ATENDELO 31 - Embimbiliya - Bíblia Sagrada em Umbundu

¹ Yehova wa popia la Mose hati,

² Fetuluinya va Midiane. Va fetuluinyila eci va linga va Isareli. Oco noke wenda kolosekulu viove.

³ Mose yu wa popia lomanu hati, Noli alume va tẽla oku enda kovita. Va ihi ovimalẽho okuti va katukila va Midiane loku va muisa efetuluinyo lia Yehova.

⁴ Kapata osi a va Isareli, kepata lepata vu nolako ohulukãi yalume va enda kovita.

⁵ Oco kapata osi a va Isareli, kepata lepata va nolako ohulũkãi yalume va enda kovita. Olohoka viaco viosi via malehisua via tẽla ekuĩ liolohũlukai kolohũlũkai vivali vialume.

⁶ Oco Mose wa va tuma kovita okuti kepata ohulũkãi, kepata ohulũkai. Wa va tuma kumosi la Finehase, omõla ocitunda Eleasa. Mose wa kundika ku Finehase ovikuata viocitumãlo ci kola kuenda olombeta vioku sikila ocilunga.

⁷ Oco va Isareli va yaka la va Midiane ndomo Yehova a sapuila Mose kuenje va ipa alume vosi.

⁸ Kalume va ipaiwa va vokiyako oku ipãla olosoma vitãlo via va Midiane, okuti Ewi, la Rekeme, kuenda Curu, la Huru, kuenda Reva. Baliame, omõla a Beore, layevo vo wipa losipata.

⁹ Kuenje va Isareli va kuata akãi va va Midiane lotumãla tuavo. Va punda olongombe viavo viosi, loviunda viavo viosi, lovikuata viavo viosi.

¹⁰ Ovaimbo avo osi oko va tunga, lovilombo viavo viosi, va vi yoka londalu.

¹¹ Kuenje va ambata viosi via pundiwa, lolohute viosi viomanu levi viovinyama.

¹² Oco olohute viomanu, levi viovinyama, levi via pundiwa, viosi va vi nena ku Mose lacitunda Eleasa kuenda va Isareli vosi. Va vi nena kokuavo kocilombo ca kala venyala lia Moavi, kekulo lia Yordão lia imba ovaso ko Yeriko.

¹³ Mose kuenda ocitunda Eleasa lovasongui vosi va va Isareli va tunda vocilombo oku ñualehela lavo.

¹⁴ Oco Mose wa temẽla vakesongo volohoka okuti vakesongo vovisoko viohulũkãi ohulũkãi, la vakesongo vovisoko viocita ocita, ava va tiuka kovita viaco.

¹⁵ Mose wa popia lavo hati, Akãi vosi hẽ wa va si lomuenyo?

¹⁶ Siti, ava, ovo va kala pongombo ya Baliame, haivo va lueyisa va Isareli kuna ko Peore okuti va Isareli va yanduluka Yehova kuenje pokati komanu va Yehova peya efengi?

¹⁷ Kaliye ipayi otumãla tuosi tualume. Ipayivo ukãi wosi wa kulĩha ulume loku pekela laye.

¹⁸ Puãi, omãla vosi vakãi ka va kulĩhĩle ulume oku pekela laye va lisolekeli ene muẽle lomuenyo.

¹⁹ Tungili ocilombo cene kofeka. Kaliko oloneke epanduvali. Wosi wa ipãla omunu, pamue wa lamba kocivimbi, a liyelise loku yelisa olohute viaye keteke liatatu lo keteke liepanduvali.

²⁰ Wu yelisa uwalo wosi, lovina viosi viovipa, kuenda ovina viosi viovonya olohombo, lovikuata viosi vioviti.

²¹ Ocitunda Eleasa wa popia lalume va ile kovita, hati, Eci oco ocisila covihandeleko Yehova a sapuila Mose.

²² Haimo ulu, lopalata, losipi, lutale, lofuoya, kuenda osumbu, okuti

²³ viosi ka vi nyõlẽha londalu, vu vi pitisa vondalu oco vi yela. Haimo lumue, vi yelisuavo lovava a puisa evĩho. Cosi ci nyõlẽha londalu vu ci pitisa vovava.

²⁴ Keteke liepanduvali vu sukula uwalo wene kuenje vu yela. Noke wiñili vocilombo.

²⁵ Yehova yu wa popia la Mose hati,

²⁶ Ove lacitunda Eleasa lakulu vapata osi, tendi olohute viomanu levi viovinyama.

²⁷ Tepisi olohute kolonepa vivali. Onepa eyi, vu yeca kuava va ile kovita. Onepa yikuavo vu yeca ku va Isareli vosi.

