo vosi, va soka olohũlũkai vivali lovita epandu lakui atatu.

⁴¹ Ava ovo va tendiwa kapata a va Gerisiono, okuti vosi va tẽla oku linga upange vombalaka yoku ñualehela la Yehova. Mose la Arone va va tenda ndeci Yehova a sapula.

⁴² Oku tenda alume vakuambuto ya Merari, va va tendavo epata epata kuenda imo imo.

⁴³ Va va tenda okuti tundi kuava va kuete akui atatu kanyamo toke kuava va kuete akui atãlo kanyamo, okuti ava va tẽla oku kala vocisoko cava va linga upange wovombalaka yoku ñualehela la Yehova.

⁴⁴ Poku tenda vakuambuto yavo yosi va soka olohũlũkãi vitatu lovita vivali.

⁴⁵ Ava ovo va tendiwa kapata a va Merari. Mose la Arone va va tenda ndeci Yehova a sapuila Mose.

⁴⁶ Oco Mose la Arone lasongui va va Isareli va va tenda vosi. Va va tenda epata epata kuenda imo imo.

⁴⁷ Va va tenda tunde kuava va kuete akuĩ atatu kanyamo toke kuava va kuete akuĩ atãlo kanyamo. Ava va tendiwa ovo vana va tẽla oku kala vocisoko cava va linga upange wovombalaka yoku ñualehela la Yehova lowu woku ambata ovitele.

⁴⁸ Ava va tendiwa va tẽla olohũlũkai ecelãla lovita vitãlo lakui ecelãla.

⁴⁹ Kuenje ndeci Yehova a sapuila Mose haico ca lingiwa okuti vosi va ihiwa upange, omunu omunu upange waye woku vumba pamue woku ambata ovitele. Ndeci Yehova a sapuila Mose oku va tenda haico va tendiwa laye.