ATENDELO 36 - Embimbiliya - Bíblia Sagrada em Umbundu

¹ Akulu vapata va Gileada, omõla a Makiri, omõla a Manase, kapata omãla va Yosefe, veya, va popia kovaso a Mose lo kovaso ovasongui haivo akulu vapata a va Isareli.

² Va popia vati, Yehova wa sapuila cime cetu hati, Eca ofeka eyi locela ku va Isareli ha yi lingi ocipiñalo cavo. Cime cetu wa sapuiwa la Yehova oku eca ocipiñalo cukuetu Celofehada komãla vaye vakãi.

³ Kuenje nda va kueliwa lomãla vakuapata akuavo a va Isareli, ocipiñalo cavo ci tunda kocipiñalo ca vaisietu, ci vokiyiwa kocipiñalo covepata va kuele. Oco cupiwa kocipiñalo cetu ca kuatiwa locela.

⁴ Eci unyamo wonjolela wa va Isareli weya, oco ocipiñalo cavo ci vokiyiwa kocipiñalo covepata va kuela. Oco ocipiñalo cavo cupiwa kocipiñalo cepata lia vaisietu.

⁵ Oco Mose a sapuila va Isareli ndondaka ya Yehova hati, Epata lia va Yosefe lia popia esunga.

⁶ Ca popia Yehova oku tukula omãla vakãi va Celofehada, ceci, hati, Va likuele lava va panga, cinene va likuele la vakuepata lia isiavo.

⁷ Oco ocipiñalo ca va Isareli ka ci tundi kepata eli ha cendi kepata likuavo. Omo va Isareli va kakatele omunu omunu ocipiñalo cepata lia vaisiavo.

⁸ Oco omãla vosi vakãi va kasi locipiñalo vepata limue lia va Isareli va likuele lomunu ukuepata lia isiavo. Oco va Isareli va kale omunu omunu locipiñalo ca vaisiavo.

⁹ Oco ocipiñalo ka ci tundi kepata eli ha cendi kepata likuavo; momo apata a va Isareli osi a kakatele ovipiñalo viao.

¹⁰ Ndeci Yehova a sapuila Mose, haico ca linga omãla vakãi va Celofehada.

¹¹ Oco Mahila, la Tirica, la Hogila, kuenda Milika la Noha, omãla vakãi va Celofehada, va likuela lomãla va vaisiavo.

¹² Va likuela la vakuapata a va Manase, omõla a Yosefe, kuenje ocipiñalo cavo ca siala lepata lia isiavo.

¹³ Evi ovio ovihandeleko lovihõlo Yehova a eca ku va Isareli lomẽla wa Mose vanyãla a Moavi kekulo lia Yordão oku imba ovaso ko Yeriko.