²⁸ Ava va ile kovita vu va lambuisa ulambu wa Yehova. Kovita vitãlo violohute ku tunda ohute yimosi, ci kale viomanu, ci kale violongombe, pamue viovimbulu, pamue vioviunda vikuavo.

²⁹ Vu vi upa konepa yavo, loku eca kocitunda Eleasa kuenje vi linga ocilumba ci lumbiwa ku Yehova.

³⁰ Konepa ya va Isareli vosi wupiko ndomo: Kakuĩ atãlo vu tambulako yimosi, ci kale komanu pamue kolongombe, ci kale kovimbulu pamue koviunda, okuti kovinyama viosi muẽle. Vu vi eca ku va Lewi va kasi locikele cotavernakulu ya Yehova.

³¹ Oco, Mose locitunda Eleasa, va linga ndeci Yehova a sapuila Mose.

³² Kaliye olohute via supa kuevi via kuatiwa lava va ile kovita vievi: ovita epandu kakuĩ epanduvali kolohũlũkai kolohũlũkai vitãlo violomeme,

³³ lakuĩ epanduvali kolohũlũkãi kolohũlũkãi vivali violongombe,

³⁴ kuenda akuĩ epandu kolohũlũkai kohũlũkai yovimbulu,

³⁵ lo kovakãi ka va kulĩhĩle ulume oku pekela laye, akuĩ atatu kolohũlũkai kolohũlũkai vivali viomanu.

³⁶ Oco, onepa yava va ile kovita ya tẽla ovita vitatu lakuĩ atatu kolohũlũkai kolohũlũkai epanduvali lovita vitãlo violomeme.

³⁷ Kolomeme ulambu wa Yehova wa tẽla ovita epandu lakui epanduvali la vitãlo.

³⁸ Olongombe via tẽla akuĩ atatu kolohũlũkai kolohũlũkai epandu; ulambu wa Yehova akuĩ epanduvali la vivali.

³⁹ Ovimbulu via tẽla akuĩ atatu kolohũlũkai kovita vitãlo; ulambu wa Yehova akui epandu la mosi.

⁴⁰ Omanu va tẽla ekui liolohũlũkai kolohũlũkai epandu; ulambu wa Yehova akuĩ atatu la vavali komanu.

⁴¹ Oco Mose wa eca kocitunda Eleasa ulambu waco, haiwo ocilumba ci lumbiwa ku Yehova ndeci Yehova a sapuila Mose.

⁴² Mose wa tepela va Isareli onepa yavo, wa tepelavo ava va ile kovita onepa yavo.

⁴³ Onepa ya va Isareli vosi ya kala ndomo: olomeme, ovita vitatu lakui atatu kolohũlũkãi kolohũlũkãi epanduvali lovita vitãlo,

⁴⁴ olongombe, akui atatu kolohũlũkãi kolohũlũkãi epandu,

⁴⁵ ovimbulu akuĩ atatu kolohũlũkãi kovita vitãlo,

⁴⁶ omanu ekuĩ liolohũlũkãi kolohũlũkãi epandu.

⁴⁷ Konepa ya va Isareli vosi Mose wopako ndomo, okuti kakui atãlo, wopako ohute yimosi, ci kale komanu, ci kale kovinyama. Wa vi eca ku va Lewi va kala locikele cotavernakulu ya Yehova, ndeci Yehova a sapuila Mose.

⁴⁸ Oco vakesongo volohoka, okuti vakesongo vovisoko viohũlũkãi ohũlũkai, kuenda vakesongo vovisoko viocita ocita veya ku Mose,

⁴⁹ va popia la Mose vati, Etu tuakuenje vove tua tenda ava va ile letu kovita kuenje ka kua kambele umue.

⁵⁰ Oco tua nena ocilumba ku Yehova, u leci a kuata, u leci a kuata. Tua nena evi vioku liposuisa viulu, kuenda alienge okovolu, lovinunga, lolonela viasitikilo, kuenda ingẽlengẽle lolomota. Tua vi nena ha tu liupi eko kovaso a Yehova.

⁵¹ Oco Mose kuenda ocitunda Eleasa va tambula kokuavo ulu wosi wa kala kaposuiso osi a teliwa.

⁵² Ulu wosi woku lumba ku Yehova wa nena vakesongo vovisoko viohulũkãi epandu lovita epanduvali lakuĩ atãlo kolosiekele.

⁵³ Ava va ile kovita va lipundila, u caye u caye.

⁵⁴ Oco Mose kuenda ocitunda eleasa va tambula ulu waco ku vakesongo vovisoko viohũlũkai ohũlũkãi kuenda ku vakesongo vovisoko viocita ocita. Vo nena kombalaka yoku ñualehela la Yehova ha u lingila va Isareli onjivaluiso ya vi ivaluisa Yehova.