ATENDELO 30 - Embimbiliya - Bíblia Sagrada em Umbundu

¹ Mose wa popia lakulu vapata va va Isareli, hati, Eci Yehova a sapula okuti omanu va ci linga, ceci,

² Nda ulume o likuminya ohuminyo la Yehova, pamue o likuta lutima waye poku lisinga esingo, ka ci tava vali oku tokoka ohuminyo yaye. Cosi ca tunda vomẽla waye oco a linga.

³ Ukãi, nda o likuminya ohuminyo la yehova loku likuta lutima waye poku lisinga esingo osimbu a kasi vonjo ya isiaye kusombo waye,

⁴ kuenje isiaye o yeva ohuminyo yaye lokulisinga wa likuta lakuo vutima waye, kuenje isiaye uhã ño; oco olohuminyo viaye viosi vi kala, lokulisinga kuosi a likuta lakuo vutima ku kala.

⁵ Puãi nda isiaye u patãla keteke o ci yeva, olohuminyo viaye viosi lokulisinga kuaye kuosi a likuta lakuo vutima ka vi kala; puãi Yehova o wecela, momo isiaye wo patãla.

⁶ Nda eye o kasi lulume eci a kasi lolohuminyo pamue londaka a lueya vomẽla waye, eyi a likuta layo vutima waye,

⁷ veyaye nda u yeva kuenje uhã ño eteke a ci yeva oco olohuminyo viaye vi kala, lokulisinga kuaye a likuta vutima waye ku kala.

⁸ Puãi nda veyaye u patãla eteke a ci yeva, eye imũla ohuminyo yukãi eyi a likuta layo, londaka a lueya vomẽla waye oku likuta lutima waye kuenje Yehova o wecela.

⁹ Puãi ohuminyo yocimbumba pamue yu wa nyalĩwa, cosi a likuta laco lutima waye, kokuaye ci kala.

¹⁰ Puãi nda vonjo yaveyaye wa likuminya, pamue wa likuta lutima waye londaka yoku lisinga,

¹¹ veyaye yu wa ci yeva kuenje wõha ño, ko patãlele, olohuminyo viaye viosi vi kala, lokulisinga kuosi a likuta lakuo lutima waye ku kala.

¹² Puãi nda veyaye wa vimũla eteke a vi yeva, cosi ca tunda komẽla waye, ci kale ondaka yolohuminyo viaye, ci kale eyi yoku lisinga a likutile lutima waye, ka vi kala; veyaye wa vimũla, oco Yehova o wecela.

¹³ Olohuminyo viosi lokulisinga kuosi kuoku likandangiya, veyaye o kuete omoko yoku vi talamisa, pamue oku vimũla.

¹⁴ Puãi nda veyaye eteke leteke uhã ño, oco a talamisa olohuminyo viaye viosi lokulisinga kuaye kuosi o kasi lakuo. Wa vi talamisa omo wõha ño eteke a vi yeva.

¹⁵ Puãi nda wa vi yevale osimbu kovaso ha vimũla noke eye o lituika ongole yaye.

¹⁶ Evi ovio ovisila Yehova a sapuila Mose okuti ovio vi kala pokati kulume lukãi waye, pamue pokati ka isia lomõlaye ukãi kusombo waye, eci a kasi vonjo ya isiaye.