ATENDELO 32 - Embimbiliya - Bíblia Sagrada em Umbundu

¹ Va Ruvene la va Gadi va kala lovinyama via lua cimue. Va vanja ofeka ya Yasere lofeka ya Gileada kuenje va limbuka okuti oko ku li ulisilo wovinyama.

² Oco va Gadi la va Ruvene veya ku Mose kuenda ocitunda eleasa lasongui va va Isareli. Va popia lavo, vati,

³ Ovaimbo a Ataroti, la Divone, la Yasere, kuenda Nimira, la Hesibone, la Eleale, kuenda sivima, la Nevo, la Beone,

⁴ a kasi vofeka Yehova a yulila va Isareli. Tua limbuka okuti ofeka yaco oyo ya sesamẽla ovinyama. Etu tuakuenje vove tu kuete ovinyama.

⁵ Kuenje vati, Nda o tu kuetele ohenda, tava okuti tu tunga vofeka eyi ha yi lingi yetu. Ku ka tu yokise Yordão.

⁶ Puãi Mose wa kumbulula Gadi la va Ruvene hati, Vakuẽle hẽ va enda kovita osimbu ene vu tumãla ño kulo?

⁷ Nye vu konyuisila utima wa va Isareli okuti ka va yongola oku yokela kofeka Yehova a va iha?

⁸ Haico ca linga olosekulu viene, eci nda va tuma ko Kadesia Barnea oku vanja ofeka.

⁹ Ovo, eci va ile komuva ya Esikole, yu va tala ofeka yaco, va konyuisa utima wa va Isareli okuti ka va yonguile oku iñila vofeka Yehova a va iha.

¹⁰ Oco onyeño ya Yehova ya wengukile keteke liaco muẽle, kuenje wa lisinga hati,

¹¹ Ocili ovalume va tunda ke Egito, vakuanyamo akuĩ avali kuenda kua supa, ka va mõli ofeka nda likuminya la Avirahama kuenda Isake la Yakoba oku va yiha momo ka va ñuamele ciwa.

¹² Te Kalembe, omõla a Yefune u Kenasi, la Yehosua, omõla a Nune, ovo lika va iñila omo va kuama ocili Yehova.

¹³ Oco onyeño ya Yehova ya wengukila va Isareli. Wa va ñualãisa oko loko vekalasoko akuĩ akuãla kanyamo, te ocitumbulukila caco cosi cava va linga cĩvi kovaso a Yehova ca takata.

¹⁴ Kaliye tala, ene wa likuti oku linga cĩvi, wa piñali kolomangu via vaisiene, ho wenguila vali va Isareli onyeño ya tokota ya Yehova.

¹⁵ Momo nda ene vu konyõha oku u kuama, eye o va sia vali vekalasoko, kuenje vu nyõla omanu ava vosi.

¹⁶ Oco veya kokuaye, va popia vati, Tu tunga kulo ovimanga violongombe vietu, kuenda ovaimbo omãla vetu.

¹⁷ Puãi etu tu mãleha, tu pita kovaso a va Isareli toke tu va tuala pocitumãlo cavo. Kuenje omãla vetu va tumãla vovaimbo a malehisua omo vakuafeka va lingisa usumba.

¹⁸ Etu ka tu tiukila kolonjo vietu te va Isareli va kuata, u ocipiñalo caye, u ocipiñalo caye.

¹⁹ Momo ka tu ka piñala lavo kesinya lia Yordão, ndaño kovaso yaco, momo ocipiñalo cetu ci kasi sinya lilo lia Yordão kutundilo.

²⁰ Oco Mose wa popia lavo, hati, Nda wu linga ndoco okuti wu malẽha loku enda kovita kovaso a Yehova,

²¹ kuenje nda vosi yene wa mãlehi vu yoka Yordão kovaso a Yehova, toke Yehova o tundisa ovanyãli vaye kovaso aye,

²² kuenje ofeka yi yulisa kovaso a Yehova, oco wu tiuka noke kuenje wu yovoka kovaso a Yehova lokovaso a va Isareli. Lofeka yilo yi linga yene kovaso a Yehova.

²³ Puãi nda ka wu ci lingi, ca lomboloka okuti wa lingili Yehova ekandu. Kuenje limbuki okuti ekandu liene liu wili.

²⁴ Oco tungili omãla vene ovaimbo, lolomeme viene vi tungili ovimanga. Noke lingi ndeci wa likuminyi.

²⁵ Oco va Gadi la va Ruvene va popia la Mose, vati, Etu tuakuenje vove tu linga ndeci ove u cime cetu o tu sapuila.

²⁶ Omãla vetu lakãi vetu, loviunda vietu lolongombe vietu, cosi ci kala vovaimbo a Gileada.

²⁷ Puãi etu tuakuenje vove tu yoka. Etu vosi tua malehisua tu enda kovita kovaso a Yehova, ndeci cime cetu a popia.

²⁸ Oco Mose wa lombolola ondaka yavo kocitunda Eleasa kuenda ku yehosua omõla a Nune, wa yi lombololavo kakulu vapata a va Isareli.

²⁹ Mose wa popia lavo hati, Va Gadi vosi la va Ruvene vosi ava va malehisua nda va yoka lene Yordão kovaso a Yehova, kuenje vu yula ofeka yaco oco wu va iha ofeka ya Gileada okuti yi linga yavo.

³⁰ Puãi nda ka va tava oku yoka lene lovimãlẽho viavo, va tambula ovipiñalo viavo pokati kene vofeka ya Kanana.

³¹ Va Gadi la va Ruvene va tambulula vati, Eci Yehova a popia letu tuakuenje vove oco tu linga.

³² Tu mãleha, tu yokila kofeka ya Kanana kovaso a Yehova. Etu tu kuata ocipiñalo cetu sinya lilo lia Yordão.

³³ Oco Mose wa eca ku va Gadi, kuenda ku va Ruvene, kuenda konepa yepata lia Manase, omõla a Yosefe, ofeka ya Sihoni, osoma ya va amori, lofeka ya Oge, osoma ya Basiane, ofeka lovaimbo ayo lovikanjo viayo, okuti ovaimbo osi a ñualako.

³⁴ Va Gadi va tunga Divone, la Ataroti, la Aroere,

³⁵ la Atirote Siofane, la Yasere, la Yogibeha,

³⁶ la Betenimira, la Beteharana, ovaimbo a pama lovimanga violomeme viavo.

³⁷ Va Ruvene va tunga Hesibone, la Eleale, la Kiriatami,

³⁸ la Nevo, la Baale Meone, olonduko viao vi pongoloka, la Sivima Ovaimbo va a tunga va a tukula olonduko viñi.

³⁹ Omãla va Makiri, omõla a Manase, va enda ko Gileada, va yi kuata, va tundisa va Amori va kalamo.

⁴⁰ Oco Mose wa eca Gileada ku Makiri, omõla a Manase, yu wa tungilamo.

⁴¹ Yairi, omõla a Manase, wa enda, wa kuata ovaimbo aco, wa a tukula Hawote Yairi.

⁴² Nova wa enda wa kuata Kenata lovikanjo vialio, wa li tukula Nova oku liukuluila.