ATENDELO 3 - Embimbiliya - Bíblia Sagrada em Umbundu

¹ Ovitumbulukila via Arone la Mose eteke Yehova a popia la Mose vomunda Sinai via kala ndomo:

² Olonduko viomãla valume va Arone vievi: Nadava eye nuñulu, kuenda Avihu, la Eleasa la Itamare.

³ Ovio olonduko viomãla valume va Arone, haivo ovitunda via wavekiwa, haivo va ihiwa ocikundi coku vumbila komangu yutunda.

⁴ Puãi Nadava la Avihu va fila kovaso a Yehova eci va lumbila Yehova ondalu yaño vekalasoko lia Sinai. Ka va kaile lomãla. Oco Eleasa la Itamare ovo va vumba ndovitunda osimbu isiavo Arone a kala lomuenyo.

⁵ Yehova wa popia la Mose hati,

⁶ Amisa ocipepi epata lia Lewi loku va kapa kovaso yocitunda Arone okuti vo vumba.

⁷ Vo vumba eye loku vumbavo ohongele yosi kovaso yombalaka yoku ñualehela la Yehova. Va linga ovopange aiñi aiñi ombalaka.

⁸ Va lava ovikuata viosi viombalaka yoku ñualehela la Yehova. Va kala locikele coku songola va Isareli ava va linga ovopange aiñi aiñi ombalaka.

⁹ Weca va Lewi ku Arone lomãla vaye valume. Pokati ka va Isareli ovo muẽle va eciwa olumue kokuaye.

¹⁰ O tukula Arone lomãla vaye valume okuti va linga muẽle upange wutunda. Puãi nda umue wiñi u linga ipaiwa.

¹¹ Yehova wa popia la Mose hati,

¹² Ame muẽle nda nola va Lewi pokati ka va Isareli ha va piñainya olonuñulu viosi, ovaveli vosi va va Isareli. Va Lewi va linga vange,

¹³ momo olonuñulu viosi viange. Eteke nda ipaila olonuñulu viosi vofeka ye Egito nda kolisa olonuñulu viosi via Isareli okuti vi linga viange, ci kale viomanu, ci kale viovinyama. Vi linga viange, ame ndi Yehova.

¹⁴ Yehova yu wa popia la Mose vekalasoko lia Sinai, hati,

¹⁵ Tenda va Lewi, epata epata, imo imo, alume vosi va tẽla osãi kuenda kua supa o va tenda.

¹⁶ Oco Mose wa va tenda ndeci Yehova o sapuila.

¹⁷ Omãla va Lewi olonduko viavo vievi: Gerisiono, Kohata, la Merari.

¹⁸ Omãla va Gerisiono olonduko viavo epata epata, vievi: Livini la Simei.

¹⁹ Omãla va Kohata epata epata: Amirama la Yicihare, Hevirone la Usiyele.

²⁰ Omãla va Merari, epata epata; Mahili la Musi. A o apata a va Lewi epata epata.

²¹ Epata lia va Livini lepata lia va Simei va tiamẽla ku Gerisiono. A o apata a va Gerisiono.

²² Poku va tenda okuti oku tenda alume vosi va tẽla osãi kuenda kua supa, va tẽla olohulũkãi epanduvali lovita vitãlo.

²³ Apata a va Gerisiono va tungila ocilombo cavo konyima yombalaka kutakelo.

²⁴ Usongui wa va Gerisiono, Eliyasafe, omõla a Laele.

²⁵ Upange wa va Gerisiono woku tata ombalaka yoku ñualehela la Yehova, wowu: Oku tata muẽle ombalaka okuti ombalaka locisikĩlĩlo cayo. Va tatavo ombindikiyo yuvelo wombalaka yoku ñualehela la Yehova.

²⁶ Va tatavo olongumbo viocitali, lombindikiyo yombundi yocitali ci ñuala ombalaka, lutala kumosi lovikolo viaco. Upange wosi wa tiama kovina viaco viosi ovo vo linga.

²⁷ Epata lia va Amirama, epata lia va Yicihare, epata lia va Hevirone, lepata lia va Usiyele va tiamẽle ku Kohata. A o apata a va Kohata.

²⁸ Poku va tenda okuti oku tenda alume vosi va tẽla osãi kuenda kua supa, kua kala olohũlũkai ecelãla lovita epandu va kala locikele cocitumãlo ci kola.

