ATENDELO 35 - Embimbiliya - Bíblia Sagrada em Umbundu

¹ Yehova wa popia la Mose vanyãla a Moavi kekulo lia Yordão oku imba ovaso ko Yeriko, hati,

² Sapuila va Isareli okuti kocipiñalo cavo muẽle va tepako ovaimbo amue loku a eca ku va Lewi ha va tungimo. Va ecavo ku va Lewi isenge via ñuala ovaimbo avo.

³ Va Lewi va tunga vovaimbo aco, kuenje ovisenge viaco vi kala violongombe viavo, loviunda viavo, lovinyama viavo viosi.

⁴ Ovisenge viovaimbo weci ku va Lewi, wu vi seteka tunde kocimbaka cimbo toke ca tẽla ohũlũkãi yovikeya kolonẽle viosi.

⁵ Vu seteka tunde konele yimbo ongave yokutundilo olohulukai vivali kovikeya, yoko Sul olohulũkãi vivali kovikeya, yokutakelo olohũlũkãi vivali kovikeya, kuenda yoko Norte olohũlũkãi vivali kovikeya. Imbo li kasi vokati, oco ovisenge viovaimbo avo vi setekiwa ndoco.

⁶ Ovaimbo weci ku va Lewi ovaimbo epandu oku tilila, hao vu a tukuila olomondi ha vi tililamo. Vu vokiya akuĩ akuãla kovaimbo kovaimbo avali oku va iha.

⁷ Ovaimbo osi weci ku va Lewi a tẽla akuĩ akuãla kovaimbo kovaimbo ecelãla kumue lovisenge viao.

⁸ Ovaimbo wupi kocipiñalo ca va Isareli, ava va kasi la a lua vu tambula kokuavo a lua, ava ka va kasi la a lua vu tambula kokuavo a sule: omunu omunu eca ovaimbo aye ku va Lewi ndocipiñalo caye a piñala.

⁹ Yehova wa popia la Mose hati,

¹⁰ Popia la va Isareli huti, Eci wu yoka Yordão oku iñila vofeka ya Kanana,

¹¹ vu nola ovaimbo ha a lingi ovaimbo ovitililo, okuti oko ku tilila omondi ya ipa omunu okuti ka ci pangele.

¹² Ovaimbo aco a linga ovitililo oku puluka ufetuluinyi, okuti omondi ka yi fi te o kala kovaso omanu ha vo tetela.

¹³ Kuenje ovaimbo weca a kala ovaimbo epandu ovitililo viene.

¹⁴ Vu tukula ovaimbo atatu sinya lilo lia Yordão, kuenda ovaimbo atatu vofeka ya Kanana. Ovaimbo aco a linga ovaimbo ovitililo.

¹⁵ Va Isareli locingendeleyi lukombe pokati kavo, ovaimbo aco epandu a va lingila ovitililo, okuti oko ku tilila u wa ipa omunu puãi ka ci pangele.

¹⁶ Puãi nda wo lemẽha locivela cutale kuenje wa fa, omunu waco omondi. Omondi yipaiwa muẽle.

¹⁷ Pamue nda wo tesola lewe li kasi peka, okuti ewe liaco li tẽla oku ipala omunu, kuenje omunu waco wa fa, u wambata ewe omondi. Omondi yipaiwa.

¹⁸ Pamue nda wo lemẽha lusongo a kala lawo peka okuti usongo waco u tẽla oku ipala omunu kuenje omunu waco wa fa, u wambata usongo omondi. Omondi yipaiwa.

¹⁹ Ufetuluinyi wosonde eye muẽle ipaya omondi. Eci o sanga wipaya.

²⁰ Nda wa kunyula lesuvu pamue oku lavekela wo wasa kuenje wa fa,

²¹ pamue wo veta olukusi lonyeño kuenje wa fa, u wo veta ipaiwa muẽle omo omondi. Ufetuluinyi wosonde, eci a sanga omondi, o yipaya.

²² Puãi nda wo kunyũla ño puãi ka kaile lesuvu, pamue wo wasa cimue ko lavekelele,

²³ pamue wo wasa ewe li tẽla oku ponda omunu, puãi ko muĩle, kuenje wo wasa okuti wa fa, eye ka kaile unyãli waye, ka pangele oku valula;

²⁴ oco omanu va tepisa pokati komondi lufetuluinyi wosonde ndovihandeleko evi.

²⁵ Oco omanu va popela omondi peka liufetuluinyi wosonde kuenje omanu vo tiuwiya kimbo liaye liocitililo kuna a tililile. Oko a kala toke ocitunda cinene ca fa, u wa wavekiwa lulela u kola.

²⁶ Puãi nda omondi yi tunda vulilo wimbo liocitililo oko a tililile,

²⁷ oco ufetuluinyi wosonde nda u sanga wa tunda vulilo wimbo liocitililo, kuenje ufetuluinyi wosonde ipa omondi, ufetuluinyi ka kala longole yosonde.

²⁸ Momo omondi yi kala vimbo liocitililo toke kokufa kuocitunda cinene. Puãi eci ocitunda cinene ci fa, oco omondi yi tẽla oku tiukila noke kofeka yaye muẽle.

²⁹ Ovina evi vi linga ovisila viene lovihõlo viene kovitumbulukila viene viosi kuoha vu tunga.

³⁰ Nda umue ipa omunu okuti ondaka yaco yi kuete olombangi viocili, omondi yaco yipaiwa. Puãi lomue ipaiwa luvangi wombangi yimosi lika.

³¹ Ka ci tava oku tambula ocimuenyo coku yovola omondi ya pia londaka yoku ponda, ipaiwa muẽle.

³² Ka ci tava oku tambula ipako vioku yovola u wa tilila kimbo liocitililo, okuti o tiukila oku tunga vofeka osimbu ocitunda ka ca file.

³³ Ka ci tava oku vĩhĩsa ndomo ofeka omu vu kasi, momo osonde yi vĩhĩsa ofeka. Ka ci tava oku sembikila ofeka osonde ya pesekelamo, te losonde yu wa yi pesela.

³⁴ Ka ci tava oku vĩhĩsa ofeka omo wa tungi ene, lamevo haimo nda tunga. Momo ame Yehova nda tunga pokati ka va Isareli.