ATENDELO 33 - Embimbiliya - Bíblia Sagrada em Umbundu

¹ Eci va Isareli va tunda ke Egito owiñi wavo wosi wa tepisua apata. Mose la Arone ovo va kala asongui vavo. Atulo ovongende avo a kala ndomo.

² Mose wa sonẽha okuvotoka kuavo lovongende avo ndeci Yehova o sapuila. Ovongende avo latulo aco a kala ndomo.

³ Va tunda ko Ramesese kosãi yatete, keteke liekuĩ latãlo liosãi yatete; eteke lia kuama o Pascoa va Isareli va tunda lesanju kovaso a va Egito vosi,

⁴ osimbu va Egito va kala loku kenda olonuñulu viavo viosi vina Yehova a kundula pokati kavo. Olosuku laviovo Yehova wa vi yambula.

⁵ Va Isareli va tunda ko Ramesese, va tunga ovilombo ko Sukote.

⁶ Va tunda ko Sukote va tunga ke Etami, kefetikilo liekalasoko.

⁷ Va tunda ke Etami, va tiukila ko Pihahirote, kovaso a Baale Cifone. Va tunga kovaso a Migidolo.

⁸ Va tunda ko Hahirote, va pita pokati kokalunga, veya kekalasoko. Va enda ungende woloneke vitatu vekalasoko lia Etami, oco va tunga ko Mara.

⁹ Va tunda ko Mara, veya ke Elimi. Ke Elimi kua kala ekui katumu katumu avali, kuenda akuĩ epanduvali koviti vieva. Oko va tunga.

¹⁰ Va tunda ke Elimi va tunga kohulo yo Kalunga Kakusuka.

¹¹ Va tunda ko Kalunga Kakusuka, va tunga vekalasoko lia Cina.

¹² Va tunda vekalasoko lia Cina, va tunga ko Dofika.

¹³ Va tunda ko Dofika, va tunga ko Alusi.

¹⁴ Va tunda ka Alusi, va tunga vo Refidimi. Oko ka kua kaile ovava okuti omanu va nyua.

¹⁵ Va tunda ko Refidimi, va tunga vekalasoko lia Sinai.

¹⁶ Va tunda vekalasoko lia Sinai, va tunga vo Kiviroti Hataawa.

¹⁷ Va tunda ko Kiviroti Hataawa, va tunga vo Haceroti.

¹⁸ Va tunda ko Haceroti, va tunga vo Ritima.

¹⁹ Va tunda ko Ritima, va tunga vo Rimone Parece.

²⁰ Va tunda ko Rimone Parece, va tunga vo Livina.

²¹ Va tunda ko Livina, va tunga vo Risa.

²² Va tunda ko Risa, va tunga ko Kehelata.

²³ Va tunda ko Kehelata, va tunga komunda ya Sefere.

²⁴ Va tunda komunda ya Sefere, va tunga vo Harada.

²⁵ Va tunda ko Harada, va tunga vo Makihelote.

²⁶ Va tunda ko Hakihelote, va tunga vo Tahate.

²⁷ Va tunda ko Tahate, va tunga vo Tera.

²⁸ Va tunda ko Tera, va tunga vo Mitika.

²⁹ Va tunda ko Mitika, va tunga vo Hasimona.

³⁰ Va tunda ko Hasimona, va tunga vo Moserote.

³¹ Va tunda ko Moserote, va tunga vo Bene Yakana.

³² Va tunda ko Bene Yakana, va tunga vo Horo Hagidigadi.

³³ Va tunda ko Horo Hagidigadi, va tunga vo Yotivata.

³⁴ Va tunda ko Yotivata, va tunga vo Avirona.

³⁵ Va tunda ko Avirona, va tunga ve Eciongevere.

³⁶ Va tunda ke Eciongevere, va tunga vekalasoko lia Cina haiko ko Kadesi.

³⁷ Va tunda ko Kadesi, va tunga komunda ya Horo, kulilo wofeka ya Edome.

³⁸ Oco ocitunda Arone wa londa komunda ya Horo ndondaka ya Yehova. Oko a fila kosãi yatãlo kunyamo wakui akuãla koku tunda kua va Isareli vofeka ye Egito, keteke liatete liosãi.

³⁹ Arone wa kala locita lakui avali kanyamo kanyamo atatu, eci a fa komunda ya Horo.

⁴⁰ Oco u Kanana, osoma ya Arade, wa tunga ko Sul, kofeka ya Kanana, wa yeva okuiya kua va Isareli.

⁴¹ Va tunda komunda ya Horo, va tunga vo Calimona.

⁴² Va tunda ko Calimona, va tunga vo Punono.

⁴³ Va tunda ko Punono, va tunga vo Ovote.

⁴⁴ Va tunda ko Ovote, va tunga vi Iyehavari, kovililo via Moavi.

⁴⁵ Va tunda ki Iyi, va tunga vo Divone Gadi.

⁴⁶ Va tunda ko Divone Gadi, va tunga va Alimone Divilatayima.

⁴⁷ Va tunda ka Alimone Divilatayima, va tunga kolomunda via Avarime, kovaso a Nevo.

⁴⁸ Va tunda kolomunda via Avarime, va tunga vanyãla a Moavi ko Yordão ko Yeriko.

⁴⁹ Va tunga ko Yordão tunde Bete Hayesimoti toke ka Avelehasiti kanyãla a Moavi.

⁵⁰ Yehova yu wa popia la Mose vanyãla a Moavi kekulo lia Yordão oku imba ovaso ko Yeriko, hati,

⁵¹ Popia la va Isareli, huti, Eci vu yoka Yordão oku iñila vofeka ya Kanana,

⁵² oco vu tundisa kovaso ene olonungi viosi viofeka, loku nyõla ovawe avo osi a songiwa oviñumañuma. Vu nyõlavo oviteka viavo viosi via itilua, loku tungulula olonumbuko viavo viosi.

⁵³ Oco vu kuata ofeka loku tungamo, momo ndo wihi ofeka yaco ha yi lingi yene.

⁵⁴ Oco wu piñala ofeka loku ta oviela epata epata. Ava va lova vu va iha ocipiñalo cinene; ava ka va luile vu va iha ocipiñalo ci sule; oku ocela ci kuatela omunu oco ci linga caye. Ndomo mu kasi apata olosekulu viene haimo wu piñala.

⁵⁵ Puãi nda ko tundisa olonungi viofeka kovaso ene, oco ava wa tavi okuti va siala va linga ndinene vovaso ene, pamue ndolosongo volomati viene. Vo tatamisa vofeka omo wu tunga.

⁵⁶ Ci kala okuti eci nda sokele oku va linga ovo ndu ci lingi ene.