²⁹ Apata a va Kohata va tungila ocilombo cavo konẽle yoko Sul yombalaka.

³⁰ Usongui wapata a va Kohata, Elicafana, omõla a Usiyele.

³¹ Ocikele cavo ocikasia covisila, lomesa, londiyelo, lovotala, lovikuata ovitunda vi linga lavio upange vocitumãlo ci kola, kuenda ombindikiyo. Upange wosi wa tiama kovina viaco viosi ovo vo linga.

³² Eleasa, omõla ocitunda Arone, eye wa linga usongui wovasongui va Lewi ha songuila ava va kasi locikele cocitumãlo ci kola.

³³ Epata lia va Mahili lepata lia va Musi va tiamẽla ku Merari; a o apata a va Merari.

³⁴ Poku va tenda okuti oku tenda alume vosi va tẽla osãi kuenda kua supa, kua kala olohũlũkai epandu lovita vivali.

³⁵ Usongui wapata a va Merari, Curiyele, omõla a Avihayili. Va tungila ocilombo cavo konẽle yoko Norte yombalaka.

³⁶ Ocikele ca tukuiwila va Merari ceci: olomanji viombalaka, lolombala viayo, lolongunji viavo, kuenda otulukuki tuayo, lovikuata viayo. Upange wosi wa tiama kovina viaco ovo vo linga.

³⁷ Lolongunji viocitali ca ñualãko lotulukuki tuavio, lolombambo viavio, lovikolo viavio, cosi ocikele ca va Merari.

³⁸ Mose la Arone lomãla vaye va tungila ocilombo cavo konele yokutundilo wombalaka, okuti kovaso yombalaka yoku ñualehela la Yehova konẽle yokutundilo wekumbi. Ovo va kala locikele covina viosi viefendelo vi lingiwa vocitumãlo ci kola. Cosi ci tiama kefendelo lia va Isareli oco cavo. Umue wiñi nda o kuatako ipaiwa.

³⁹ Va Lewi vosi va tendiwa epata epata okuti oku tenda alume vosi va tẽla osãi kuenda kua supa, vosi yavo va tẽla akuĩ avali kolohũlũkai kolohũlukãi vivali. Va tendiwa la Mose kuenda Arone ndeci Yehova a va sapuila.

⁴⁰ Yehova wa popia la Mose hati, Tenda olonuñulu viosi vialume via tẽla osãi kuenda kua supa, via va Isareli, Vi tenda omunu omunu londuko yaye.

⁴¹ Ame ndi Yehova, o nolela ame va Lewi va piñainya olonuñulu viosi via va Isareli, lovinyama via va Lewi vi piñainya olonuñulu viosi viovinyama via va Isareli.

⁴² Oco Mose wa tenda olonuñulu viosi via va Isareli ndomo Yehova o sapuila.

⁴³ Oku tenda olonuñulu viosi vialume, okuti oku tenda evi vi tẽla osãi kuenda kua supa, via tẽla akuĩ avali kolohũlũkai kolohũlũkai vivali lovita vivali lakuĩ epanduvali lavatatu. Va vi tenda omunu omunu londuko yaye.

⁴⁴ Yehova wa popia la Mose hati,

⁴⁵ Nõla va Lewi ha va piñainya olonuñulu viosi via va Isareli, ovinyama via va Lewi laviovo vi piñainya kovinyama viavo. Va Lewi va linga vange, ame ndi Yehova.

⁴⁶ Oku piñainya olonuñulu via va Isareli ovita vivali kakui epanduvali lavatatu va supa omo va Lewi va sule, o linga ndomo:

⁴⁷ o tambuila omunu omunu olosiekele vitãlo; olosiekele via soka losiekele yocitumãlo ci kola ovio o tambula, osiekele yaco ya soka lakuĩ avali kolongera.

⁴⁸ Eca ku Arone lokomãla vaye olombongo vioku piñainya ava va supapo.

⁴⁹ Oco Mose wa tambula olombongo vioku piñainya ava va supa vana va piñainyaiwa la va Lewi.

⁵⁰ Wa tambuila olonuñulu via va Isareli olombongo via soka lohũlukãi lovita vitatu lakuĩ epandu la vitãlo kolosiekele, ndosiekele yocitumãlo ci kola.

⁵¹ Mose wa eca ku Arone lo komãla vaye olombongo vioku piñainya ndondaka ya Yehova okuti, ndomo Yehova a sapuila Mose.